2Ch 35 | KaaIBT22L | STEP | Ioshiya Erusalimde Jaratqan Iyeniń húrmetine Qutqarılıw bayramın nıshanladı. Birinshi aydıń on tórtinshi kúni qurbanlıq shalındı.

‏ 2 Chronicles 35

Ioshiyanıń Qutqarılıw bayramın ótkeriwi

1 Ioshiya Erusalimde Jaratqan Iyeniń húrmetine Qutqarılıw bayramın nıshanladı. Birinshi aydıń on tórtinshi kúni qurbanlıq shalındı. 2 Ioshiya ruwxaniylerdi óz xızmetlerine qoyıp, Jaratqan Iyeniń Úyindegi xızmetin orınlaw ushın, olardı jigerlendirdi. 3 Ol pútkil Izrail xalqına tálim berip kelgen, Jaratqan Iyege baǵıshlanǵan lebiylilerge bılay dedi:

– Muxaddes sandıqtı Izrail patshası Dawıttıń ulı Sulayman qurdırǵan Úyge qoyıńlar. Onı bunnan bılay iyinlerińizde kóterip júriwdiń hájeti joq. Endi Qudayıńız Jaratqan Iyege hám Onıń xalqı Izrailǵa xızmet etińler! 4 Izrail patshası Dawıttıń hám onıń ulı Sulaymannıń kórsetpelerine muwapıq, ^{▼▼ 1Jln 23:1–26:32.} áwladıńız hám toparlarıńız boyınsha xızmetke tayarlanıńlar. 5 Muxaddes orında tuwısqanlarıńız bolǵan xalıqtıń hár bir áwladına lebiylilerdiń bir tobı xızmet etiwge tayar tursın. 6 Qurbanlıq soyıp, ózlerińizdi pákleńler hám Jaratqan Iyeniń Muwsa arqalı buyırǵanınday, olardı tuwısqanlarıńız ushın tayınlańlar.

7 Ioshiya sol jerdegi xalıqqa Qutqarılıw qurbanlıǵı ushın, mayda maldan otız mıń bas toqlı hám ılaq, iri maldan úsh mıń bas buǵa sıyladı. Bulardıń hámmesi patshanıń jeke múlkinen berilgen edi. 8 Patshanıń wázirleri de ıqtıyarlı túrde xalıqqa, ruwxaniylerge hám lebiylilerge qurbanlıqlar sıyladı. Qudaydıń Úyiniń basqarıwshıları Xilkiya, Zexariya hám Exiel de bayramǵa arnap, ruwxaniylerge Qutqarılıw qurbanlıǵı ushın eki mıń altı júz mayda mal hám úsh júz iri mal berdi. 9 Sonday-aq, Kenaniya hám onıń tuwısqanları Shemaya menen Netanel, jáne de lebiylilerdiń kósemleri Xashabiya, Eiel hám Iozabad bayramda Qutqarılıw qurbanlıǵına shalıw ushın lebiylilerge bes mıń bas mayda mal hám bes júz bas iri mal berdi.

10 Xızmet ushın hámmesi tayar bolǵanda, patsha buyırǵanınday, ruwxaniyler óz orınlarında, al lebiyliler óz toparları menen tayar turdı. 11 Qurbanlıqlar soyılıp, ruwxaniyler ózlerine berilgen qandı qurbanlıq orınǵa septi. Lebiyliler mallardı teriden ayırdı. 12 Olar Muwsanıń kitabında jazılǵanlarǵa muwapıq, Jaratqan Iyege usınıwı ushın, qurbanlıqqa jandırılatuǵın mallardı xalıqtıń hár bir áwladına bólip berdi. Iri mallardı da solay isledi. 13 Qaǵıyda boyınsha, Qutqarılıw bayramınıń qurbanlıǵın otta quwırdı, muxaddes qurbanlıqlardı hár túrli qazanlarda asıp, pútkil xalıqqa asıǵıs úlestirdi. 14 Keyin lebiyliler ózleri hám ruwxaniyler ushın awqat tayarladı. Sebebi Xaronnıń urpaqlarınan bolǵan ruwxaniyler qas qarayǵansha jandırılatuǵın qurbanlıqlardı hám maldıń mayın órtew menen bánt edi. Sonlıqtan lebiyliler ózleri hám Xaronnıń urpaqlarınan bolǵan ruwxaniyler ushın awqattı keyin tayarladı.

