2Cor 11 | KaaIBT22L | STEP | Meniń biraz aqılsız adamday bolıp endi aytatuǵın sózlerime sizlerdiń shıdawıńızdı qáler edim. Awa, men sizlerden usını ótinish etemen!

‏ 2 Corinthians 11

Pavel hám jalǵan elshiler

1 Meniń biraz aqılsız adamday bolıp endi aytatuǵın sózlerime sizlerdiń shıdawıńızdı qáler edim. Awa, men sizlerden usını ótinish etemen! 2 Sizlerdi Qudaydıń qızǵanıshı menen qızǵanaman. Óytkeni men sizlerdi bir pák qız sıyaqlı jalǵız kúyewge, yaǵnıy Masiyxqa usınıp, Oǵan nekeledim. 3 Biraq, jılannıń Hawa-eneni hiylekerlik penen aldaǵanınday ^{▼▼ Jar 3:1-6, 13.}, sizlerdiń aqıl-oylarıńızdıń da buzılıp, Masiyxqa degen haqıyqıy hám pák sadıqlıqtan awıp ketiwinen qorqaman. 4 Sebebi birew kelip, bizler járiyalaǵan Iysanı basqasha qılıp járiyalaǵanda, sizler isenesizler. Jáne de, ózlerińiz alǵan Muxaddes Ruwxtan basqa bir ruwxtı hám ózlerińiz qabıl etken Xosh Xabardan basqa bir «xosh xabardı» ańsat qabıl etesizler. 5 Sizler «mártebeli elshiler» dep ataytuǵın sol adamlardan men ózimdi hesh bir nársede kem sanamayman! 6 Men sózge sheber bolmasam da, bilimim jetkilikli. Bunı sizlerge hár qanday jaǵdayda hám hár tárepleme ashıq kórsettik.

7 Sizlerdiń mártebeli bolıwıńız ushın, men ózimdi pás qoyıp, Qudaydıń Xosh Xabarın sizlerge esheyin járiyaladım. Meniń usılay islegenim gúna ma? 8 Sizlerge xızmet etiw ushın, men basqa iseniwshi jámáátlerden aqshalay járdem alıp, olardı tonaǵanday boldım. 9 Arańızda bolǵan waqtımda mútájligim bolsa da, hesh birińizge awırmanlıq salmadım. Óytkeni Makedoniyadan kelgen tuwısqanlarımız mútájliklerimniń ornın toltırdı. Men sizlerge hesh bir nársede awırmanlıq salmawǵa tırıstım hám bunnan bılay da tırısa beremen. 10 Ózimdegi Masiyxtıń haqıyqatı menen bildiremen: Axaya úlkesindegi hesh bir adam meniń usı maqtanıwımdı toqtata almaydı. 11 Men ne sebepten usılay islep atırman? Sizlerdi súymegenim sebepli me? Meniń sizlerdi súyetuǵınımdı Quday biledi.

12 Ózlerin bizlerge teńlestirmekshi bolıp maqtanıp atırǵan sol adamlarǵa jol bermew ushın, men sizlerge awırmanlıq salmadım hám solay islewdi dawam ete beremen. 13 Sebebi jalǵan elshiler hám ótirik jumısshılar bolǵan bunday adamlar ózlerin Masiyxtıń elshileri qılıp kórsetedi. 14 Biraq, bul tań qalarlıq nárse emes. Shaytan da ózin nur perishtesi qılıp kórsetedi-ǵo. 15 Sonlıqtan onıń xızmetshileriniń ózlerin haqıyqattıń xızmetshileri qılıp kórsetiwi de tań qalarlıq nárse emes. Quday aqırında bunday adamlarǵa islegen islerine qaray ılayıqlı jaza beredi.

