2 Chronicles 8
Sulayman qılǵan isler
1Sulayman Jaratqan Iyeniń Úyi menen óziniń sarayın jigirma jılda pitkerdi. 2Sonıń menen birge Sulayman ózine Tir patshası Xiram bergen qalalardı da qayta qurıp, olarǵa izraillılardı ornalastırdı. 3Sulayman Xamat-Soba patshalıǵına júris qılıp, onı da qolǵa kirgizdi. 4Ol shóldegi Tadmor qalasın hám Xamat elindegi barlıq telekleri bar qalalardı qurıp pitkerdi. 5Joqarǵı hám tómengi Beyt-Xoron qalaların qayta salıp, diywal menen qorshap, támbilenetuǵın dárwaza qurdı. 6Sonday-aq, Baalat qalasın, ózine tiyisli barlıq telekleri bar qalalardı, barlıq sawash arbaları hám atları saqlanatuǵın qalalardı qayta qurıp, bekkemledi. Solay etip, Sulayman Erusalimde, Lebanon tawlarında hám qol astındaǵı hámme qalalarda qálegen nárselerin qurdı. 7Úlkede Izrail xalqınan bolmaǵan xalıqlar: xet, amor, periz, xiw hám ebus xalıqları qalıp ketken edi. 8Izrail xalqı olardı tolıq joq qıla almaǵan edi. Sulayman bul xalıqlardıń urpaqların márdikarǵa aldı. Bul házir de dawam etpekte. 9Biraq Sulayman Izrail xalqınıń birewin de qara jumısqa salmadı. Olardı ózine ásker, áskerbasılar, arbalı áskerlerdiń basshıları etip qoydı. 10Sulayman patshanıń xalıqtı basqarıp turǵan eki júz eliw qadaǵalawshısı da izraillılardan edi. 11Sulayman: «Hayalım Izrail patshası Dawıttıń sarayında turmawı kerek. Sebebi Jaratqan Iyeniń Kelisim sandıǵı turǵan jer – muxaddes», – dep, faraonnıń qızın Dawıttıń qalasınan ol ushın saldırǵan sarayǵa kóshirdi. 12Sulayman Ibadatxananıń aywanınıń aldına qurılǵan qurbanlıq orında Jaratqan Iyege arnap jandırılatuǵın qurbanlıqlar usınatuǵın edi. 13Ol bul qurbanlıqlardı Muwsanıń hár kún ushın belgilep bergen qaǵıydasına muwapıq, Shabbat kúnleri, Jańa ay bayramlarında, jıldıń úsh bayramında: Ashıtqısız nan bayramı, Hápteler bayramı hám Qos bayramı kúnleri usınatuǵın edi. 14Sulayman ákesi Dawıttıń buyrıǵı boyınsha, ruwxaniylerdi toparları boyınsha xızmetlerge qoydı. Lebiylilerdi bolsa alǵıs-maqtaw aytıw hám kúndelikli islerde ruwxaniylerge járdemlesiw xızmetine qoydı. Dárwaza qarawılların da toparları boyınsha dárwazalarǵa bólip qoydı. Sebebi Qudaydıń adamı Dawıt usılay buyırǵan edi. 15Patshanıń ruwxaniylerge, lebiylilerge, sonday-aq qaznaǵa baylanıslı bergen buyrıqları buljıtpay orınlandı. 16Sulayman islewdi qálegen isler, Jaratqan Iyeniń Úyiniń negizin qoyǵan kúnnen baslap, ol qurılıp bolınǵanǵa deyingi isler tolıq orınlandı. Solay etip, Jaratqan Iyeniń Úyi qurıp bolındı. 17Patsha Sulayman Edom jerinde, teńiz jaǵasında jaylasqan Esion-Geber hám Elat qalalarına bardı. 18Patsha Xiram Sulaymanǵa teńizdi jaqsı biletuǵın adamları menen birge kemelerin jiberdi. Olar Sulaymannıń kemeshileri menen birge Ofirge barıp, ol jerden patsha Sulaymanǵa tórt júz eliw talant altın ákelip berdi.
Copyright information for
KaaIBT22L