2Ki 12 | KaaIBT22L | STEP | Izrail patshası Ehudıń patshalıǵınıń jetinshi jılında, Ioash Yahudaǵa patsha boldı hám Erusalimde qırıq jıl patshalıq etti. Onıń anası beer-shebalı bolıp, atı Sibiya edi.

‏ 2 Kings 12

Yahuda patshası Ioashtıń Jaratqan Iyeniń Úyin ońlawı

1 Izrail patshası Ehudıń patshalıǵınıń jetinshi jılında, Ioash Yahudaǵa patsha boldı hám Erusalimde qırıq jıl patshalıq etti. Onıń anası beer-shebalı bolıp, atı Sibiya edi. 2 Ioash ruwxaniy Ehoyadanıń kóziniń tirisinde Jaratqan Iyeniń názerinde tuwrı bolǵan islerdi isledi. Óytkeni ruwxaniy Ehoyada oǵan jol kórsetetuǵın edi. 3 Biraq sıyınıw orınları joq qılınbadı hám xalıq ele sol orınlarda qurbanlıqlar berip, tútetkiler tútetetuǵın edi.

4 Sonda Ioash ruwxaniylerge bılay dedi:

– Jaratqan Iyeniń Úyine arnap alıp kelingen barlıq gúmisti: dizim boyınsha jıynalǵan jan salıǵın hám Jaratqan Iyeniń Úyine wáde boyınsha berilgen yamasa erkli túrde berilgen gúmislerdi toplań. 5 Bul gúmislerdi ruwxaniyler qaznashılardan qabıl etip alsın hám olardı Úydiń buzılǵan jerleri bolsa, sol jerlerdi ońlawǵa sarplasın.

6 Biraq Ioashtıń patshalıǵınıń jigirma úshinshi jılında da ruwxaniyler Úydiń buzılǵan jerlerin ele ońlamaǵan edi. 7 Sonlıqtan patsha Ioash ruwxaniy Ehoyadanı hám basqa ruwxaniylerdi shaqırıp, olarǵa bılay dedi:

– Ne ushın Úydiń buzılǵan jerlerin ońlamay atırsızlar? Endigiden bılay qaznashılardan gúmis almay, olardı Úydiń buzılǵan jerlerin ońlaw ushın berińler.

8 Ruwxaniyler xalıqtan gúmis almawǵa hám Úydiń buzılǵan jerlerin ońlawǵa qatnaspawǵa ırazı boldı. 9 Ruwxaniy Ehoyada bir qutı alıp, onıń qaqpaǵınıń ústin testi de, qutını Jaratqan Iyeniń Úyiniń kirer awzındaǵı qurbanlıq orınnıń oń jaǵına qoydı. Bosaǵadaǵı qadaǵalawshı ruwxaniyler Jaratqan Iyeniń Úyine alıp kelingen hámme gúmislerdi qutıǵa salıp turdı. 10 Qutıǵa kóp gúmis jıyılǵanın kórgende, patshanıń xatkeri menen bas ruwxaniy kelip, Jaratqan Iyeniń Úyine túsken gúmislerdi qaltalap, tárezige tartıp ólshedi. 11 Ólshengen gúmislerdi Jaratqan Iyeniń Úyiniń islerin júrgiziw ushın qoyılǵan adamlarǵa berdi. Olar bul gúmislerdi Jaratqan Iyeniń Úyinde islep atırǵan aǵash ustalarına, qurılısshılarǵa, 12 óriwshilerge hám tas kesiwshilerge tóledi. Jáne de, Jaratqan Iyeniń Úyin ońlaw ushın aǵash, jonılǵan taslar satıp alıwǵa hám ońlaw ushın kerek bolǵan basqa da zatlarǵa sarplandı. 13 Biraq Jaratqan Iyeniń Úyinde jıynalǵan gúmisten Úy ushın gúmis qırmalar, pilik keskishler, qan sebetuǵın tabaqlar, kárnaylar hám altın yamasa gúmis buyımlar islewde jumsalmadı. 14 Sebebi bul gúmisler tek jumısshılarǵa tólenip, Jaratqan Iyeniń Úyin dúzetiwge sarplandı. 15 Jumısshılarǵa tólew ushın gúmis berilgen adamlardan hesh qanday esap talap etilmedi. Sebebi olar hadal isleytuǵın edi. 16 Ayıp hám gúna qurbanlıǵı ushın berilgen gúmisler Jaratqan Iyeniń Úyine alıp kelinbedi, olar ruwxaniylerge tiyisli edi.

17 Sol waqıtta Aram patshası Xazael Gat qalasına hújim jasap, onı basıp aldı. Keyin ol Erusalimge hújim jasawǵa qarar etti. 18 Biraq Yahuda patshası Ioash óz ata-babaları bolǵan Yahuda patshaları Ehoshafattıń, Ehoramnıń, Axaziyanıń hám óziniń Jaratqan Iyege ataǵan muxaddes sıylarınıń hámmesin, Jaratqan Iyeniń Úyinen hám patsha sarayınıń qaznasınan tabılǵan barlıq altınlardı Aram patshası Xazaelge jiberdi. Sonda Xazael de Erusalimnen shegindi.

19 Ioashtıń basqa isleri hám ol islegen barlıq isler Yahuda patshalarınıń jılnama kitabında jazılǵan. 20 Ioashtıń xızmetshileri qozǵalań kóterip, oǵan qarsı til biriktirdi hám onı Sillaǵa baratuǵın jolda, Beyt-Milloda óltirdi. 21 Ioashtı óltirgen xızmetshileri Shimeat ulı Iozabad hám Shomer ulı Ehozabad edi. Ioash ólip, ol Dawıttıń qalasına, ata-babalarınıń janına qoyıldı. Onıń ornına ulı Amasiya patsha boldı.