2Cor 9 | KaaIBT22L | STEP | Yahudiyadaǵı muxaddeslerge jiberiletuǵın bul járdem tuwralı sizlerge jazıwdıń hájeti joq.

‏ 2 Corinthians 9

Mútájlikte jasawshı iseniwshilerge járdem beriw

1 Yahudiyadaǵı muxaddeslerge jiberiletuǵın bul járdem tuwralı sizlerge jazıwdıń hájeti joq. 2 Óytkeni sizlerdiń járdemge tayar ekenligińizdi bilemen. «Axaya úlkesindegiler ótken jıldan beri tayar», – dep men Makedoniyadaǵılar aldında sizler menen maqtanıp júrmen. Sizlerdiń intańız olardıń kóbisin háreketke keltirdi. 3 Bul nársede sizler menen maqtanǵanım bosqa shıqpasın dep hám ózim aytqanımday, sizlerdi tayar tursın dep, usı tuwısqanlarımızdı sizlerge jiberip atırman. 4 Sebebi ayırım makedoniyalılar meniń menen birge sizlerge barıp, sizlerdiń tayar emes ekenligińizdi kórse, sizlerge qattı isengen bizler uyatqa qalamız, sizler de sózsiz uyatqa qalasız. 5 Sonlıqtan men usı tuwısqanlarımızdan ózimnen burın sizlerge barıwdı hám sizlerdiń wáde etken járdemińizdi aldın ala tayarlap qoyıwdı ótinish etkenim durıs dep oyladım. Solay etip, sizler beretuǵın bul járdem májbúriy túrde berilgen salıqtay emes, al ırazılıq penen berilgen sıyday bolsın.

6 Mınanı umıtpańlar: sıqmarlanıp ekken adam az oradı, saqıylıq penen ekken adam kóp oradı. 7 Hár bir adam qıynalıp yamasa májbúriy túrde emes, al kewlinen shıqqanın bersin. Óytkeni Quday ırazı bolıp bergen adamdı súyedi. 8 Jáne de, Quday sizlerdi mol miyrim menen bayıtıwǵa qúdiretli. Solay etip, barlıq waqıtta hámme nárseńiz jeterli bolıp, hár qanday jaqsı iske bay bolasızlar. 9 Sonlıqtan Muxaddes Jazıwda bılay delingen: «Ol mútájlerge saqıylıq penen járdem beredi,
Onıń haqlıǵı máńgi dawam etedi». ^{▼▼ Zab 111:9.}

10 Diyxanǵa sebiw ushın tuqım, jew ushın nan beretuǵın Quday sizlerdiń saqıylıq penen ekken eginińizdiń zúráátin mol qılıp beredi hám haqlıǵıńızdıń jemisin arttıradı. 11 Awa, Quday sizlerdi hár tárepleme bayıtadı. Solay etip, sizler saqıy bolasızlar hám bizler sizlerdiń saqıylıq penen bergen sıylarıńızdı aparǵanımızda, alǵan adamlar Qudayǵa shúkirlik bildiredi. 12 Sizlerdiń bul xızmetińiz tek Yahudiyadaǵı muxaddeslerdiń mútájliklerin qanaatlandırıp qoymay, kóp adamlardıń Qudayǵa sheksiz shúkirlik aytıwına sebep boladı. 13 Sizlerdiń bul xızmetińiz sebepli, olar Qudayǵa alǵıslar aytadı. Sebebi sizlerdiń bul xızmetińiz ózlerińiz tán alǵan Masiyxtıń Xosh Xabarına boysınatuǵınıńızdı, Yahudiyadaǵı muxaddesler hám kóp basqa adamlar menen saqıylıq penen bólisip atırǵanıńızdı dálilleydi. 14 Jáne de, Qudaydıń sizlerge bergen mol miyrimi sebepli, Yahudiyadaǵılar sizlerdi kóriwdi árman etip, sizler ushın duwa etedi. 15 Sóz benen táriyiplep jetkiziw qıyın bolǵan Qudaydıń sıyı, yaǵnıy Onıń Ulı ushın Qudayǵa shúkirler bolsın!