2 Chronicles 36
Yahuda patshası Ehoaxaz
1Yahuda xalqı ákesi Ioshiyanıń ornına ulı Ehoaxazdı Erusalimde patsha etip qoydı. 2Ehoaxaz jigirma úsh jasında patsha bolıp, Erusalimde úsh ay patshalıq etti. 3Mısır patshası Nexo onı Erusalimde taxttan túsirip, Yahuda eline júz talant gúmis hám bir talant altın salıq saldı. 4Mısır patshası Nexo Yahuda hám Erusalim taxtına Ehoaxazdıń ájaǵası Elyakimdi otırǵızdı hám atın ózgertip, Ehoyakim dep qoydı. Al Ehoaxazdı bolsa, Mısırǵa alıp ketti.Yahuda patshası Ehoyakim
5Ehoyakim jigirma bes jasında patsha bolıp, Erusalimde on bir jıl patshalıq etti. Ol Qudayı Jaratqan Iyeniń názerinde jawız bolǵan islerdi isledi. 6Babiloniya patshası Nabuxodonosor Ehoyakimge hújim jasadı hám onı qola kisenler menen kisenlep, Babilonǵa alıp ketti. 7Ol Jaratqan Iyeniń Úyindegi bir qansha buyımlardı alıp ketip, Babilondaǵı óziniń butxanasına qoydı. 8Ehoyakimniń basqa isleri, ol islegen jerkenishli isler hám onıń basına túsken barlıq isler haqqında Izrail hám Yahuda patshalarınıń jılnama kitabında jazılǵan. Onıń ornına ulı Ehoyakin patsha boldı.Yahuda patshası Ehoyakin
9Ehoyakin segiz ▼ jasında patsha bolıp, Erusalimde úsh ay on kún patshalıq etti. Ol da Jaratqan Iyeniń názerinde jawız bolǵan islerdi isledi. 10Erte báhárde patsha Nabuxodonosor adam jiberip, onı Babilonǵa aldırttı. Kelgenler onıń menen birge Jaratqan Iyeniń Úyindegi qımbatbaha buyımlardı da alıp ketti. Ehoyakinniń ornına Ehoyakinniń ákesiniń inisi Sedekiyanı Yahuda hám Erusalimge patsha etip qoydı.Yahuda patshası Sedekiya
11Sedekiya jigirma bir jasında patsha bolıp, Erusalimde on bir jıl patshalıq etti. 12Sedekiya da Qudayı Jaratqan Iyeniń názerinde jawız bolǵan islerdi isledi. Jaratqan Iyeniń sózin xabarlaǵan Eremiya payǵambar aldında boysınıwshılıq bildirmedi.Erusalimniń qulawı
13Sedekiya Quday haqı ózine ant ishtirgen patsha Nabuxodonosorǵa qarsı bas kóterdi. Ol qaysarlıq penen qasarısıp, Izraildıń Qudayı Jaratqan Iyege júz burmadı. 14Bunıń ústine, ruwxaniylerdiń hám xalıqtıń barlıq basshıları da barǵan sayın basqa xalıqlardıń jerkenishli islerine eliklep, opasızlıq qıldı hám Jaratqan Iye muxaddes qılǵan Erusalimdegi Úyin de haramladı. 15Ata-babalarınıń Qudayı Jaratqan Iye Óz xalqı hám Óz mákanına janı ashıp, Óz xabarshıları arqalı olarǵa qayta-qayta eskertti. 16Biraq olar Qudaydıń xabarshıların mazaq qılıp, Onıń sózlerin pisent etpedi hám Onıń payǵambarlarınıń ústinen kúldi. Aqırında, Jaratqan Iyeniń Óz xalqına ǵázeplengeni sonshelli, endi qutqarılıwdıń sharası joq edi. 17Quday kaldeylerdiń patshasın olarǵa qarsı atlandırdı. Kaldeylerdiń patshası olardıń jasların Muxaddes mákanda qılıshtan ótkerdi, jastı da, qız balanı da, ǵarrını da, aq shashlını da ayamadı. Jaratqan Iye olardıń hámmesin Nabuxodonosordıń qolına berdi. 18Ol Qudaydıń Úyindegi úlken-kishi buyımlardıń hámmesin, Jaratqan Iyeniń Úyiniń qaznaların, patshanıń hám onıń wázirleriniń qaznaların Babilonǵa alıp ketti. 19Ol Qudaydıń Úyine ot qoydı, Erusalimniń diywalın qulattı, ondaǵı barlıq áhmiyetli imaratlardı jaǵıp jiberip, ondaǵı qımbatbaha nárselerdiń hámmesin joq qıldı. 20Al qılıshtan aman qalǵanlardı bolsa, Babilonǵa súrgin qıldı. Olar Persiya patshalıǵı kúsheygenge shekem, Babiloniya patshasınıń hám onıń ullarınıń qulları boldı. 21Solay etip, Jaratqan Iyeniń Eremiya payǵambar arqalı aytqan ▼ mına sózleri orınlandı: «Jer jetpis jıl bos qalıp, Shabbat dem alısların ▼ ótemegenshe dem aladı».Kirdiń súrginde bolǵanlardıń qaytıwına ruxsat beriwi
22Persiya patshası Kirdiń patshalıǵınıń birinshi jılında Jaratqan Iye Óziniń Eremiya payǵambar arqalı aytqan sózin ámelge asırıw ushın, Persiya patshası Kirdiń júregine túrtki saldı. Sonda patsha Kir mınaday párman shıǵarıp, onı pútkil patshalıǵı boylap járiyalawdı hám jazba túrde taratıwdı buyırdı: 23«Persiya patshası Kir bılay deydi: „Aspannıń Qudayı Jaratqan Iye jer júzindegi barlıq patshalıqlardı maǵan berdi hám Yahudanıń Erusalim qalasına Ózi ushın bir Úy qurıwdı maǵan tapsırdı. Arańızdaǵı Onıń xalqınan bolǵan hár bir adam Erusalimge barsın. Qudayı Jaratqan Iye oǵan yar bolsın!“»
Copyright information for
KaaIBT22L