2Ki 15 | KaaIBT22L | STEP | Izrail patshası Yarobamnıń patshalıǵınıń jigirma jetinshi jılında, Yahuda patshası Amasiyanıń ulı Azariya Yahudaǵa patsha boldı.

‏ 2 Kings 15

Yahuda patshası Azariya

1 Izrail patshası Yarobamnıń patshalıǵınıń jigirma jetinshi jılında, Yahuda patshası Amasiyanıń ulı Azariya Yahudaǵa patsha boldı. 2 Azariya on altı jasında taxtqa otırıp, Erusalimde eliw eki jıl patshalıq etti. Onıń anası erusalimli bolıp, atı Exoliya edi. 3 Azariya da ákesi Amasiyaǵa uqsap, Jaratqan Iyeniń názerinde tuwrı bolǵan islerdi isledi. 4 Biraq sıyınıw orınları joq qılınbadı hám xalıq ele sol orınlarda qurbanlıqlar berip, tútetkiler tútetetuǵın edi.

5 Jaratqan Iye patsha Azariyanı jazaladı. Ol bir ómir jaman teri keselligine shalınıp, bólek bir úyde jasadı. Saraydı hám úlke xalqın onıń ulı Iotam basqardı.

6 Azariyanıń basqa isleri hám ol islegen barlıq isler Yahuda patshalarınıń jılnama kitabında jazılǵan. 7 Azariya ólip, ata-babalarına qosıldı hám Dawıttıń qalasındaǵı ata-babalarınıń janına jerlendi. Onıń ornına ulı Iotam patsha boldı.

Izrail patshası Zexariya

8 Yahuda patshası Azariyanıń patshalıǵınıń otız segizinshi jılında, Yarobam ulı Zexariya Samariyada Izrailǵa patsha boldı hám altı ay patshalıq etti. 9 Ata-babaları sıyaqlı, ol Jaratqan Iyeniń názerinde jawız bolǵan islerdi isledi hám Nabat ulı Yarobamnıń Izraildı baslaǵan gúnalarınan bas tartpadı. 10 Yabesh ulı Shallum Zexariyaǵa qarsı til biriktirip, onı xalıqtıń aldında óltirdi hám ornına ózi patsha boldı.

11 Zexariyanıń basqa isleri Izrail patshalarınıń jılnama kitabında jazılǵan. 12 Solay etip, Jaratqan Iyeniń Ehuǵa: «Seniń násiliń tórtinshi áwladqa deyin Izrail taxtında otıradı», – dep aytqan sózi orınlandı.

Izrail patshası Shallum

13 Yahuda patshası Uzziyanıń ^{▼▼ Uzziya – basqa atı Azariya. 14:21 qarań.} patshalıǵınıń otız toǵızınshı jılında, Yabesh ulı Shallum Izrailǵa patsha boldı hám Samariyada bir ay patshalıq etti. 14 Gad ulı Menaxem Tirsadan Samariyaǵa kelip, sol jerde Yabesh ulı Shallumdı óltirdi hám onıń ornına ózi patsha bolıp aldı.

15 Shallumnıń basqa isleri hám ol dúzgen qastıyanshılıq Izrail patshalarınıń jılnama kitabında jazılǵan.

16 Sol waqıtta Menaxem Tirsadan shıǵıp, ózine dárwazaların ashpaǵanı ushın, Tifsax qalasın hám onıń átirapındaǵı awıllardıń hámmesin qırdı hám hámiledar hayallardıń qarınların jarıp tasladı.

Izrail patshası Menaxem

17 Yahuda patshası Azariyanıń patshalıǵınıń otız toǵızınshı jılında, Gad ulı Menaxem Izrailǵa patsha bolıp, Samariyada on jıl patshalıq etti. 18 Ol Jaratqan Iyeniń názerinde jawız bolǵan islerdi isledi hám ómiri boyı Nabat ulı Yarobamnıń Izraildı baslaǵan gúnalarınan bas tartpadı.

