2Ch 4 | KaaIBT22L | STEP | Sulayman qoladan qurbanlıq orın da isletti. Onıń uzınlıǵı jigirma shıǵanaq, eni jigirma shıǵanaq, biyikligi on shıǵanaq edi.

‏ 2 Chronicles 4

Ibadatxanaǵa tiyisli zatlardı islew

1 Sulayman qoladan qurbanlıq orın da isletti. Onıń uzınlıǵı jigirma shıǵanaq, eni jigirma shıǵanaq, biyikligi on shıǵanaq edi. 2 Keyin qolanı eritip, úlken háwiz quydırdı. Onıń bir erneginen ekinshi ernegine shekemgi aralıǵı on shıǵanaq, biyikligi bes shıǵanaq, aylana uzınlıǵı otız shıǵanaq edi. 3 Háwiz quyılǵan waqıtta, onıń erneginiń astına eki qatar etip buǵalardıń kórinisleri qosıp quyılǵan bolıp, olar hár bir shıǵanaqqa on-onnan tuwrı keletuǵın edi. 4 Háwiz on eki quyma buǵanıń ústine ornatılǵan bolıp, olardıń úshewi arqaǵa, úshewi batısqa, úshewi qublaǵa, úshewi shıǵısqa qarap turǵan edi. Buǵalardıń artqı jaǵı háwizdiń astında, ishte edi. 5 Háwizdiń qalıńlıǵı tórt eli bolıp, ernegi keseniń ernegine, ashılıp turǵan lala gúlge uqsaytuǵın edi. Oǵan úsh mıń bat suw sıyatuǵın edi. 6 Sulayman on lágen isletip, onıń besewin qubla tárepke, besewin arqa tárepke qoydı. Bularda jandırılatuǵın qurbanlıqlar juwılatuǵın edi. Al háwizde ruwxaniyler juwınatuǵın edi. 7 Sulayman berilgen kórsetpeler boyınsha on altın shıra qoyǵısh isletip, olardıń besewin Ibadatxananıń ishine oń tárepke, besewin shep tárepke qoydı. 8 Keyin ol on stol soqtırıp, onıń besewin Ibadatxananıń ishine oń tárepke, besewin shep tárepke qoydı. Jáne altınnan júz dana qan sebetuǵın tabaq ta isletti. 9 Ol ruwxaniyler ushın háwli hám úlken háwli qurdırıp, háwliler ushın qapılar isletti hám qapılardı qola menen qaplattı. 10 Háwizdi Ibadatxananıń qubla-shıǵıs tárepine qoydırdı. 11 Bunnan keyin Xuram kúl salınatuǵın ıdıslar, kúl alatuǵın belsheler hám qan sebetuǵın tabaqlar soqtı.

Solay etip, Xuram patsha Sulaymannıń tapsırması boyınsha Qudaydıń Úyi ushın islep atırǵan mına islerin tamamladı: 12 eki óre, órelerdiń tóbesine qoyılatuǵın eki tóbelik, órelerdiń tóbeligin orap turǵan eki tor, 13 óreniń tóbeligin jawıp turıw ushın arnalǵan hár bir tordaǵı eki qatar anar, yaǵnıy eki tordaǵı tórt júz anar, 14 túbeldirikler hám túbeldirik ústine lágenler, 15 háwiz hám háwizdiń astındaǵı on eki buǵa, 16 kúl salınatuǵın ıdıslar, kúl alatuǵın belsheler, shanıshqılar.

Xuram-Abiydiń Jaratqan Iyeniń Úyi ushın patsha Sulaymanǵa islep bergen hámme buyımları jıltıratılǵan qoladan islendi. 17 Patsha bulardı Iordan tegisliginde, Sukkot penen Sereda arasındaǵı saz ılaylı jerlerde quydırdı. 18 Sulayman isletken buyımlar sonshelli kóp bolǵanlıqtan, olar ushın ketken qolanıń ólshemi anıqlanbadı.

19 Sulayman Qudaydıń Úyi ushın tómendegi zatlardı isletti: altınnan islengen tútetki tútetiletuǵın orın, ústinde usınılǵan nanlar turatuǵın stollar, 20 qaǵıydaǵa muwapıq, tórgi bólmege kirer awızda janıp turıwı ushın, sap altınnan shıra qoyǵıshlar hám olardıń shıraları, 21 sapalı altınnan islengen gúller, shıralar hám pilik tazalaytuǵın qısqıshlar, 22 sap altınnan pilik keskishler, qan sebetuǵın tabaqlar, lawabı keseler, shoq salınatuǵın ıdıslar. Ibadatxananıń Eń muxaddes bólmesiniń hám úlken bólmeniń qapıları da altınnan islendi.