2Ki 16 | KaaIBT22L | STEP | Izrail patshası Remaliya ulı Peqaxtıń patshalıǵınıń on jetinshi jılında, Iotam ulı Axaz Yahudaǵa patsha boldı.

‏ 2 Kings 16

Yahuda patshası Axaz

1 Izrail patshası Remaliya ulı Peqaxtıń patshalıǵınıń on jetinshi jılında, Iotam ulı Axaz Yahudaǵa patsha boldı. 2 Axaz jigirma jasında patsha bolıp, Erusalimde on altı jıl patshalıq etti. Ol Qudayı Jaratqan Iyeniń názerinde tuwrı bolǵan islerdi islegen babası Dawıtqa uqsamadı. 3 Axaz Izrail patshalarınıń jolınan júrdi. Hátte, Jaratqan Iye Izrail xalqınıń aldınan quwıp jibergen milletlerdiń jerkenishli dástúrlerine eliklep, óz ulın otqa jaǵıp, qurban etti. 4 Ol sıyınıw orınlarında, tóbeshiklerde hám hár bir qoyıw japıraqlı terektiń astında qurbanlıqlar berip, tútetkiler tútetti.

5 Sonda Aram patshası Resin hám Izrail patshası Remaliya ulı Peqax Erusalimdi basıp alıw ushın hújim etti. Olar qalanı qamal qılıp tursa da, Axazdı jeńe almadı. 6 Sol arada Aram patshası Resin Elat qalasın qaytarıp alıp, ol jerdegi Yahuda xalqın quwıp jiberdi. Sońınan edomlılar Elatqa qonıs bastı, olar házir de sol jerde jasaydı.

7 Axaz Assiriya patshası Tiglat-Pileserge elshilerin jiberip: «Men siziń qulıńız hám xızmetshińizben. Kelip, maǵan hújim etip atırǵan Aram hám Izrail patshalarınıń qolınan meni qutqarıń», – dedi. 8 Axaz Jaratqan Iyeniń Úyinen hám saraydıń qaznasınan tabılǵan gúmis hám altınlardı alıp, Assiriya patshasına sawǵaǵa berip jiberdi. 9 Assiriya patshası Axazdıń tilegin orınlap, Damaskke hújim etip, onı qolǵa kirgizdi. Qala xalqın Kirge súrgin qılıp, Resindi óltirdi.

10 Patsha Axaz Assiriya patshası Tiglat-Pileserdi qarsı alıw ushın Damaskke barǵanda, sol jerdegi qurbanlıq orındı kórdi. Ol qurbanlıq orınnıń súwretin hám qurılısınıń sızılmasın ruwxaniy Uriyaǵa jiberdi. 11 Ruwxaniy Uriya patsha Axaz Damaskten kelgenshe, Damaskten ol jibergen úlgi boyınsha, qurbanlıq orın qurdırıp qoydı. 12 Patsha Damaskten qaytıp kelgende, qurbanlıq orındı kórdi hám oǵan jaqınlap, ústinde qurbanlıqlar berdi. 13 Ol qurbanlıq orında jandırılatuǵın qurbanlıǵın hám ǵálle sadaqasın tútetip jandırdı, oǵan ishimlik sadaqasın quyıp, tatıwlıq qurbanlıǵınıń qanın septi. 14 Al Jaratqan Iyeniń aldındaǵı qoladan islengen qurbanlıq orındı Jaratqan Iyeniń Úyiniń aldınan, yaǵnıy taza qurbanlıq orın menen Úy ortasında turǵan ornınan jıljıtıp, onı jańa qurbanlıq orınnıń arqa tárepine qoydı.

15 Sońınan patsha Axaz ruwxaniy Uriyaǵa mınaday buyrıq berdi:

– Azanǵı jandırılatuǵın qurbanlıqtı hám keshki ǵálle sadaqasın, patsha bergen jandırılatuǵın qurbanlıqtı hám ǵálle sadaqasın, úlke xalqı bergen jandırılatuǵın qurbanlıqtı, ǵálle sadaqasın hám ishimlik sadaqasın úlken qurbanlıq orında usın. Jandırılatuǵın qurbanlıqlardıń hám basqa qurbanlıqlardıń hámmesiniń qanın oǵan sep. Al qoladan islengen qurbanlıq orındı men keleshekti biliw ushın qollanaman.

16 Ruwxaniy Uriya patsha Axazdıń buyrıqların tolıq orınladı.

17 Patsha Axaz túbeldiriklerdiń taxtaların kestirip, ústindegi lágenlerdi aldırıp tasladı. Háwizdi de qola buǵalardıń ústinen túsirip, tóselgen tastıń ústine qoydı. 18 Assiriya patshasına jaǵınıw ushın, ol Shabbat kúnleri Jaratqan Iyeniń Úyine kiretuǵın ústi jabıq joldı hám patsha kiretuǵın qapını jawıp tasladı.

19 Axazdıń basqa isleri haqqında Yahuda patshalarınıń jılnama kitabında jazılǵan. 20 Axaz ólip, ata-babalarına qosıldı hám Dawıttıń qalasına, ata-babalarınıń janına jerlendi. Onıń ornına ulı Xizkiya patsha boldı.