19 Assiriya patshası Pul ^{▼▼ Pul – basqa atı Tiglat-Pileser. 15:29 qarań.} Izrailǵa hújim etti. Biraq Menaxem Puldıń qollap quwatlawına erisiw arqalı óz patshalıǵın bekkemlew ushın, Pulǵa mıń talant gúmis berdi. 20 Menaxem Assiriya patshasına beriw ushın, Izraildaǵı bay adamlardıń hár birine eliw shekel gúmisten salıq saldı. Solay etip, Assiriya patshası elden sheginip, óz úlkesine qaytıp ketti.

21 Menaxemniń basqa isleri hám ol islegen barlıq isler Izrail patshalarınıń jılnama kitabında jazılǵan. 22 Menaxem ólip, ata-babalarına qosıldı hám onıń ornına ulı Peqaxiya patsha boldı.

Izrail patshası Peqaxiya

23 Yahuda patshası Azariyanıń patshalıǵınıń eliwinshi jılında, Menaxem ulı Peqaxiya Samariyada Izrailǵa patsha boldı hám eki jıl patshalıq etti. 24 Peqaxiya Jaratqan Iyeniń názerinde jawız bolǵan islerdi isledi hám Nabat ulı Yarobamnıń Izraildı baslaǵan gúnalarınan bas tartpadı. 25 Peqaxiyanıń áskerbasılarınan biri Remaliya ulı Peqax oǵan qarsı til biriktirdi. Ol janına giladlı eliw adamdı alıp, Argob hám Arye degen adamlar menen birikti de, Samariyadaǵı saraydıń qorǵanında Peqaxiyanı óltirip, ornına ózi patsha boldı.

26 Peqaxiyanıń basqa isleri hám ol islegen barlıq isler Izrail patshalarınıń jılnama kitabında jazılǵan.

Izrail patshası Peqax

27 Yahuda patshası Azariyanıń patshalıǵınıń eliw ekinshi jılında, Remaliya ulı Peqax Samariyada Izrailǵa patsha boldı hám jigirma jıl patshalıq etti. 28 Ol Jaratqan Iyeniń názerinde jawız bolǵan islerdi isledi hám Nabat ulı Yarobamnıń Izraildı baslaǵan gúnalarınan júz burmadı.

29 Izrail patshası Peqaxtıń dáwirinde, Assiriya patshası Tiglat-Pileser Izraildıń Iyyon, Abel-Beyt-Maaxa, Yanoax, Kedesh, Xasor qalaların hám Gilad, Galila, Naftaliy úlkelerin basıp alıp, xalqın Assiriyaǵa aydap ketti. 30 Yahuda patshası Uzziya ulı Iotamnıń patshalıǵınıń jigirmalanshı jılında, Ela ulı Hoshea Remaliya ulı Peqaxqa qarsı til biriktirip, onı óltirdi hám ornına ózi patsha boldı. 31 Peqaxtıń basqa isleri hám ol islegen barlıq isler Izrail patshalarınıń jılnama kitabında jazılǵan.

Yahuda patshası Iotam

32 Izrail patshası Remaliya ulı Peqaxtıń patshalıǵınıń ekinshi jılında, Uzziya ulı Iotam Yahudaǵa patsha boldı. 33 Iotam jigirma bes jasında patsha boldı hám Erusalimde on altı jıl patshalıq etti. Onıń anasınıń atı Erusha bolıp, ol Sadoq degen adamnıń qızı edi. 34 Iotam da ákesi Uzziyaǵa uqsap, Jaratqan Iyeniń názerinde tuwrı bolǵan islerdi isledi. 35 Biraq sıyınıw orınları joq qılınbadı hám xalıq ele sol orınlarda qurbanlıqlar berip, tútetkiler tútetetuǵın edi. Iotam Jaratqan Iyeniń Úyiniń joqarǵı dárwazasın saldırdı.

36 Iotamnıń basqa isleri hám ol islegen barlıq isler Yahuda patshalarınıń jılnama kitabında jazılǵan. 37 Sol kúnlerde Jaratqan Iye Aram patshası Resin menen Izrail patshası Remaliya ulı Peqaxtı Yahudaǵa hújimge jibere basladı. 38 Iotam ólip, ata-babalarına qosıldı hám babası Dawıttıń qalasına, ata-babalarınıń janına jerlendi. Onıń ornına ulı Axaz patsha boldı.