2Cor 7 | KaaIBT22L | STEP | Solay etip, súyikli tuwısqanlarım, usınday wádelerge iye bolǵanımız sebepli, denemizdi hám ruwxımızdı iplaslaytuǵın hár bir nárseden ózlerimizdi tazalayıq. Qudaydan qorqıp jasap, minsiz muxaddeslikke jetilisip barayıq.

‏ 2 Corinthians 7

1 Solay etip, súyikli tuwısqanlarım, usınday wádelerge iye bolǵanımız sebepli, denemizdi hám ruwxımızdı iplaslaytuǵın hár bir nárseden ózlerimizdi tazalayıq. Qudaydan qorqıp jasap, minsiz muxaddeslikke jetilisip barayıq.

Korinftegi jámáát ushın Paveldiń quwanıwı

2 Bizlerge júreklerińizdi keń ashıńlar. Bizler hesh kimge jamanlıq islemedik, hesh kimdi joldan azǵırmadıq, hesh kimdi aldap, haqısın jemedik. 3 Bunı sizlerdi ayıplaw ushın aytıp atırǵan joqpan. Óytkeni burın aytqanımday, sizler bizlerdiń júregimizdesiz. Sizler menen birge óliwge de, jasawǵa da qayılmız. 4 Meniń sizlerge degen isenimim kúshli hám men sizler menen kóp maqtanaman. Qıyınshılıqlarımız kóp bolsa da, men sizler sebepli sheksiz quwanısh alıp, jubanıshqa bólendim.

5 Bizler Makedoniyaǵa kelgenimizden keyin de denemiz hesh tınısh tappay, hár tárepleme qıyınshılıq kórdik: sırtta jánjel, júregimizde qorqınısh bar edi. 6 Biraq, ruwxı túsken adamlarǵa jubanısh beriwshi Quday Titustıń sizler betten qaytıp kelgeni arqalı bizlerge jubanısh berdi. 7 Bizler tek onıń qaytıp kelgeni arqalı emes, al sizlerdiń oǵan bergen jubanıshıńız arqalı da jubanısh aldıq. Titus bizlerge sizlerdiń meni qanshelli saǵınǵanıńızdı, qılǵan is-háreketlerińiz sebepli ókinip atırǵanıńızdı hám meni jaqlawǵa urınıp atırǵanıńızdı aytıp bergende, men onnan beter quwanıp kettim.

8 Men jazǵan xatım menen sizlerdi qapa qılǵan bolsam da, ókinbeymen. Sol xatımnıń sizlerdi az-maz waqıtqa qapa qılǵanın bilgenimde, men ókingen edim. 9 Biraq, endi quwanıp atırman. Men sizlerdiń qapa bolǵanıńızǵa emes, al bul qapashılıqtıń sizlerdi táwbege ákelgenine quwanıp atırman. Bul qapashılıq Qudaydıń qálewi boyınsha bolǵanlıqtan, sizler bizler sebepli hesh qanday zıyan kórmedińler. 10 Sebebi Qudaydıń qálewi menen berilgen qapashılıq adamdı táwbege alıp keledi hám adam bul arqalı qutqarılıw aladı. Bunday qapashılıq ókiniw alıp kelmeydi. Biraq, dúnyanıń qapashılıǵı ólimge alıp baradı. 11 Qarańlar, Qudaydıń qálewi menen bolǵan bul qapashılıq sizlerde qanshelli inta, óz pákligińizdi dálillewge qattı umtılıw, nahaqlıqqa degen kúshli ǵázep, qanshelli qorqınısh, maǵan degen sonshelli saǵınısh, qanshelli talpınıw hám ayıpker adamdı jazalawǵa kúshli tilek oyattı. Sizler sol iste ^{▼▼ 1Kor 5:1.} ózlerińizdiń hár tárepleme pák ekenińizdi kórsettińiz. 12 Sizlerge bunnan aldınǵı xattı jazǵanımda, nahaqlıq islegen adam yamasa nahaqlıqtan jábir kórgen adam sebepli jazǵan joqpan. Al, sizlerdiń bizlerge degen ıqlasıńızdıń Quday aldında ayan bolıwı ushın jazǵan edim. 13 Bizler bulardıń hámmesi arqalı jubanısh taptıq.

Jubanıshımızǵa qosımsha Titustıń quwanıshı bizlerdi onnan da kóbirek quwandırdı. Óytkeni sizlerdiń hámmeńiz onıń ruwxın kóteripsiz. 14 Men sizlerdi onıń aldında maqtaǵan edim, sizler meni uyatqa qaldırmadıńlar. Sizlerge aytqan hár bir sózimiz haqıyqat bolǵanı sıyaqlı, sizlerdi Titusqa aytıp maqtaǵan sózlerimiz de haqıyqat bolıp shıqtı. 15 Ol hámmeńizdiń sózge boysınatuǵınıńızdı, ózin húrmet hám izzet penen qabıl alǵanıńızdı eske alıp, onıń sizlerge degen súyispenshiligi jáne de artıp atır. 16 Solay etip, men sizlerge hár bir iste isene alatuǵınım sebepli quwanaman.