15 Asaf urpaǵınan bolǵan qosıqshılar Dawıt, Asaf, Heman hám patshanıń wáliyi Edutunnıń buyrıǵı boyınsha belgilengen orınlarında turdı. Dárwazalardaǵı dárwaza qarawıllarına óz orınların taslap ketiwdiń hájeti bolmadı, sebebi olardıń tuwısqanları bolǵan lebiyliler olar ushın hámmesin tayar qıldı. 16 Solay etip, sol kúni patsha Ioshiyanıń buyrıǵına muwapıq, Qutqarılıw bayramın ótkeriw hám Jaratqan Iyeniń qurbanlıq ornında jandırılatuǵın qurbanlıqlar beriwge baylanıslı Jaratqan Iyege arnalǵan hámme xızmetler orınlandı. 17 Sol kúni sol jerde bolǵan barlıq izraillılar Qutqarılıw bayramın nıshanladı hám oǵan qosa, jeti kún boyı Ashıtqısız nan bayramın bayramladı. 18 Payǵambar Samueldiń kúnlerinen beri, Izrailda Qutqarılıw bayramı bunday etip nıshanlanbaǵan edi. Izrail patshalarınıń hesh biri de Ioshiyanıń nıshanlaǵanı sıyaqlı, ruwxaniyler, lebiyliler, pútkil Yahuda xalqı, sol jerdegi izraillılar hám Erusalim turǵınları menen birge Qutqarılıw bayramın bayramlamaǵan edi. 19 Usı Qutqarılıw bayramı Ioshiyanıń patshalıǵınıń on segizinshi jılında bolıp ótti.

Ioshiyanıń ólimi

20 Bul waqıyalardan soń, Ioshiya Qudaydıń Úyin tártipke keltirip bolǵanda, Mısır patshası Nexo urısıw ushın Evfrat dáryası boyındaǵı Karkemish qalasına keldi. Patsha Ioshiya da Nexoǵa qarsı júris qıldı. 21 Biraq Nexo Ioshiyaǵa elshileri arqalı mına xabardı jiberdi: «Háy, Yahuda patshası! Meniń menen ne jumısıń bar? Búgin saǵan qarsı emes, al ózim menen urısatuǵın patshalıqqa qarsı urısqa shıqtım. Quday maǵan asıǵıwdı buyırdı, Ol men tárepte. Sonlıqtan Oǵan qarsı shıqpa, bolmasa nabıt bolasań».

22 Biraq Ioshiya Nexo menen urısıwdan waz keshpey, kiyimlerin ózgertti. Qudaydıń Nexo arqalı aytqan sózlerine de qulaq salmay, Megiddo oypatlıǵında Nexo menen urısqa kiristi. 23 Sol jerde sadaqshılardıń oǵı patsha Ioshiyaǵa tiyip, ol xızmetshilerine:

– Meni alıp ketińler, men awır jaraqatlandım, – dedi.

24 Xızmetshileri Ioshiyanı arbasınan aldı da, basqa arbaǵa mingizip, Erusalimge alıp keldi hám ol sol jerde qaytıs boldı. Onı ata-babalarınıń qábirine jerledi. Pútkil Yahuda hám Erusalim xalqı ol ushın joqlaw aytıp jıladı. 25 Eremiya payǵambar Ioshiyaǵa arnap joqlaw jırın shıǵardı. Usı kúnge deyin qosıqshılar Ioshiyanı joqlaw jırları arqalı eske aladı. Bul joqlawlar Izrailda dástúrge aylanıp, olar Joqlawlar kitabına kirgizilgen.

26 Ioshiyanıń basqa isleri, Jaratqan Iyeniń Nızamında jazılǵanlarǵa say alıp barǵan iygilikli isleri, 27 hámme waqıyalar basınan ayaǵına shekem Izrail hám Yahuda patshalarınıń jılnama kitabında jazılǵan.