2Cor 10 | KaaIBT22L | STEP | «Bizler menen birge bolǵan waqtında juwas, biraq aramızda bolmaǵan waqtında qatal», – dep ayırımlarıńız sóz qılatuǵın men, Pavel, Masiyxtıń múláyimliligi hám sabırlılıǵı menen sizlerden ótinemen:

‏ 2 Corinthians 10

Paveldiń óz xızmetin jaqlawı

1 «Bizler menen birge bolǵan waqtında juwas, biraq aramızda bolmaǵan waqtında qatal», – dep ayırımlarıńız sóz qılatuǵın men, Pavel, Masiyxtıń múláyimliligi hám sabırlılıǵı menen sizlerden ótinemen: 2 sizlerge barǵanımda, ózimdi qatal tutıwǵa májbúr qılmańlar. Óytkeni bizlerdi bul dúnyadaǵı adamlar sıyaqlı denesiniń qálewi boyınsha jasap atır, dep sanaytuǵın geybirewlerge qarsı qatal bolaman degen niyetim bar. 3 Bizler dúnyada jasap atırǵan bolsaq ta, dúnyanıń jolı menen urıspaymız. 4 Bizlerdiń qurallarımız dúnyaǵa tiyisli qurallar emes, al dushpannıń bekkem qorǵanların qıyratatuǵın Qudaydıń qúdiretine iye bolǵan qurallar. 5 Sol qurallar menen sandıraq sózlerdi hám Qudaydı biliwge tosqınlıq qılatuǵın hár qanday menmenlikti joq qılamız, Masiyxqa boysınbaytuǵın hár bir oy-pikirdi Masiyxqa tutqın etip boysındıramız. 6 Sizler Masiyxqa tolıq boysınǵanıńızda, Oǵan boysınbaǵan arańızdaǵı hár bir adamdı jazalawǵa tayarmız.

7 Sizler tek sırtqı kóriniske qarap baha beresizler. Eger kim de kim óziniń Masiyxqa tiyisli ekenine isense, onda ol bizlerdiń de Masiyxqa tiyisli ekenimizdi bilsin. 8 Iyemizdiń bizlerge bergen biyligi menen kóbirek maqtanıp ketsem de, uyalmayman. Bul biylik sizlerdi qulatıw ushın emes, al tiklew ushın berilgen.

9 Men tek ǵana xatlarım menen sizlerdi qorqıtıp atırǵanday bolıp kóringim kelmeydi. 10 Sebebi geybirewler: «Xatlarında ol qatal hám kúshli, biraq júzbe-júz kóriskenimizde hálsiz hám sózge de sheber emes», – deydi eken. 11 Biraq, bunday adamlar bilip qoysın: sizlerden uzaqta bolıp, xatlarımızda ne desek, arańızda bolǵanımızda da, solay is tutamız.

12 Ózlerin áhmiyetli etip kórsetip atırǵan ayırım adamlar menen ózlerimizdi teńlestirgimiz yamasa salıstırǵımız kelmeydi. Olar ózlerin óz ólshemleri menen bahalaydı hám ózlerin ózleri menen ǵana salıstıradı. Olar qanshelli aqılsız! 13 Biraq, bizler hádden tıs dárejede maqtanbaymız. Al, Qudaydıń bizler ushın belgilegen jer shegarası ishindegi miynetimiz benen maqtanamız. Bizlerdiń arańızda islegen miynetimiz de usı jer shegarası ishinde islendi. 14 Sizler jasaytuǵın jer usı jer shegarası ishinde jaylasqanlıqtan, bizler sizlerge Masiyxtıń Xosh Xabarın birinshi bolıp jetkizgenimizde, shegaradan tıs shıǵıp ketpedik. 15 Bizler basqalardıń miyneti menen maqtanıp háddimizden aspaymız. Kerisinshe, isenimińizdiń ósiwi menen arańızdaǵı miynetimizdiń kólemi keńeye beriwinen úmit etemiz. 16 Solay etip, bizler Xosh Xabardı sizlerden uzaǵıraq jerlerge járiyalay alamız. Óytkeni basqanıń islegen xızmeti menen maqtanıwdı qálemeymiz. 17 Muxaddes Jazıwda aytılǵanday: «Maqtanatuǵın adam Jaratqan Iye menen maqtansın». ^{▼▼ Erm 9:24.} 18 Sebebi ózin ózi maqtaǵan adam emes, al Iyemiz maqtaǵan adam haqıyqattan qádirleniwge ılayıqlı.