‏ 2 Kings 10

Axabtıń úy-ishiniń óltiriliwi

1Samariyada Axabtıń jetpis ulı bar edi. Sol sebepli Ehu xat jazıp, onı Samariyadaǵı Izreel basshılarına, aqsaqallarǵa hám Axabtıń ullarınıń tárbiyashılarına jiberdi. Onda bılay dep jazılǵan edi: 2«Mırzańızdıń ulları sizler menen birge. Sizlerde sawash arbaları, atlar, qural-jaraqlar bar hám sizler qorǵanlı qalada jasaysız. Sonlıqtan bul xat sizlerge jetip barıwdan, 3óz húkimdarıńızdıń ullarınan eń jaqsısın hám eń ılayıqlısın saylap, onı ákesiniń taxtına otırǵızıń hám húkimdarıńızdıń úy-ishi ushın gúresiń».

4Biraq olar qattı qorqıp ketip: «Ehuǵa eki patsha bas kele almaǵanda, bizler qalay bas kele alamız?» – desti.

5Keyin saray basqarıwshısı, qala hákimi, aqsaqallar hám Axabtıń ulların tárbiyalawshılar Ehuǵa mına xabardı jiberdi: «Bizler siziń qullarıńbız, ne buyırsańız, sonı isleymiz. Bizler hesh kimdi patsha etip qoymaymız, ózińizge ne maqul bolsa, sonı isleń».

6Ehu olarǵa ekinshi ret mına mazmunda xat jazdı: «Eger sizler men tárepte bolsańız hám meniń sózime boysınsańız, onda óz húkimdarıńızdıń ullarınıń basın alıp, erteń usı waqıtta Izreelge, meniń aldıma kelińler».

Patshanıń jetpis ulı bolıp, olardı qalanıń húrmetli adamları tárbiyalap atırǵan edi.

7Xat olarǵa jetip kelgende, olar patshanıń jetpis ulın óltirip, basların sebetke saldı hám Izreelge, Ehuǵa jiberdi. 8Xabarshı kelip, Ehuǵa:

– Patshanıń ullarınıń basların alıp keldi, – dep bildirgende, Ehu oǵan:

– Olardı eki úyinshik etip, qala dárwazasınıń kirer awzına qoyıń, azanǵa deyin sol jerde tursın, – dedi.

9Erteńine azanda Ehu sırtqa shıǵıp, pútkil xalıqqa bılay dedi:

– Sizlerdiń ayıbıńız joq. Húkimdarıma qarsı men bas kóterdim hám onı men óltirdim. Al mınalardıń bárin kim óltirdi? 10Endi bilip qoyıńlar, Jaratqan Iyeniń Axabtıń úy-ishine qarsı aytqan sózleriniń birde birewi orınlanbay qalmaydı. Jaratqan Iye Óz qulı Iliyas arqalı aytqanların júzege asırdı.

11Ehu Izreelde Axabtıń úy-ishinen qalǵan adamlardıń hámmesin, wázirlerin, jaqınların, ruwxaniylerin óltirdi. Onıń birde bir adamın tiri qaldırmadı.

Patsha Axaziyanıń jaqınlarınıń óltiriliwi

12Sońınan Ehu Samariyaǵa qaray jolǵa shıqtı. Jolda shopanlarǵa tiyisli bolǵan Beyt-Eked degen jerden ótip baratırıp, 13Yahuda patshası Axaziyanıń tuwısqanların ushırattı. Olardan:

– Sizler kimsizler? – dep soradı. Olar:

– Bizler Axaziyanıń tuwısqanlarımız. Patshanıń hám xanbiyke Izabeldiń ullarınan xabar alıwǵa baratırmız, – dedi.

14Ehu adamlarına:

– Bulardı tiriley uslap alıńlar, – dedi. Olardı tiriley uslap alıp, Beyt-Eked suw saqlaǵıshınıń janında qılıshtan ótkizdi. Olar qırıq eki adam edi. Olardan birde biri aman qalmadı.

Axabtıń basqa jaqınlarınıń óltiriliwi

15Ehu sol jerden ketkennen soń, ózin kútip alıwǵa kiyatırǵan Rexab ulı Ionadabtı ushırattı hám onıń menen sálemlesip atırıp:

– Meniń saǵan degen niyetim qalıs bolǵanı sıyaqlı, seniń de maǵan degen niyetiń qalıs pa? – dedi.

Ionadab oǵan:

– Awa, – dedi.

Ehu:

– Onda qolıńdı ber, – dedi. Ionadab qolın sozdı. Ehu onı arbasına mingizip:

16– Meniń menen birge júr hám meniń Jaratqan Iye ushın qanshelli jan kúydiretuǵınımdı kór, – dedi de, onı arbasına mingizip alıp ketti.

17Sońınan Ehu Samariyaǵa bardı hám Jaratqan Iyeniń Iliyas arqalı aytqan sózleri boyınsha Axabtıń Samariyada qalǵan barlıq adamların túp-tamırı menen joq qıldı.

