2Ki 14 | KaaIBT22L | STEP | Izrail patshası Ehoaxazdıń ulı Ehoashtıń patshalıǵınıń ekinshi jılında Yahuda patshası Ioashtıń ulı Amasiya Yahuda taxtına otırdı.

‏ 2 Kings 14

Yahuda patshası Amasiyanıń Izrail patshası Ehoashqa urıs ashıwı

1 Izrail patshası Ehoaxazdıń ulı Ehoashtıń patshalıǵınıń ekinshi jılında Yahuda patshası Ioashtıń ulı Amasiya Yahuda taxtına otırdı. 2 Amasiya patsha bolǵanda, jigirma bes jasında edi, ol Erusalimde jigirma toǵız jıl patshalıq etti. Onıń anası erusalimli bolıp, atı Ehoaddan edi. 3 Amasiya Jaratqan Iyeniń názerinde tuwrı bolǵan islerdi islese de, babası Dawıtqa uqsamadı. Al hár bir iste ol ákesi Ioashtan órnek aldı. 4 Biraq sıyınıw orınları joq qılınbadı hám xalıq ele sol orınlarda qurbanlıqlar berip, tútetkiler tútetetuǵın edi.

5 Amasiya óziniń patshalıq biyligin bekkemlep alǵannan soń, ákesi Ioash patshanı óltirgen xızmetshilerdi óltirdi. 6 Biraq Muwsanıń Nızam kitabında ^{▼▼ Nzm 24:16.} jazılǵanına say is tutıp, jınayatshılardıń balaların óltirmedi. Onda Jaratqan Iye: «Balalar ushın ákeler, ákeler ushın balalar óltirilmesin. Hár bir adam óz gúnası ushın óltirilsin», – dep buyırǵan edi.

7 Amasiya Duz oypatlıǵında on mıń edomlını óltirip, Sela qalasın basıp aldı hám oǵan Ioqteel dep at qoydı. Bul qala házir de sol at penen ataladı.

8 Keyin Amasiya Ehudıń aqlıǵı Ehoaxazdıń ulı Izrail patshası Ehoashqa xabarshılar jiberip: «Kel, jekpe-jek alısayıq», – dep shaqırıq tasladı.

9 Izrail patshası Ehoash ta Yahuda patshası Amasiyaǵa mınaday juwap jiberdi: «Lebanon tawlarındaǵı shat tiken sol jerdegi kedrge: „Qızıńdı meniń ulıma hayallıqqa ber“, – dep xabar jiberipti. Biraq Lebanon tawlarındaǵı bir jabayı haywan sol jerden ótip baratırıp, shat tikendi jenship ketipti. 10 Sen edomlılardı jeńdiń, sonlıqtan kókiregiń álaspanda. Usı jeńisińdi juwıp, úyińde otır. Jánjel baslawdıń ne keregi bar? Ózińniń de, Yahudanıń da basın bálege qaldırajaqsań».

11 Degen menen, Amasiya qulaq aspadı. Izrail patshası Ehoash Yahuda patshası Amasiyaǵa qarsı júris qılıp, olar Yahudanıń Beyt-Shemesh qalasında júzbe-júz keldi. 12 Yahudalılar izraillılar tárepinen qıyratılıp, úylerine qaray qashtı. 13 Izrail patshası Ehoash Axaziyanıń aqlıǵı Ioashtıń ulı Yahuda patshası Amasiyanı Beyt-Shemeshte tutqınǵa aldı. Sońınan Erusalimge kelip, qala diywalınıń Efrayım dárwazasınan Múyesh dárwazasına shekemgi tórt júz shıǵanaq aralıǵın qulatıp tasladı. 14 Ol Jaratqan Iyeniń Úyindegi hám patsha sarayındaǵı qaznadan tabılǵan hámme altın hám gúmislerdi, hámme zatlardı, jáne de, kepilge qoyılatuǵın tutqınlardı alıp Samariyaǵa qaytıp ketti.

15 Ehoashtıń basqa isleri, onıń qaharmanlıqları hám Yahuda patshası Amasiya menen qalay urısqanı Izrail patshalarınıń jılnama kitabında jazılǵan. 16 Ehoash ólip, ata-babalarına qosıldı hám Samariyaǵa, Izrail patshalarınıń janına jerlendi. Onıń ornına ulı Yarobam patsha boldı.

Yahuda patshası Amasiyanıń ólimi

17 Yahuda patshası Ioash ulı Amasiya Izrail patshası Ehoaxaz ulı Ehoashtıń óliminen soń, on bes jıl ómir súrdi. 18 Amasiyanıń basqa isleri Yahuda patshalarınıń jılnama kitabında jazılǵan.

19 Erusalimde Amasiyaǵa qarsı til biriktirilgenlikten, ol Laxishke qashtı. Biraq til biriktiriwshiler Amasiyanıń izinen Laxishke adam jiberip, onı sol jerde óltirtti. 20 Olar Amasiyanıń denesin atqa artıp, Erusalimge alıp keldi hám ol Dawıttıń qalasına, ata-babalarınıń janına jerlendi.

21 Yahuda xalqı on altı jasar Azariyanı ^{▼▼ Azariya – basqa atı Uzziya. 15:13 qarań.} ákesi Amasiyanıń ornına patsha etip qoydı. 22 Ákesi Amasiyanıń óliminen keyin, Azariya Elat qalasın Yahudaǵa qaytarıp alıp, onı qaytadan qurdı.

Izrail patshası Yarobam

23 Yahuda patshası Ioash ulı Amasiyanıń patshalıǵınıń on besinshi jılında, Ehoash ulı Yarobam Samariyada Izrailǵa patsha boldı hám qırıq bir jıl patshalıq etti. 24 Yarobam Jaratqan Iyeniń názerinde jawız bolǵan islerdi isledi hám Nabat ulı Yarobamnıń Izraildı baslaǵan gúnalarınan waz keshpedi. 25 Izraildıń Qudayı Jaratqan Iyeniń Óz qulı gat-xeferli payǵambar Amittay ulı Yunus arqalı aytqan sózleri boyınsha, Yarobam Lebo-Xamattan Óli teńizge shekemgi Izrail jerlerin qayta tikledi. 26 Sebebi Jaratqan Iye Izrail xalqı tartıp atırǵan kúshli azaptı kórdi. Qul da, azat adam da, hámmesi azap ishinde bolıp, olarǵa járdem bergendey hesh kim joq edi. 27 Jaratqan Iye Izraildıń atın jer betinen joq qılıp jiberiwdi qálemegenlikten, Ehoash ulı Yarobam arqalı olardı qutqardı.

28 Yarobamnıń basqa isleri, ol islegen barlıq isler, onıń qaharmanlıqları, qalay urısqanları hám Yahudaǵa tiyisli bolǵan Damask penen Xamattı Izrailǵa qalay qaytarıp alǵanı haqqında Izrail patshalarınıń jılnama kitabında jazılǵan. 29 Yarobam ólip, ata-babaları bolǵan Izrail patshalarına qosıldı. Onıń ornına ulı Zexariya patsha boldı.