2Cor 2 | KaaIBT22L | STEP | Solay etip, sizlerdi jáne qapa qılmayın dep, sizlerge barmawǵa kewlimde qarar ettim.

‏ 2 Corinthians 2

1 Solay etip, sizlerdi jáne qapa qılmayın dep, sizlerge barmawǵa kewlimde qarar ettim. 2 Óytkeni eger men sizlerdi jáne qapa qılsam, onda meni kim quwantadı? Ózim qapa qılǵan sizlerden basqa, kim kewlimdi kóteredi? Álbette, hesh kim! 3 Sonlıqtan men barǵanımda, quwantıwı kerek bolǵan adamlar meni qapa qılmawı ushın, sol xattı jazıp jibergen edim. Sebebi meniń quwanıshım sizlerdiń hámmeńizdiń quwanıshıńız ekenine isengen edim. 4 Men sol xattı tereń qayǵırıp, júregim ezilip, kóz jaslarımdı tógip otırıp jazdım. Bundaǵı maqsetim – sizlerdi qapa qılıw emes, al sizlerge degen sheksiz súyispenshiligimdi bildiriw edi.

Gúna islegen adamdı keshiriw haqqında

5 Eger arańızda bir adam ^{▼▼ 1Kor 5:1.} basqalardı qapa qılǵan bolsa, ol tek meni emes, al qanday da bir dárejede sizlerdiń hámmeńizdi qapa qılǵan boladı. Men bunı asırıp aytıp atırǵan joqpan. 6 Bul adamǵa kópshilik tárepinen berilgen jaza jeterli boladı. 7 Solay etip, ol hádden tıs qayǵırmawı ushın onı keshirip, jubanısh bergenińiz maqulıraq boladı. 8 Sonlıqtan oǵan degen súyispenshiligińizdi dálillewińizdi ótinish etemen. 9 Hár bir iste sózime qulaq asatuǵınıńızdı yamasa aspaytuǵınıńızdı sınap biliw ushın, men sizlerge sol xattı jazǵan edim. 10 Sizler onı keshirseńiz, onı men de keshiremen. Eger men onı keshirgen bolsam, onı sizler ushın Masiyx aldında keshirdim. 11 Solay etip, shaytannıń awhaldan paydalanıp, pánt beriwine jol qoymayıq. Óytkeni bizler onıń jawız jobalarınan xabarsız emespiz.

12 Men Masiyxtıń Xosh Xabarın járiyalaw ushın Troasqa barǵanımda, Iyemiz maǵan kóp múmkinshilik bergen edi. 13 Degen menen, tuwısqanımız Titustı sol jerde ushırata almaǵanım sebepli, ruwxım tınıshsızlandı. Sonlıqtan sol jerdegiler menen xoshlasıp, Makedoniyaǵa kettim ^{▼▼ 2Kor 7:6.}.

14 Qudayǵa shúkirler bolsın! Ol bizlerdi bárqulla Masiyxtıń jeńisiniń saltanatlı júrisinde jetelep júredi hám bizler arqalı hámme jerde Masiyx haqqında bilimdi xosh iyis sıyaqlı tarqatadı. 15 Sebebi bizler qutqarılıp atırǵanlar arasında da, nabıt bolıp atırǵanlar arasında da, Masiyxtıń Qudayǵa baǵıshlaǵan xosh iyisimiz. 16 Bizler Xosh Xabardı járiyalaǵan waqtımızda, nabıt bolıp atırǵanlar ushın ólimge aparatuǵın ólim iyisimiz. Al qutqarılıp atırǵanlar ushın ómir beretuǵın ómir iyisimiz. Negizinde, bunday xızmetke ılayıqlı hesh kim joq! 17 Óytkeni óz paydası ushın Qudaydıń sózin satıp beretuǵın kóp adamlar bar. Biraq, bizler onday adamlar emespiz. Bizler Quday tárepinen jiberilgen hám Masiyxqa tiyisli bolǵan adamlar sıpatında Xosh Xabardı Quday aldında haq kewil menen járiyalaymız.