Baalǵa tabınatuǵınlardıń óltiriliwi

18Ehu pútkil xalıqtı jıynap, olarǵa bılay dedi:

– Axab Baalǵa az xızmet etti, al men oǵan kóbirek xızmet etejaqpan. 19Baaldıń barlıq payǵambarların, ruwxaniylerin hám oǵan tabınatuǵınlardıń hámmesin meniń aldıma shaqırıńlar, hesh kim kelmey qalmasın. Sebebi Baalǵa arnap ullı bir qurbanlıq berejaqpan. Kim de kim kelmey qalsa, ol óltiriledi.

Ehu bul jerde Baalǵa tabınatuǵınlardı joq qılıw ushın hiyle isletken edi. 20Sońınan Ehu:

– Baalǵa arnap saltanatlı jıynalıs qılıń, – dedi.

Jıyın járiyalandı. 21Ehu pútkil Izrailǵa xabarshılar jiberdi hám Baalǵa tabınatuǵınlardıń hámmesi keldi, birde bir adam kelmey qalmadı. Olar Baaldıń butxanasına kirdi, butxana awzına deyin lıqqa toldı. 22Ehu muxaddes kiyimlerdi qorǵaytuǵın adamǵa:

– Baalǵa tabınatuǵınlardıń hámmesine kiyim ákelip ber, – dedi.

Ol olarǵa kiyim ákelip berdi. 23Ehu Rexab ulı Ionadab penen Baaldıń butxanasına kirip, Baalǵa tabınatuǵınlarǵa:

– Átirapıńızǵa jaqsılap qarań, arańızda Jaratqan Iyege sıyınatuǵınlardan hesh kim bolmasın, bul jerde tek Baalǵa tabınatuǵınlar bolsın, – dedi.

24Sońınan Ehu hám Ionadab jandırılatuǵın qurbanlıqtı hám basqa qurbanlıqlardı beriwdi basladı. Ehu butxananıń sırtına seksen adamdı qoyıp, olarǵa bılay dep eskertken edi: «Qolıńızǵa bergen adamlardan birewi qashıp ketse, janıńız benen tóleysiz».

25Jandırılatuǵın qurbanlıq beriw juwmaqlanǵanda, Ehu saqshılarǵa hám áskerbasılarǵa:

– Ishke kirip, olardı óltiriń, birde birewi qashıp ketpesin, – dedi.

Olar hámmeni qılıshtan ótkizip, denelerin sırtqa ılaqtırdı. Keyin Baaldıń butxanasınıń ishki bólmesine kirdi. 26Butxanadan Baalǵa arnalǵan kiyeli taslardı alıp shıǵıp, olardı órtep jiberdi. 27Olar Baalǵa arnalǵan kiyeli tastı da, Baaldıń butxanasın da buzıp tasladı. Xalıq ol jerdi házirgi kúnge shekem hájetxana retinde paydalanıp kelmekte.

28Solay etip, Ehu Izraildaǵı Baalǵa tabınıwshılıqtı joq qıldı. 29Degen menen, ol Nabat ulı Yarobamnıń Izraildı baslaǵan gúnalarınan, yaǵnıy Beyt-El hám Dandaǵı altın tanalarǵa tabınıwdan bas keshpedi.

30Jaratqan Iye Ehuǵa:

– Meniń názerimde tuwrı bolǵan islerdi islegeniń, Axabtıń úy-ishine Meniń júregimde bolǵan hámme nárseni islegeniń ushın, seniń násiliń tórtinshi áwladqa deyin Izrail taxtında otıradı, – dedi.

31Biraq Ehu Izraildıń Qudayı Jaratqan Iyeniń nızamı boyınsha júriwge shın júrekten háreket etpedi. Ol Izraildı gúnaǵa baslaǵan Yarobamnıń gúnalarınan waz keshpedi.

Ehudıń ólimi

32Sol kúnleri Jaratqan Iye Izrail jerlerin bóleklep, qısqarta basladı. Aram patshası Xazael barlıq Izrail aymaqlarında izraillılardı jeńip bardı. 33Ol Iordan dáryasınıń shıǵısındaǵı Gad, Ruben hám Menashshe urıwlarına tiyisli bolǵan pútkil Gilad jerin, Arnon sayınıń boyındaǵı Aroerden Giladqa hám Bashanǵa deyingi jerlerdi basıp aldı.

34Ehudıń qalǵan isleri hám ol islegen barlıq isler, onıń qaharmanlıqları Izrail patshalarınıń jılnama kitabında jazılǵan.

35Ehu ólip, ata-babalarına qosıldı hám onı Samariyaǵa jerledi. Onıń ornına ulı Ehoaxaz patsha boldı. 36Ehu Samariyada Izrail ústinen jigirma segiz jıl patshalıq etken edi.