2Ch 31 | KaaIBT22L | STEP | Bayram tolıq tamam bolǵannan keyin, oǵan qatnasqan izraillılardıń barlıǵı Yahuda qalalarına barıp, kiyeli taslardı maydalap, kiyeli aǵashlardı kesip tasladı. Olar pútkil Yahuda, Benyamin, Efrayım hám Menashshe jerlerindegi sıyınıw orınların hám qurbanlıq orınların birde birewin qaldırmay buzıp tasladı. Sońınan izraillılar óz qalalarına, óz iyeliklerine qayttı.

‏ 2 Chronicles 31

Xizkiya kirgizgen ózgerisler

1 Bayram tolıq tamam bolǵannan keyin, oǵan qatnasqan izraillılardıń barlıǵı Yahuda qalalarına barıp, kiyeli taslardı maydalap, kiyeli aǵashlardı kesip tasladı. Olar pútkil Yahuda, Benyamin, Efrayım hám Menashshe jerlerindegi sıyınıw orınların hám qurbanlıq orınların birde birewin qaldırmay buzıp tasladı. Sońınan izraillılar óz qalalarına, óz iyeliklerine qayttı.

2 Xizkiya ruwxaniyler menen lebiylilerdi atqaratuǵın wazıypalarına qarap, toparlarǵa bóldi. Olardıń ayırımlarına jandırılatuǵın qurbanlıqlardı hám tatıwlıq qurbanlıqların usınıw, ayırımlarına Jaratqan Iyeniń mákanınıń dárwazalarında xızmet etiw, ayırımlarına táriyiplew hám alǵıs-maqtaw qosıqların aytıw tapsırıldı. 3 Patsha Jaratqan Iyeniń nızamına muwapıq, hár kúni azanda hám keshte, Shabbat kúnleri, Jańa ay bayramında hám Jaratqan Iyeniń Nızamında belgilengen bayramlarda usınılatuǵın jandırılatuǵın qurbanlıqlar ushın óz mal-múlkinen mallar ajırattı. 4 Ruwxaniyler menen lebiylilerdiń ózlerin Jaratqan Iyeniń Nızamın orınlawǵa baǵıshlawı ushın, patsha Erusalimde jasaytuǵın xalıqqa ruwxaniyler menen lebiylilerge tiyisli bolǵan payların berip turıwdı buyırdı. 5 Bul párman járiyalanıwdan-aq, izraillılar biydaydıń, jańa sharaptıń, záytún mayınıń, paldıń, jerden óngen barlıq ónimlerdiń birinshi zúráátinen saqıylıq penen alıp kele basladı. Sonday-aq qollarında bar bolǵannan mol etip onnan birin berdi. 6 Yahuda qalalarında jasap atırǵan izraillılar menen yahudalılar da óz súriw hám padalarınan onnan birin berdi, jáne Qudayı Jaratqan Iyege arnalǵan muxaddes zatlarınan da onnan birin berip, olardı bir jerge jıynap úyin-úyin qıldı. 7 Olar bul isti úshinshi ayda baslap, jetinshi ayda tamamladı. 8 Patsha Xizkiya hám onıń hámeldarları kelip, úyinlerdi kórgende, Jaratqan Iyege alǵıs aytıp, Onıń xalqı Izrailǵa pátiyasın berdi. 9 Xizkiya ruwxaniyler menen lebiylilerden bul úyinler haqqında soraǵanda, 10 Sadoq tiyresinen bolǵan bas ruwxaniy Azariya juwap berip:

– Xalıq Jaratqan Iyeniń Úyine sadaqaların alıp kele baslaǵannan beri, tamaǵımız toq, artıp ta qalmaqta. Jaratqan Iye Óz xalqın jarılqaǵanlıqtan, awısıǵınıń ózi aǵıl-tegil, – dedi.

11 Sonda Xizkiya Jaratqan Iyeniń Úyine zat saqlanatuǵın bólmeler qurıwdı buyırdı hám olar qurıldı. 12 Bul bólmelerge barlıq sadaqalar, barlıq zattıń onnan biri, baǵıshlanǵan zatlar sadıqlıq penen aparıp qoyıldı. Bul islerdiń basında lebiyli Kenaniya turdı, al inisi Shimey onıń orınbasarı boldı. 13 Patsha Xizkiya hám Qudaydıń Úyiniń basqarıwshısı Azariyanıń tapsırması boyınsha, Exiel, Azaziya, Naxat, Asahel, Erimot, Iozabad, Eliel, Ismaxiya, Maxat hám Benaya Kenaniya menen onıń inisi Shimeydiń qol astında baqlawshılar xızmetin atqara basladı. 14 Shıǵıs dárwazanıń qarawılı lebiyli Imna ulı Qore Qudayǵa ıqtıyarlı túrde berilgen sadaqalarǵa juwapker bolıp, ol Jaratqan Iyege atalǵan sıylardı baǵıshlap, arnawlı túrde berilgen sıylardı bólip beriw wazıypasın alıp bardı. 15 Eden, Minyamin, Eshua, Shemaya, Amariya hám Shekaniya ruwxaniyler jasap atırǵan qalalarda ruwxaniylerge tiyisli úleslerin toparları boyınsha, úlken-kishisine birdey etip bólip beriwde Qorege járdemlesti. 16 Bunnan tısqarı, Jaratqan Iyeniń Úyine kirip, óziniń wazıypası hám toparına say ondaǵı kúndelikli jumıslardı atqaratuǵın úsh jasqa tolǵan hám onnan joqarı bolǵan, shejirege kirgizilgen erkeklerge, 17 sonday-aq, áwladları boyınsha shejirege kirgizilgen ruwxaniylerge, jigirma hám onnan joqarı jastaǵı lebiylilerge wazıypaları menen toparlarına say úles bólip berdi. 18 Jáne de, ruwxaniyler menen lebiylilerdiń shejirege kirgizilgen nárestelerine, hayallarına hám ul-qızlarına da úles tiydi. Sebebi olar ózlerin sadıqlıq penen Qudayǵa baǵıshlaǵan edi. 19 Qalalarınıń átirapındaǵı awıllarda jasap atırǵan Xaron urpaqlarınan bolǵan ruwxaniylerge kelsek, olardan bolǵan barlıq erkeklerge hám lebiylilerdiń shejiresine kirgen hár bir adamǵa tiyisli úlesin beriw ushın atları atalıp, ayırım adamlar tayınlandı.

20 Xizkiya pútkil Yahuda boylap usılay is alıp bardı. Ol Qudayı Jaratqan Iyeniń názerinde iygilikli, tuwrı hám hadal islerdi isledi. 21 Ol Qudaydıń Úyindegi xızmette hám Nızam menen buyrıqlarǵa ámel qılıw islerinde neler islegen bolsa da, Qudayına boysınıp, shın júrekten háreket etti. Nátiyjede ol tabısqa eristi.