‏ 2 Kings 1

Jaratqan Iyeniń patsha Axaziyanı jazalawı

1Izrail patshası Axabtıń óliminen soń, moablılar Izrailǵa qarsı bas kóterdi.

2Izrail patshası Axaziya Samariyadaǵı sarayınıń joqarǵı bólmesiniń balkonınan jıǵılıp, jaraqatlandı. Sonda ol adamların jiberip, olarǵa: «Filistlerdiń Ekron qalasındaǵı qudayı Baal-Zebubqa barıp, onnan meniń táwir bolatuǵın yaki bolmaytuǵınımdı sorap bilińler», – dedi.

3Biraq Jaratqan Iyeniń perishtesi tishbeli Iliyasqa bılay dedi:

– Barıp, Samariya patshası jibergen adamlardıń aldınan shıǵıp, olarǵa bılay dep ayt: «Ekron qudayı Baal-Zebubtan soraw ushın baratuǵınday, Izrailda Quday joq pa edi? 4Sonlıqtan Jaratqan Iye patshańızǵa bılay deydi: „Jatqan tósegińnen turmay, sózsiz óleseń“».

Solay etip, Iliyas tapsırmanı orınlaw ushın ketti.

5Adamlar patshanıń janına qaytıp keldi. Patsha olardan:

– Nege bunsha tez qaytıp keldińler? – dep soradı.

6Olar patshaǵa bılay dep juwap berdi:

– Bir adam aldımızdan shıǵıp, bizlerge bılay dedi: «Ózlerińizdi jibergen patshaǵa qaytıp barıp, oǵan bılay dep aytıńlar: „Jaratqan Iye bılay deydi: Ekron qudayı Baal-Zebubtan soraw ushın adamlarıńdı jiberetuǵınday, Izrailda Quday joq pa edi? Usı isiń ushın jatqan tósegińnen turmay, sózsiz óleseń“».

7Patsha ózi jibergen adamlardan:

– Sizlerdi qarsı alıp, usı sózlerdi aytqan adamnıń túr-túsi qanday edi? – dep soradı. 8Olar patshaǵa:

– Ol júnnen toqılǵan shapan kiyip, beline teri qayıs baylaǵan edi, – dep juwap berdi.

Patsha:

– Bul tishbeli Iliyas, – dedi.

9Patsha bir eliwbasını eliw áskeri menen birge Iliyastı alıp keliwge jiberdi. Eliwbası bir tóbeshiktiń basında otırǵan Iliyastıń janına barıp, oǵan:

– Háy, Qudaydıń adamı, patsha seni tómenge tússin, – dep atır, – dedi.

10Biraq Iliyas eliwbasıǵa:

– Eger men Qudaydıń adamı bolsam, onda aspannan ot túsip, seni hám eliw adamıńdı jalmap ketsin, – dep juwap berdi. Sonda aspannan ot túsip, eliwbasını hám onıń eliw adamın jalmap ketti.

11Keyin patsha basqa bir eliwbasını eliw áskeri menen Iliyasqa jiberdi. Eliwbası Iliyasqa:

– Háy, Qudaydıń adamı, patsha saǵan: «Tez tómenge tús», – dep atır, – dedi.

12Iliyas oǵan:

– Eger men Qudaydıń adamı bolsam, onda aspannan ot túsip, seni hám eliw adamıńdı jalmap ketsin, – dep juwap berdi. Sonda aspannan Qudaydıń otı túsip, eliwbasını hám onıń eliw adamın jalmap ketti.

13Patsha úshinshi ret bir eliwbasını eliw adamı menen Iliyasqa jiberdi. Bul eliwbası tóbege shıǵıp, Iliyastıń aldında diz shókti hám jalbarınıp bılay dedi:

– Qudaydıń adamı, meniń hám mına eliw qulıńnıń janına rehimińiz kelsin. 14Aspannan ot túsip, mennen aldın kelgen eki eliwbasını hám olardıń hár biriniń eliw adamın jalmap ketken edi. Endi meniń janıma rehimińiz kelsin.

15Sonda Jaratqan Iyeniń perishtesi Iliyasqa:

– Onıń menen birge tómenge tús, onnan qorqpa, – dedi. Iliyas ornınan turıp, eliwbası menen birge patshaǵa ketti. 16Iliyas patshaǵa bılay dedi:

– Jaratqan Iye bılay deydi: «Ekronnıń qudayı Baal-Zebubtan soraw ushın adamlarıńdı jiberetuǵınday, Izrailda Quday joq pa edi? Usılay islegeniń ushın jatqan tósegińnen turmay, sózsiz óleseń».

17Jaratqan Iyeniń Iliyas arqalı aytqan sózi boyınsha, Axaziya óldi. Axaziyanıń ulı bolmaǵanlıqtan, onıń ornına inisi Ioram patsha boldı. Bul waqıya Yahuda patshası Ehoshafat ulı Ehoramnıń patshalıǵınıń ekinshi jılında boldı.

18Axaziya islegen basqa isler Izrail patshalarınıń jılnama kitabında jazılǵan.
Copyright information for KaaIBT22L