2Cor 4 | KaaIBT22L | STEP | Sonlıqtan biz xızmetshiler bul xızmetti Qudaydıń miyrim-shápááti menen islep atırǵanımız sebepli, ruwxımızdı túsirmeymiz.

‏ 2 Corinthians 4

Ílay ıdıslardaǵı ǵáziyne

1 Sonlıqtan biz xızmetshiler bul xızmetti Qudaydıń miyrim-shápááti menen islep atırǵanımız sebepli, ruwxımızdı túsirmeymiz. 2 Bizler jasırın hám uyat islerimizdi tasladıq, hiylekerlik penen háreket qılmaymız. Qudaydıń sózin burmalamay, haqıyqattı ashıq aytıwımız arqalı ózimizdi Quday aldında hár bir adamnıń hújdanına tapsıramız. 3 Eger bizler járiyalap atırǵan Xosh Xabar jabıq bolsa, ol nabıt bolatuǵınlar ushın jabıq boladı. 4 Isenbeytuǵın bunday adamlar Xosh Xabardıń jaqtısın kórmesin dep, bul dúnyanıń hákimi – shaytan olardıń júrek kózlerin soqır etken. Xosh Xabar Qudaydıń qanday ekenin kórsetken Masiyxtıń dańqın bildiredi. 5 Bizler ózlerimiz haqqında járiyalap atırǵan joqpız. Al Masiyx Iysanı hámmemizdiń Iyemiz dep, Iysa ushın sizlerdiń xızmetshilerińiz ekenligimiz haqqında járiyalap atırmız. 6 Sebebi «Qarańǵılıqtan nur jarqırasın», ^{▼▼ Jar 1:3.} – dep buyırǵan Quday Masiyxtıń júzinde jarqıraǵan Óziniń dańqın biliwimiz ushın júreklerimizdi jaqtı qıldı.

7 Biz elshiler usı ǵáziyneni ılay ıdıs sıyaqlı bolǵan denemizde alıp júrmiz. Bul ullı qúdirettiń bizlerden emes, al Qudaydan ekenligi kórinip tur. 8 Bizler hár tárepleme qısqıdamız, biraq ezilmeymiz. Albıraymız, biraq úmitsizlikke berilmeymiz. 9 Quwdalanamız, biraq Quday bizlerdi taslap ketpeydi. Bizlerdi jıǵıltadı, biraq joq bolıp ketpeymiz. 10 Iysanıń ómiri denemizde ashıq kórinsin dep, bizler bárqulla azap shegip, Iysanıń ólimine sherik bolamız. 11 Óytkeni Iysanıń ómiri biziń óletuǵın denemizde ashıq kórinsin dep, jasap atırǵan bizler Iysa ushın ólim qáwpine úzliksiz duwshar bolıp atırmız. 12 Solay etip, bizlerdiń ólim qáwpine duwshar bolıp atırǵanımız arqalı sizler máńgilik ómirge erisip atırsızlar.

13 Zaburda: «Men isendim hám sonıń ushın sóyledim», ^{▼▼ Zab 115:1.} – dep jazılǵan. Usınday isenimdi payda etken Muxaddes Ruwxqa iye bolǵanımız sebepli, bizler de isenemiz hám sonlıqtan sóyleymiz. 14 Sebebi Iyemiz Iysanı ólimnen tiriltken Qudaydıń bizlerdi de Iysa menen birge tiriltetuǵının hám sizler menen birlikte Óziniń aldında turǵızıp qoyatuǵının bilemiz. 15 Bulardıń hámmesi sizlerdiń paydańız ushın bolıp atır. Solay etip, bizlerdiń basımızdan keshirgen qıyınshılıqlarımız sebepli, Qudaydıń sizlerge degen miyrimi artadı. Sol miyrim ele de kóp adamlarǵa jetip barıwı arqalı Qudayǵa kóp shúkirlikler aytıladı hám Ol dańqqa bólenedi.

Ótkinshi qıyınshılıqlar hám máńgilik dańq

16 Sonlıqtan ruwxımızdı túsirmeymiz. Bizlerdiń kórinetuǵın denemiz tozıp baratırǵan bolsa da, ishki dúnyamız kúnnen-kúnge jańalanıp atır. 17 Óytkeni házirgi ótkinshi hám arzımas qıyınshılıqlarımız bizlerge hádden tıs ullı hám máńgilik dańq alıp keledi. 18 Bizler kózge kórinetuǵın qıyınshılıqlarǵa emes, al kózge kórinbeytuǵın ullılıqqa qaraymız. Sebebi kózge kórinetuǵın nárseler ótkinshi, al kózge kórinbeytuǵın nárseler máńgi boladı.