Paveldiń elshi sıpatında kórgen qıyınshılıqları

16 Men jáne tákirarlap aytaman: hesh kim meni aqılsız dep sanamasın. Eger sizler aqılsız dep sanasańız, meni hesh bolmasa aqılsız adam sıpatında qabıl etińler, sonda men de az-maz maqtanayın. 17 Sóylep atırǵan sózlerimdi Iyemizdiń basqarıwında aytıp atırǵan joqpan, al ózine isenetuǵın aqılsız maqtanshaqtay bolıp aytıp atırman. 18 Kópler ózleri menen dúnyanıń kóz qarası boyınsha maqtanǵanlıqtan, men de maqtanajaqpan. 19 Sizler ózlerińizdi sonday aqıllımız dep sanap turıp, aqılsızlarǵa jan-jan dep shıdaysızlar! 20 Birew sizlerdi qul qılsa da, haqıńızdı jese de, talasa da, ózin sizlerden joqarı tutıp, ústemlik etse de yamasa betińizge shapalaq penen ursa da shıdaysızlar. 21 Biraq, sizlerdiń oyıńız boyınsha hálsiz bolıp esaplanǵan bizler bunday islerdi islewge uyalamız!

Degen menen, birewdiń ne menen bolsa da maqtanıwǵa batılı jetse, meniń de maqtanıwǵa batılım jetedi. Men bunı aqılsız adam sıyaqlı aytıp atırman. 22 Sol jalǵan elshiler evreymiz dey me? Men de evreymen. Olar izraillılarmız dey me? Men de izraillıman. Olar Ibrayımnıń urpaǵımız dey me? Men de Ibrayımnıń urpaǵıman. 23 Olar Masiyxtıń xızmetkerlerimiz dey me? Aqıldan azǵan adam sıyaqlı aytıp atırman: men Masiyxqa olardan góre kóbirek xızmet ettim. Men olarǵa qaraǵanda kóbirek miynet ettim, kóp mártebe qamaqta boldım, sansız ret tayaq jedim hám talay mártebe ólim menen júzbe-júz ushırastım. 24 Yahudiylerden bir kem qırıqtan, bes ret qamshı jedim. 25 Úsh mártebe tayaq jedim. Bir mártebe tas boran qıldı ^{▼▼ Elsh 14:19-20.}. Úsh mártebe kemede apatqa ushırap, bir kún, bir tún teńizde ıǵıp júrdim. 26 Kóp mártebe saparǵa shıqqanımda, qáwip astında boldım: dáryalardıń tasıwı sebepli, qaraqshılar sebepli, óz milletimniń adamları sebepli hám basqa millet adamları sebepli, jáne qalada, shólde, teńizde hám jalǵan tuwısqanlar sebepli qáwip-qáterge ushıradım. 27 Awır miynet etip, qıyınshılıq kórdim. Kóp túnlerdi uyqısız ótkizdim, ashlıq hám shóldi basımnan keshirdim. Talay mártebe awqatsız qalıp, suwıqta kiyimsiz boldım. 28 Bulardıń hámmesinen tısqarı, kún sayın barlıq iseniwshi jámáátlerdiń ǵam-táshiwishleri eńsemdi basıp, meni oylandıradı. 29 Qaysı dármansızlar menen, men birge dármansızlanbadım? Qaysı azǵırılǵan adam ushın, men kúyip-janbadım?

30 Sizler meni maqtanıwǵa májbúr etkenińiz sebepli, men hálsizligimdi kórsetken nárseler menen maqtanaman. 31 Iyemiz Iysanıń Ákesi, máńgige alǵıslarǵa ılayıq Quday biledi: men ótirik sóylep atırǵan joqpan. 32 Men Damask qalasında bolǵanımda, Aretas patshanıń qol astındaǵı bir hákim qala dárwazasın qarawıllatıp, meni qolǵa almaqshı boldı. 33 Biraq, iseniwshi tuwısqanlarımız meni sebetke salıp, qala diywalındaǵı terezeden túsirip jiberdi hám men usılay etip onıń qolınan qashıp qutıldım ^{▼▼ Elsh 9:23-25.}.