2 Chronicles 30
Qutqarılıw bayramına tayarlıq
1Xizkiya pútkil Izrail hám Yahudaǵa xabar jiberip, Efrayım hám Menashshe urıwlarına da xat jazıp, olardı Izraildıń Qudayı Jaratqan Iyege arnap Qutqarılıw bayramın nıshanlaw ushın Erusalimdegi Jaratqan Iyeniń Úyine mirát etti. 2Patsha, onıń wázirleri hám Erusalimdegi pútkil jıyın keńesip, bayramdı ekinshi ayda ótkeriwdi sheshti. 3Olar bayramdı belgilengen waqıtta, birinshi ayda ótkere almaǵan edi. Sebebi pákleniw rásiminen ótken ruwxaniyler jetkiliksiz boldı hám xalıq ta Erusalimge jıynalıp úlgermedi. 4Bul usınıs patshaǵa da, pútkil jıyınǵa da unadı. 5Solay etip, olar pútkil Izrail boylap, qubladaǵı Beer-Shebadan arqadaǵı Danǵa shekemgi pútkil xalıq Izraildıń Qudayı Jaratqan Iyege arnap Qutqarılıw bayramın nıshanlaw ushın Erusalimge kelsin dep járiyalawdı sheshti. Sebebi bul bayram jazılǵanǵa say ulıwma xalıqlıq bayram sıpatında nıshanlanbay kiyatırǵan edi. 6Patshanıń buyrıǵı boyınsha, shabarmanlar patshanıń hám onıń xızmetkerleriniń jazǵan xatın pútkil Izrail hám Yahuda boylap tarattı. Onda bılay dep jazılǵan edi: «Izrail xalqı, Ibrayımnıń, Ísaqtıń hám Izraildıń Qudayı Jaratqan Iyege qaytıńlar! Sonda Ol da sizlerge, Assiriya patshalarınıń qolınan aman qalǵanlarǵa qaytadı. 7Ata-babalarınıń Qudayı Jaratqan Iyege opasızlıq etken ata-babalarıńız hám tuwısqanlarıńız sıyaqlı bolmańlar! Kórip turǵanıńızday, Jaratqan Iye olardı qorqınıshlı kóriniske alıp keldi. 8Ata-babalarıńız sıyaqlı qaysar bolmay, Jaratqan Iyege boysınıńlar! Onıń máńgige muxaddes qılǵan Muxaddes ornına kelip, ústińizge dónip turǵan Onıń lawlaǵan ǵázebiniń basılıwı ushın, Qudayıńız Jaratqan Iyege xızmet etińler! 9Eger Jaratqan Iyege júz bursańız, aǵayinlerińizdi hám balalarıńızdı tutqında uslap turǵanlar olarǵa rehim etip, olardı usı elge qaytaradı. Sebebi Qudayıńız Jaratqan Iye miyrimli hám rehimli. Eger Oǵan qaytsańız, Ol sizlerden júz burmaydı». 10Solay etip, shabarmanlar Efrayım hám Menashshe jerlerin Zebulonǵa shekem qalama-qala aralap shıqtı. Biraq adamlardıń kópshiligi jarshılardıń ústinen kúlip, masqaraladı. 11Degen menen, Asher, Menashshe hám Zebulon urıwlarınıń ayırımları boysınıp, Erusalimge keldi. 12Júreklerine birlik ruwxın sıylaǵan Jaratqan Iyeniń qolı da Yahuda ústinde bolıp, xalıqta patsha hám onıń wázirleriniń Jaratqan Iyeniń sózi boyınsha bergen buyrıǵın orınlawǵa degen qálew tuwdırdı. 13Ekinshi ayda Ashıtqısız nan bayramın nıshanlaw ushın, júdá úlken alaman Erusalimge jıynaldı. 14Olar iske kirisip, Erusalimdegi jat qudaylarǵa arnalǵan qurbanlıq orınlardı hám tútetki tútetiletuǵın barlıq qurbanlıq orınlardı qıyratıp, Kidron sayına ılaqtırdı. 15Ekinshi aydıń on tórtinshi kúni olar Qutqarılıw bayramına arnalǵan qurbanlıqtı shaldı. Ruwxaniyler menen lebiyliler uyalıp qalıp, ózlerin pákledi hám Jaratqan Iyeniń Úyine jandırılatuǵın qurbanlıqlar alıp keldi. 16Keyin olar Qudaydıń adamı Muwsanıń nızamı boyınsha, óz orınların iyeledi. Ruwxaniyler lebiyliler ákelip bergen qurbanlıq qanın alıp, qurbanlıq orınǵa septi. 17Xalıq arasında ózlerin páklemegen adamlar kóp edi. Sonlıqtan tazalanıw rásiminen ótpegenlerdiń Qutqarılıw qurbanlıǵın shalıw hám olardı Jaratqan Iyege baǵıshlaw lebiylilerge júklendi. 18Xalıqtıń kópshiligi, ásirese Efrayım, Menashshe, Issaxar hám Zebulon urıwlarınan kelgenlerdiń kóbisi pákleniw rásiminen ótpegen bolsa da, Qutqarılıw bayramınıń asınan jep, qaǵıydanı buzdı. Biraq Xizkiya olar ushın bılay dep duwa etti: – Iygilikli Jaratqan Iye! 19Bul adamlar Muxaddes orınnıń nızamına say ózlerin páklemegen bolsa da, olar Qudaydı, ata-babalarınıń Qudayı Jaratqan Iyeni shın júrekten izledi, sonlıqtan olardıń hár birin keshire gór! 20Jaratqan Iye Xizkiyanıń duwasın esitti hám xalıqtı keshirdi. 21Erusalimge jıynalǵan izraillılar jeti kún dawamında úlken quwanısh penen Ashıtqısız nan bayramın nıshanladı. Lebiyliler menen ruwxaniyler Jaratqan Iyeni táriyiplewge arnalǵan saz ásbapları menen hár kúni Jaratqan Iyege arnap alǵıs-maqtaw ayttı. 22Xizkiya Jaratqan Iyege degen xızmetlerin sheberlik penen atqarǵan lebiylilerdi jigerlendirdi. Xalıq jeti kún dawamında tatıwlıq qurbanlıqların berdi, ata-babalarınıń Qudayı Jaratqan Iyege alǵıslar aytıp, bayram asınan jedi. 23Pútkil jıyın bayramdı jáne jeti kúnge sozıwǵa qarar etti. Sóytip, olar jáne jeti kún quwanısh penen bayram qıldı. 24Yahuda patshası Xizkiya jıynalǵanlarǵa mıń buǵa hám jeti mıń qoy-eshki berdi. Al hámeldarlar bolsa, mıń buǵa hám on mıń qoy-eshki berdi. Júdá kóp ruwxaniyler páklew rásiminen ótken edi. 25Pútkil Yahuda xalqı, ruwxaniyler, lebiyliler, Izraildan kelgenler, Izraildan kelip Yahudada jasap atırǵan jat jerliler quwanıshqa tolǵan edi. 26Erusalimde ullı quwanısh húkim súrdi. Sebebi Izraildıń patshası Dawıt ulı Sulaymannıń dáwirinen beri Erusalimde bunday bayram bolıp kórmegen edi. 27Ruwxaniyler menen lebiyliler xalıqqa pátiya berdi. Quday olardı esitti, olardıń duwaları kóklerge, Onıń muxaddes mákanına jetip bardı.
Copyright information for
KaaIBT22L