2Cor 1 | KaaIBT22L | STEP | Qudaydıń qálewi menen Masiyx Iysanıń elshisi bolǵan men, Pavelden hám tuwısqanımız Timofeyden, Korinf qalasındaǵı Qudaydıń jámáátine hám pútkil Axaya úlkesindegi barlıq muxaddeslerge sálem!

‏ 2 Corinthians 1

Sálemnama

1 Qudaydıń qálewi menen Masiyx Iysanıń elshisi bolǵan men, Pavelden hám tuwısqanımız Timofeyden, Korinf qalasındaǵı Qudaydıń jámáátine hám pútkil Axaya úlkesindegi ^{▼▼ Axaya úlkesi – Korinf qalası Axaya úlkesiniń bas qalası boldı.} barlıq muxaddeslerge ^{▼▼ Muxaddesler – Iysaǵa iseniwshiler.} sálem!

2 Ákemiz Quday hám Iyemiz Iysa Masiyx sizlerge miyrim hám tınıshlıq bersin!

Quday tolıq jubanısh beredi

3 Qudayǵa, yaǵnıy Iyemiz Iysa Masiyxtıń Ákesine alǵıslar bolsın! Ol bizlerdiń rehimli Ákemiz hám tolıq jubanısh beriwshi Quday. 4 Quday bizlerge barlıq qıyınshılıqlarımızda jubanısh beredi. Solay etip, bizler de Qudaydan alǵan jubanısh penen hár qıylı qıyınshılıqlarda bolǵan adamlarǵa jubanısh bere alamız. 5 Sebebi Masiyx shekken azap-aqıretlerdi bizler qanshelli kóp sheksek, Quday bizlerge Masiyx arqalı sonshelli úlken jubanısh beredi. 6 Bizler kórip atırǵan qıyınshılıq sizlerdiń jubanısh alıwıńız hám qutqarılıwıńız ushın bolıp atır. Bizlerdiń jubanısh alıwımız da sizlerdiń jubanısh alıwıńız ushın bolıp atır. Sizler ózlerińiz alǵan usı jubanısh arqalı bizler shekken azap-aqıretler menen birdey bolǵan azap-aqıretlerge shıday alasızlar. 7 Bizlerdiń sizlerge baylanıslı bolǵan úmitimiz bekkem. Óytkeni sizlerdiń tek azap-aqıretlerimizge emes, al alǵan jubanıshımızǵa da sherik ekenińizdi bilemiz.

8 Tuwısqanlarım, Aziya úlkesinde ^{▼▼ Aziya úlkesi – házirgi Turkiya eliniń qubla-batıs bóleginde bolǵan bir úlke.} kórgen qıyınshılıqlarımızdan sizlerdiń xabarsız qalıwıńızdı qálemeymiz. Bizler shekten tıs awır qıyınshılıq astında bolıp, tiri qalıwdan da úmitimizdi úzgen edik. 9 Ishimizden ózimizdi ólimge húkim etilgendey sezdik. Biraq bul ózlerimizge emes, al ólilerdi tiriltetuǵın Qudayǵa súyeniwimiz ushın boldı. 10 – 11 Quday bizlerdi usınday úlken ólim qáwpinen qutqardı hám ele de qutqara beredi. Sizlerdiń duwalarıńızdıń járdeminde Quday bizlerdi ele de qutqara beredi dep, bizler Onnan úmit etemiz. Kóp adamlardıń etken duwalarına Quday juwap berip, bizlerdi qutqarǵanlıqtan, kópler bizler ushın Qudayǵa shúkirlik bildiredi.

Paveldiń saparınıń ózgeriw sebebi

12 Bizler maqtanısh tutatuǵın hám pák hújdanımız benen gúwalıq beretuǵın nársemiz mınaw: bizler dúnyaǵa, ásirese sizlerge adamnıń danalıǵı menen emes, al Qudaydıń miyrimi menen, Qudaydan kelgen hadallıq ^{▼▼ hadallıq – Bazı qoljazbalarda «muxaddeslik».} hám haq niyet penen qatnas jasadıq. 13 – 14 Bizler sizlerge oqıp túsine alatuǵın nárselerdi ǵana jazıp atırmız. Házir bizlerdi tolıq túsinbeseńiz de, waqtı kelgende tolıq túsinetuǵınıńızdan úmit etemen. Solay etip, Iyemiz Iysanıń kúninde bizlerdiń maqtanıshımız sizler bolatuǵınıńız sıyaqlı, sizlerdiń maqtanıshıńız da bizler bolamız.

15 Usınday isenim menen sizlerdi eki ese quwanıshqa bólensin dep, sizlerge barıwdı burın niyet etken edim. 16 Makedoniyaǵa baratırǵanımda da, Makedoniyadan qaytıp kiyatırǵanımda da, sizlerge barıwdı niyet etken edim. Sońınan sizler meni Yahudiyaǵa shıǵarıp salarsız dep oylaǵan edim. 17 Usılay niyet etip, men jeńilteklik qılıppan ba? Meni denesiniń qálewi boyınsha kewlinde «yaq» dep oylap, awzı menen «awa» deytuǵın adam dep esaplaysızlar ma? 18 Men Qudaydıń sadıqlıǵı haqı ant ishemen: bizler eki júzli adamlar emespiz. Bizler sizlerge sóylegenimizde, «yaq» dep oylap, «awa» dep aytpadıq. 19 Bizler tárepimizden, yaǵnıy men tárepimnen, Sila ^{▼▼ Sila – grekshe tekstte bul attıń basqa variantı Silvanus.} hám Timofey tárepinen sizlerge járiyalanǵan Qudaydıń Ulı Iysa Masiyx hám «awa», hám «yaq» emes. Onda tek «awa» ǵana bar. 20 Qudaydıń barlıq wádeleri Masiyx arqalı «awa» bolıp, tolıq orınlanadı. Sonlıqtan Qudaydıń dańqqa bóleniwi ushın, Masiyx arqalı Qudayǵa «awmiyin» deymiz. 21 Bizler menen sizlerdiń Masiyx penen bolǵan baylanısımızdı bekkem qılǵan hám bizlerdi xızmetke tayınlaǵan Qudaydıń Ózi boladı. 22 Ol bizlerdi mórlep tamǵa bastı hám bunıń dálili sıpatında Muxaddes Ruwxtı júregimizge jaylastırdı.

23 Meniń júregimde ne bar ekenin biletuǵın Qudaydıń Ózi gúwa: sizlerdi ayaǵanım sebepli, usı waqıtqa deyin Korinfke barmaǵan edim. 24 Bizler sizlerdiń isenimińizdiń ústinen biylik ornatqımız kelmeydi. Kerisinshe, sizlerdiń quwanıwıńız ushın, bizler sizler menen birlikte miynet etip atırmız. Sebebi sizler isenimde bekkem tursızlar.