2Cor 5 | KaaIBT22L | STEP | Bizler ishinde jasap atırǵan dúnyadaǵı bul shatırımız, yaǵnıy denemiz qıyralǵanda, Quday bizlerge adamnıń qolı menen qurılmaǵan aspandaǵı máńgilik úyimizdi, yaǵnıy jańa deneni beretuǵının bilemiz.

‏ 2 Corinthians 5

1 Bizler ishinde jasap atırǵan dúnyadaǵı bul shatırımız, yaǵnıy denemiz qıyralǵanda, Quday bizlerge adamnıń qolı menen qurılmaǵan aspandaǵı máńgilik úyimizdi, yaǵnıy jańa deneni beretuǵının bilemiz. 2 Aspandaǵı úyimizdi, yaǵnıy jańa denemizdi kiyim sıyaqlı kiyiwdi qattı kúsep, házir bizler dúnyadaǵı shatırımızda, yaǵnıy denemizde «ah» urmaqtamız. 3 Onı kiysek, bizler jalańash qalmaymız. 4 Bizler dúnyadaǵı shatırımızda, yaǵnıy denemizde jasap júrip, awır júk astında qıynalmaqtamız. Negizinde dúnyadaǵı denemizdi sheship taslawdı emes, al onıń ústinen aspandaǵı denemizdi kiyiwdi qáleymiz. Solay etip, óletuǵın dene máńgilik ómir tárepinen jutıp jiberiledi. 5 Bizlerdi usı ushın tayarlaǵan hám bunıń kepili sıpatında bizlerge Muxaddes Ruwxtı bergen Qudaydıń Ózi boladı.

6 Sonlıqtan denede jasap atırǵan waqtımızda Iyemizdiń aspandaǵı mákanınan uzaqta ekenimizdi bilsek te, bizler bárqulla batırlıqqa iyemiz. 7 Óytkeni bizler kózge kórinetuǵın nárselerge emes, al isenimimizge súyenip jasaymız. 8 Awa, batırlıqqa iyemiz hám deneden shıǵıp, Iyemiz benen birge jasaǵanımız jaqsıraq dep oylaymız. 9 Biraq denede jasasaq ta, deneden shıǵıp ketsek te, bizler Iyemizdiń kewlinen shıǵıwǵa qattı tırısamız. 10 Sebebi denede jasaǵan waqtımızda islegen jaqsı isimiz ushın da, jaman isimiz ushın da ılayıqlı baha alıw ushın, hár birimiz Masiyxtıń húkim gúrsisiniń aldında turıwımız kerek.

Jarastırıwshılıq xızmeti

11 Solay etip, bizler Iyemizden qorqıwdıń ne ekenin bilgenimiz sebepli, adamlardı aqıllandırıwǵa háreket etemiz. Bizlerdiń qanday ekenligimiz Qudayǵa ayan. Bizlerdiń qanday ekenligimizdi sizler de jaqsı biletuǵınıńızdan úmit etemen. 12 Bizler jáne sizlerge ózlerimizdi usınıwǵa háreket etip atırǵan joqpız. Biraq ishki dúnyası menen emes, al sırtqı kórinisi menen maqtanatuǵın adamlarǵa ılayıqlı juwap beriwińiz ushın, sizlerge bizler menen maqtanıwǵa múmkinshilik berip atırmız. 13 Eger bizler ruwxıy ózgeshe awhalda bolsaq, onda bul Quday ushın. Eger ápiwayı awhalda bolsaq, onda bul sizler ushın. 14 Usılay islewge bizlerdi Masiyxtıń súyispenshiligi májbúr etedi. Óytkeni bir Adam, yaǵnıy Masiyx hámme ushın ólgenlikten, hámme Onıń ólimine sherik bolǵan boladı, degen juwmaqqa keldik. 15 Awa, Masiyx hámme ushın óldi. Solay eken, jasap atırǵanlar endi ózleri ushın emes, al ózleri ushın ólgen hám qayta tirilgen Masiyx ushın jasawı shárt.

16 Sonlıqtan bizler endi hesh kimge dúnyanıń kóz qarası menen qaramaymız. Masiyxqa burın usılay qaraǵan bolsaq ta, endi olay qaramaymız. 17 Solay etip, kim de kim Masiyx penen baylanısqa iye bolsa, ol – jańa jaratılıs. Eski nárseler ótip ketti, minekey, endi hámmesi jańa boldı. 18 Bunıń hámmesi Qudaydan. Quday Masiyx arqalı bizlerdi Ózi menen jarastırdı hám adamlardı Ózi menen jarastırıw xızmetin bizlerge tapsırdı. 19 Yaǵnıy, Quday Masiyx arqalı dúnyanı Ózi menen jarastırıp, adamlardıń gúnaların esapqa almadı hám usı jarastırıwshı sózlerdi bizlerge berdi. 20 Solay etip, bizler Masiyxtıń elshilerimiz. Qudaydıń Ózi bizler arqalı sizlerge aqıl-násiyat berip atır. Masiyxtıń atınan jalbarınamız: Quday menen jarasıńlar! 21 Quday bizlerdiń gúnalarımızdı hesh qashan gúna islemegen Masiyxqa júkledi. Masiyx penen baylanısqa iye bolǵan bizler Quday aldında usı arqalı aqlandıq.