2Cor 6 | KaaIBT22L | STEP | Quday menen birge miynet etip atırǵan bizler sizlerden ótinish etemiz: ózlerińiz qabıl qılǵan Onıń miyrimine itibarsızlıq penen qaramań.

‏ 2 Corinthians 6

1 Quday menen birge miynet etip atırǵan bizler sizlerden ótinish etemiz: ózlerińiz qabıl qılǵan Onıń miyrimine itibarsızlıq penen qaramań. 2 Sebebi Quday bılay deydi: «Miyrimim túsken waqıtta seni esittim,
Qutqarılıw kúninde saǵan járdem berdim». ^{▼▼ Iysh 49:8.}

Minekey, házir Qudaydıń miyrimi beriletuǵın waqıt boldı! Minekey, házir qutqarılıw kúni keldi!

Pavel kórgen qıyınshılıqlar

3 Xızmetimizge sóz kelmesin dep, hesh kimge hesh bir nársede tosqınlıq jasamaymız. 4 Al hámme nársede Qudaydıń xızmetkerleri sıpatında is tutamız: qıyınshılıq kórsek te, mútájlikte hám awır jaǵdaylarda qalsaq ta, sheksiz sabırlı boldıq. 5 Jáne de, tayaq jedik, qamaqta otırdıq, topalań ishinde qaldıq, awır miynet ettik, túnlerdi uyqısız ótkizdik, ash qaldıq. 6 Solay bolsa da, bizler pák boldıq, durıs túsinik, shıdamlılıq, keń kewil, Muxaddes Ruwx hám haqıyqıy súyispenshilik penen jasadıq. 7 Haqıyqat sózin aytıp, Qudaydıń qúdiretin kórsettik. Oń hám shep qolımızda haqlıq quralın uslap júrdik. 8 Bizlerdi húrmet te etedi, masqaralaydı da, bizlerge sógis te aytadı, maqtaydı da. Bizlerdi ótirikshiler dep esaplaydı, biraq bizler haqıyqattı aytamız. 9 Bizlerdi belgisiz adamlar dep sanaydı, biraq hámmege belgilimiz. Bizlerdi ólgen dep esaplaydı, biraq, mine, tirimiz. Jazalanıp tayaq jesek te, ólmey atırmız. 10 Bizlerdi qapa qıladı, biraq bizler bárqulla quwanıshlımız. Jarlımız, biraq kóp adamlardı bayıtamız. Hesh nársemiz bolmasa da, hámme nársege iyemiz.

11 Háy korinfliler, bizler sizlerge ashıq sóylep, júregimizdi keń ashtıq. 12 Sizlerden miyrimimizdi ayamadıq, biraq sizler bizlerden óz miyrimińizdi ayadıńız. 13 Sizlerge balalarıma sóylegendey, sóylep atırman: bizler sıyaqlı, sizler de bizlerge júreklerińizdi keń ashıńlar.

Bizler – Qudaydıń ibadatxanasımız

14 Isenbeytuǵınlar menen birge bir moyıntırıqtıń astına kirmeńler. Óytkeni haqlıq penen nızamsızlıqtıń arasında qanday uqsaslıq bar? Nur menen qarańǵılıqtıń arasında qanday baylanıs bar? 15 Masiyx penen shaytannıń arasında qanday kelisim hám isenetuǵın adam menen isenbeytuǵın adamnıń arasında qanday sheriklik bolıwı múmkin? 16 Qudaydıń ibadatxanası menen butlar arasında qanday birlik bolıwı múmkin? Hesh qanday! Sebebi bizler tiri Qudaydıń ibadatxanasımız. Quday bılay deydi: «Men olar arasında jasap,
Olar arasında júretuǵın bolaman». ^{▼▼ Leb 26:11-12; Ezk 37:27.}
«Men olardıń Qudayı bolaman,
Olar Meniń xalqım boladı». ^{▼▼ Erm 31:1; 32:38.}

17 Sol sebepten Jaratqan Iye bılay deydi: «Olardıń arasınan shıǵıp, bólekleniń.
Haram nársege qol tiygizbeń,
Sonda Men sizlerdi qabıl etemen». ^{▼▼ Iysh 52:11; Ezk 20:34, 41.}

18 Jáne de, Qúdireti kúshli Jaratqan Iye bılay deydi: «Men sizlerge Áke bolaman,
Sizler Meniń ul-qızlarım bolasızlar». ^{▼▼ 2Pat 7:8, 14.}