2Cor 3 | KaaIBT22L | STEP | Bizlerdi jáne ózlerin maqtap atır, dep oylaysız ba? Ayırım adamlar sıyaqlı, sizlerge kórsetiw ushın yamasa sizlerden alıp basqalarǵa kórsetiw ushın, minezlememiz jazılǵan xatlarǵa mútájbiz be?

‏ 2 Corinthians 3

Jańa kelisimniń xızmetshileri

1 Bizlerdi jáne ózlerin maqtap atır, dep oylaysız ba? Ayırım adamlar sıyaqlı, sizlerge kórsetiw ushın yamasa sizlerden alıp basqalarǵa kórsetiw ushın, minezlememiz jazılǵan xatlarǵa mútájbiz be? 2 Bizlerdiń minezleme xatımız – sizler bolasızlar. Bul xat bizlerdiń júreklerimizde ^{▼▼ bizlerdiń júreklerimizde – Bazı qoljazbalarda «sizlerdiń júreklerińizde».} jazılǵan bolıp, onı barlıq adamlar biledi hám oqıydı. 3 Sizler haqıyqattan da, bizlerdiń xızmetimiz arqalı jazılǵan Masiyxtıń xatı ekenińizdi anıq kórsetesizler. Bul xat sıya menen emes, al tiri Qudaydıń Ruwxı menen jazıldı hám ol tasqa emes, al adamlardıń júreklerine oyıp jazıldı.

4 Bizler Masiyx arqalı Quday aldında usınday isenimge iye bolǵanımız sebepli, bulardı aytıp atırmız. 5 Bizler xızmetimizdi uqıplı bolǵanımız sebepli atqarıp atırmız, demekshi emespen. Bizlerdegi bar uqıp ózimizden shıqpaǵan, al Qudaydan berilgen. 6 Quday bizlerdi jańa kelisimniń xızmetshileri qıldı. Jańa kelisim jazılǵan nızam tiykarında emes, al Muxaddes Ruwx tiykarında payda boldı. Sebebi jazılǵan nızam ólimge húkim etedi, al Muxaddes Ruwx ómir beredi.

7 Tasqa oyıp jazılǵan háriplerden ibarat bolǵan Muxaddes Nızam ullılıq penen berilgenlikten, Izrail xalqı Muwsanıń júzinen shıqqan ótkinshi nurǵa qaray almaǵan edi ^{▼▼ Shıǵ 34:29.}. Ólimge húkim etetuǵın Muxaddes Nızamǵa xızmet etiw sonshelli ullı bolsa, 8 onda ómir beretuǵın Muxaddes Ruwxqa xızmet etiw onnan anaǵurlım kóp ullılıqqa iye emes pe? 9 Adamdı húkim etken Muxaddes Nızamǵa xızmet etiw ullı bolǵan bolsa, aqlanıw beretuǵın jańa kelisimge xızmet etiw onnan góre qanshelli ullıraq boladı! 10 Haqıyqattan da, joqarı ullılıqqa iye bolǵan jańa kelisim payda bolǵanda, burın ullılıqqa iye bolǵan Muxaddes Nızam óz ullılıǵın joyttı. 11 Solay etip, ótkinshi bolǵan nárse ullı bolsa, máńgi qalatuǵın nárse onnan da ullıraq.

12 Usınday úmitke iye bolǵanımız sebepli úlken batırlıq penen sóyley alamız. 13 Bizler júzindegi óship baratırǵan nurdı Izrail xalqına kórsetpew ushın júzin perde menen japqan Muwsa sıyaqlı is tutpaymız. 14 Biraq, Izrail xalqınıń júregi qaysar bolǵanlıqtan, hátte, usı kúnge deyin olar Eski Kelisimdi oqıǵanda, olardıń sanası sonday perde menen jabıwlı turǵanday boladı. Óytkeni bul perde tek Masiyx arqalı alıp taslanadı. 15 Haqıyqattan da, usı kúnge deyin olar Muwsanıń kitabın oqıǵanda, júrekleri perde menen jabılǵanday bolıp túsinbeydi. 16 Degen menen, adam Iyemizge júz burǵanda, sol perde alıp taslanadı. 17 Iyemiz – Ruwx. Iyemizdiń Ruwxı bar jerde azatlıq bar. 18 Bizlerdiń hámmemiz perdesiz júz benen Iyemizdiń ullılıǵın kóremiz. Sol arqalı Oǵan uqsaw ushın ózgerip, ullılıq ústine ullılıqqa erisip baramız. Bul Ruwx bolǵan Iyemizdiń járdeminde iske asadı.