2Cor 8 | KaaIBT22L | STEP | Tuwısqanlar, bizler sizlerge Qudaydıń Makedoniyadaǵı iseniwshi jámáátlerge bergen miyrimi haqqında bildirgimiz keledi.

‏ 2 Corinthians 8

Saqıylıq penen sadaqa beriw haqqında

1 Tuwısqanlar, bizler sizlerge Qudaydıń Makedoniyadaǵı iseniwshi jámáátlerge bergen miyrimi haqqında bildirgimiz keledi. 2 Olar awır qıyınshılıqlar menen sınalǵan bolsa da, quwanıshqa toldı, júdá kámbaǵal bolsa da, sheksiz saqıylıq kórsetti. 3 Jaǵdayları kótergenshe, hátte, jaǵdaylarınan artıq dárejede olardıń óz qálewi menen saqıylıq kórsetkenine men ózim gúwalıq beremen. 4 Olar Yahudiyadaǵı muxaddeslerge beriletuǵın járdemge, yaǵnıy usı qayırlı iske qatnasıwdı ótinish etip, bizlerge jalbarınǵan edi. 5 Olar bizler úmit etkenimizden de zıyat berip, Qudaydıń qálewi menen ózlerin birinshiden Iyemizge, sońınan bizlerge baǵıshladı.

6 Sonlıqtan burın sizlerdiń arańızda bul qayırlı isti baslaǵan Titustan onı juwmaqlawın ótindik. 7 Sizler Masiyxqa degen isenimde, Qudaydıń sózin sóylewde, haqıyqattı biliwde, inta menen xızmet etiwde, bizlerge degen súyispenshilikte ^{▼▼ bizlerge degen súyispenshilikte – Bazı qoljazbalarda «bizlerdiń sizlerge degen súyispenshiligimizde».}, ulıwma hámme nársede ústinsiz. Sol sıyaqlı, bul qayırlı iste de sizlerdiń ústin bolıwıńızdı qáleymiz.

8 Bunı buyrıq retinde aytıp atırǵan joqpan. Al, basqa jámáátlerdiń intası haqqında aytıp, sizlerdiń súyispenshiligińizdiń haqıyqıylıǵın sınap kórip atırman. 9 Sebebi sizler Iyemiz Iysa Masiyxtıń miyrimin bilesizler: Ol Ózi bay bola tura, sizler ushın bul dúnyada jarlı boldı. Onıń jarlılıǵı menen sizler ruwxıy baylıqqa iye boldıńız.

10 Bul boyınsha men sizlerge bir paydalı keńes beremen. Sizler ótken jılı óz qálewińiz benen járdem aqshanı jıynawdı birinshi bolıp baslaǵan edińler. 11 Endi sol isti aqırına deyin jetkizgenińiz maqul. Solay etip, basta qanday inta menen baslaǵan bolsańız, sonday inta menen juwmaqlawǵa qollarıńızdan kelgenshe tırısıwıńız tiyis. 12 Eger sizler ózlerińizde bar nárseni inta menen berseńiz, Quday onı ırzashılıq penen qabıl etedi. Biraq, Ol sizlerde joq nárseni talap etpeydi. 13 Basqalardıń awhalın jeńilletiw ushın sizlerge awırmanlıq salıw kerek, demekshi emespen. Al teńlik bolıwı kerek, demekshimen. 14 Házirgi sizlerdegi molshılıq olardıń jetpey turǵan nársesin tolıqtıradı. Al sońınan olardaǵı molshılıq sizlerdegi jetpey turǵan nárseni tolıqtıradı. Solay etip, teńlik boladı. 15 Muxaddes Jazıwda: «Kóp jıynaǵannıń artıǵı, az jıynaǵannıń kemisi bolmadı», ^{▼▼ Shıǵ 16:18.} – dep aytılǵanday boladı.

Titus hám eki tuwısqan

16 Meniń kewlimdegi sizlerge degen intanı Titustıń da kewline salǵan Qudayǵa shúkirler bolsın! 17 Óytkeni ol tek bizlerdiń ótinishimiz boyınsha emes, al ózinde sizlerge degen tereń inta bolǵanlıqtan, óz qálewi menen sizlerge baratır. 18 Onıń menen birge bir tuwısqanımızdı da jiberip atırmız. Ol Xosh Xabardı járiyalaw boyınsha barlıq iseniwshi jámáátler tárepinen maqtawǵa erisken adam. 19 Bunıń ústine, bul tuwısqanımızdı bizler islep atırǵan usı qayırlı xızmette joldas bolsın dep, iseniwshi jámáátler saylap qoyǵan edi. Bizler Iyemizdiń dańqı ushın hám járdem beriwge intalı ekenimizdi kórsetiwimiz ushın usı qayırlı xızmetti islep atırmız. 20 Kóp aqshalar menen baylanıslı bolǵan bul xızmetimizde bizlerdi hesh kim ayıplay almawı ushın, bizler saqlıq penen is tutıp atırmız. 21 Sebebi bizler tek Iyemizdiń názerinde emes, al adamlardıń názerinde de durıs bolǵan nárseni islewge tırısıp atırmız.

22 Bizler olar menen birge jáne bir tuwısqanımızdı da jiberip atırmız. Bul tuwısqanımızdı talay mártebe hám hár túrli jaǵdaylarda sınap, onıń intalı ekenin kórdik. Endi onıń sizlerge degen isenimi kúsheygenlikten, intası da artıp atır. 23 Titusqa kelsek, ol meniń sherigim hám sizler ushın meniń menen birge miynet etetuǵın xızmetshi. Onıń qasındaǵı eki tuwısqanımız – iseniwshi jámáátlerdiń wákilleri hám Masiyxqa dańq keltiretuǵın adamlar. 24 Solay etip, sizler bul adamlarǵa degen súyispenshiligińizdi dálilleńler. Bul arqalı olardı jibergen iseniwshi jámáátlerge bizlerdiń sizler menen maqtanatuǵınımızdıń durıs ekenin kórsetińler.