2Ch 5 | KaaIBT22L | STEP | Sulayman Jaratqan Iyeniń Úyine tiyisli bolǵan barlıq islerdi tamamlaǵannan keyin, ákesi Dawıt ataǵan hámme nárseni: gúmis, altın hám basqa zatlardı ákelip, Qudaydıń Úyiniń qaznalarına qoydı.

‏ 2 Chronicles 5

1 Sulayman Jaratqan Iyeniń Úyine tiyisli bolǵan barlıq islerdi tamamlaǵannan keyin, ákesi Dawıt ataǵan hámme nárseni: gúmis, altın hám basqa zatlardı ákelip, Qudaydıń Úyiniń qaznalarına qoydı.

Kelisim sandıǵınıń Jaratqan Iyeniń Úyine alıp keliniwi

2 Patsha Sulayman Jaratqan Iyeniń Kelisim sandıǵın Dawıttıń qalası bolǵan Sionnan alıp keliw ushın Izraildıń aqsaqalların, Izrail xalqınıń barlıq urıw hám áwlad basshıların Erusalimge shaqırdı. 3 Hámme izraillılar jetinshi aydaǵı bayram waqtında patshanıń aldına jıynaldı. 4 Izrail aqsaqallarınıń hámmesi jıynalǵanda, lebiyliler Kelisim sandıǵın jerden kóterip aldı. 5 Ruwxaniyler menen lebiyliler Kelisim sandıǵın, Ushırasıw shatırın hám shatırdaǵı hámme muxaddes buyımlardı Ibadatxanaǵa tasıdı. 6 Patsha Sulayman hám onıń janındaǵı pútkil Izrail jámiyeti Kelisim sandıǵınıń aldında, san-sanaqsız qoy hám buǵalardı qurbanlıqqa shaldı. 7 Ruwxaniyler Jaratqan Iyeniń Kelisim sandıǵın Úydiń eń tórine, Eń muxaddes bólmege kirgizip, kerublardıń qanatlarınıń astındaǵı óz ornına qoydı. 8 Kerublardıń qanatları sandıqtıń ústi boylap sozılıp, sandıqtı da, onıń sırıqların da jawıp turdı. 9 Sırıqlar júdá uzın bolǵanlıqtan, olardıń ushları tórgi bólmeniń aldındaǵı Muxaddes bólmeden kórinip turatuǵın edi. Biraq olar sırttan kórinbeytuǵın edi. Olar házir de sol jerde tur. 10 Sandıqtıń ishinde Muwsanıń Xoreb tawında qoyǵan eki tas taxtasınan basqa hesh nárse joq edi. Mısırdan shıqqanda Jaratqan Iye bul tawda izraillılar menen kelisim dúzgen edi.

11 Ruwxaniyler Muxaddes bólmeden shıqtı. Ol jerdegi barlıq ruwxaniyler qaysı toparǵa tiyisli bolıwına qaramastan, tazalanıw rásiminen ótken edi. 12 Barlıq lebiyli sazendeler: Asaf, Heman, Edutun, olardıń ulları hám aǵayinleri hasıl zıǵırdan kiyim kiyip alǵan edi. Olar kimbal, arfa hám lira ^{▼▼ Lira – barmaq penen shertiletuǵın tarlı saz ásbabı.} shertip qurbanlıq orınnıń shıǵıs jaǵında turǵan edi. Olardıń janında kárnay shalatuǵın bir júz jigirma ruwxaniy turdı. 13 Kárnayshılar menen qosıqshılar birigip, bálent dawıs penen Jaratqan Iyege alǵıs-maqtawlar aytıp, Onı táriyipledi. Kárnay, kimbal hám basqa saz ásbaplarına qosılıp qosıqshılar: «Jaratqan Iye iygilikli,
Onıń sadıqlıǵı máńgi dawam etedi!» –

dep Jaratqan Iyege alǵıs-maqtawlar ayttı.

Sonda bir bult Jaratqan Iyeniń Úyin toltırdı. 14 Bul bult sebepli ruwxaniyler xızmetin dawam ettire almadı. Sebebi Jaratqan Iyeniń saltanatı Qudaydıń Úyin toltırıp turǵan edi.