2Cor 12 | KaaIBT22L | STEP | Maqtanıwdıń hesh qanday paydası joq bolsa da, endi men Iyemiz kórsetken kórinisler hám ayanlar haqqında aytpaqshıman.

‏ 2 Corinthians 12

Qudaydıń Pavelge kórsetken kórinisleri hám ayanları

1 Maqtanıwdıń hesh qanday paydası joq bolsa da, endi men Iyemiz kórsetken kórinisler hám ayanlar haqqında aytpaqshıman. 2 Men Masiyxqa isenetuǵın bir adamdı tanıyman. Ol bunnan on tórt jıl burın úshinshi aspanǵa kóterilip áketilgen edi. Ol sol waqıtta denede boldı ma yamasa deneden shıǵıp ruwxta boldı ma, men bunı bilmeymen, Quday biledi. 3 – 4 Bul adam haqqında mınanı bilemen: ol jánnetke alıp ketildi. Ol sol jerde aytıp jetkiziw múmkin bolmaǵan hám adam balasına aytıwǵa ruxsat etilmegen sózlerdi esitti. Biraq, ol denede boldı ma yamasa deneden shıǵıp, ruwxta boldı ma bilmeymen, bunı Quday biledi. 5 Men usınday adam menen maqtanaman. Biraq, ózime kelsem, tek ózimdegi hálsizlikten basqa hesh nársem menen maqtanbayman. 6 Maqtanıwdı qálegen jaǵdayımda da men aqılsız bolmayman. Óytkeni men haqıyqattı aytıp atırman. Biraq, hesh kim men tuwralı hádden tıs joqarı pikirge iye bolmay, meni tek mennen esitkenleri yamasa kórgenleri boyınsha bahalawı ushın, men ózimdi maqtanıwdan tıyıp atırman.

7 Qudaydıń maǵan bergen ájayıp ayanları sebepli ózimdi joqarı tutpawım ushın, Ol deneme bir tiken, yaǵnıy meni qıynaytuǵın shaytannıń bir perishtesin berip, meni menmenlikten saqlap kiyatır. 8 Bunı mennen alıp taslawdı sorap, Iyemizge úsh mártebe jalbarınǵan edim. 9 Biraq, Iyemiz maǵan: «Saǵan bergen miyrimim jeterli. Sebebi Meniń qúdiretim hálsizlik arqalı tolıq kórsetiledi», – dedi. Sonlıqtan Masiyxtıń qúdireti mende bolsın dep, men hálsizliklerime ele de kóbirek quwanıp, olar menen maqtana beremen. 10 Sol sebepten Masiyx ushın hálsizliklerge, masqaralanıwǵa, mútájliklerge, quwdalanıwǵa hám qıyınshılıqlarǵa ushıraǵanımda, men quwanıshlıman. Óytkeni men qashan hálsiz bolsam, sonda kúshlimen.

Paveldiń Korinftegi iseniwshiler jámáátine degen ǵamxorlıǵı

11 Men maqtanıp, aqılsız adam bolıp kórindim. Biraq meni buǵan sizler májbúr ettińiz. Negizinde meni sizler maqtawıńız kerek edi. Sebebi men hesh kim bolmasam da, sizler «mártebeli elshiler» dep ataytuǵın sol adamlardan hesh qanday kemshiligim joq. 12 Meniń Qudaydıń haqıyqıy elshisi ekenimdi dálilleytuǵın kóp belgiler, tań qalarlıq isler hám káramatlar sizlerdiń arańızda kúshli sabırlılıq penen kórsetildi. 13 Sizlerden aqshalay járdem sorap, óz awırmanlıǵımdı salmaǵanım sebepli, basqa iseniwshi jámáátlerden sizlerdi kem kórgendey boldım ba? Eger meni qáte isledi dep oylasańız, meni keshiriń!

14 Minekey, men sizlerge úshinshi mártebe barıwǵa tayarman. Biraq, men sizlerge awırmanlıq salmayman. Maǵan sizlerdiń mal-múlkińiz emes, al sizlerdiń ózlerińiz kereksiz. Óytkeni balalar ata-anası ushın emes, al ata-ana balaları ushın mal-múlik jıynawı tiyis. 15 Sol sıyaqlı men de sizler ushın ózimde bar hámme nárseni, hátte, óz janımdı da beriwge quwanıshlı túrde tayarman. Men sizlerdi sonshelli súysem de, sizlerdiń meni azıraq súyiwińiz durıs bolmaydı. 16 Meniń sizlerge awırmanlıq salmaǵanımdı sizler de tastıyıqlaysızlar. Biraq, geybir adamlardıń aytıwı boyınsha, men hiyleker adam bolǵanım sebepli, sizlerdi aldaw jolı menen qolǵa kirgizgen qusayman. 17 Degen menen, ózim sizlerge jibergen adamlardıń biri arqalı bolsa da, sizlerdiń esabıńızdan paydalandım ba? 18 Men Titustan sizlerge barıwdı ótinip, onıń menen birge basqa bir tuwısqanımızdı da jibergen edim. Titus sizlerdiń esabıńızdan paydalanǵan ba edi? Álbette, yaq. Sebebi bizler bir ruwx penen is-háreket etip, bir jol menen júremiz.

19 Bizlerdi usı waqıtqa deyin aldıńızda aqlanıp kiyatır dep oylap atırsız ba? Yaq, olay emes. Bizler Masiyxqa tiyisli adamlar sıpatında Quday aldında sóylep turmız. Súyikli tuwısqanlarım, bizler ne isleytuǵın bolsaq ta, hár bir nárseni sizlerdiń ruwxıy bekkemleniwińiz ushın isleymiz. 20 Óytkeni men sizlerge barǵan waqtımda, sizlerdi ózim qálemegen awhalda kóremen be hám sizler de meni ózlerińiz kútpegen awhalda kóresiz be degen qáweterdemen. Sizlerge barǵanımda, arańızda jánjel, kúnshillik, ǵázep, daw, jala, ósek, menmenlik hám tártipsizlik bar ekenin kóriwden qorqaman. 21 Taǵı da, sizlerge jáne barǵanımda, Qudaydıń meni sizler sebepli uyaltıwınan, burın gúna islep, ózleriniń haramılıǵı, buzıqshılıǵı hám júwensizligi ushın táwbe etpegen kóp adamlar ushın kóz jasımdı tógiwden qorqaman.