‏ 2 Kings 2

Iliyastıń aspanǵa alınıwı

1Jaratqan Iye Iliyastı quyın ishinde aspanǵa kóterip alıp ketpesten aldın, Iliyas penen Elisha Gilgaldan jolǵa shıqqan edi. 2Sonda Iliyas Elishaǵa:

– Ótinemen, usı jerde qal, Jaratqan Iye meni Beyt-Elge jiberip atır, – dedi.

Elisha oǵan:

– Tiri Jaratqan Iye haqı hám siziń tiriligińiz haqı ant ishemen: sizden ayırılmayman, – dep juwap berdi. Sóytip olar birge Beyt-Elge ketti.

3Beyt-Eldegi payǵambarlar toparı Elishanıń aldınan shıǵıp, onnan:

– Jaratqan Iye búgin mırzańdı qasıńnan alıp ketedi, bunı bileseń be? – dep soradı. Elisha olarǵa:

– Awa, bilemen, úndemeńler, – dedi.

4Iliyas Elishaǵa:

– Elisha, ótinemen, usı jerde qal, Jaratqan Iye meni Erixoǵa jiberip atır, – dedi. Elisha oǵan:

– Tiri Jaratqan Iye haqı hám siziń tiriligińiz haqı ant ishemen: sizden ayırılmayman, – dedi. Sóytip olar Erixoǵa keldi.

5Sonda Erixodaǵı payǵambarlar toparı Elishaǵa kelip:

– Jaratqan Iye búgin mırzańdı qasıńnan alıp ketedi, bunı bileseń be? – dep soradı. Elisha olarǵa:

– Awa, bilemen, úndemeńler, – dedi.

6Keyin Iliyas Elishaǵa:

– Ótinemen, sen usı jerde qal, sebebi Jaratqan Iye meni Iordan dáryasına jiberip atır, – dedi.

Elisha oǵan:

– Tiri Jaratqan Iye haqı hám siziń tiriligińiz haqı ant ishemen: sizden ayırılmayman, – dedi. Solay etip, ekewi jolın dawam etti.

7Payǵambarlar toparınan eliwi kelip, uzaǵıraqtan olarǵa qarap turdı. Al olar ekewi Iordan dáryasınıń jaǵasında turdı. 8Iliyas shapanın alıp, aylandırıp, suwǵa urıp jibergende, suw ekige ayırıldı. Olar ekewi qurǵaq jer arqalı arǵı jaǵaǵa ótti. 9Dáryadan ótip bolǵannan soń, Iliyas Elishadan:

– Meni janıńnan alıp ketpesten burın ayt, mennen qanday tilegiń bar? – dep soradı. Sonda Elisha:

– Mende sizdegi ruwxtıń eki esesi bolsın, – dedi. 10Iliyas oǵan:

– Qıyın nárseni soradıń. Eger janıńnan meniń qalay alıp ketilgenimdi kórseń, onda solay boladı. Eger kórmeseń, olay bolmaydı, – dedi.

11Olar jolda sóylesip ketip baratırǵanda, tosattan otlı arbaǵa jegilgen otlı atlar kórindi hám olardı bir-birinen ayırdı. Iliyas quyın ishinde aspanǵa kóterilip ketti. 12Elisha bunı kórip:

– Ákem, ákem, Izraildıń arbası hám atlıları! – dep qıshqırıp qala berdi. Elisha Iliyastı qaytıp kóre almaytuǵın bolǵanlıqtan, kiyimlerin jırtıp, ekige ayırdı. 13Sońınan Iliyastan túsip qalǵan shapandı alıp, izine qayttı hám Iordan dáryasınıń jaǵasına kelip turdı. 14Ol Iliyastan túsip qalǵan shapan menen suwdı urıp:

– Jaratqan Iye, Iliyastıń Qudayı qay jerdeseń? – dedi. Keyin ol suwdı qaytadan urǵanda, suw qaq ayırılıp, Elisha sol jerden kesip ótti.

15Erixodaǵı payǵambarlar toparı uzaqtan Elishanı kórgende: «Iliyastıń ruwxı Elishaǵa tústi», – desti. Olar barıp, Elishanı kútip aldı hám basları jerge tiygenshe iyilip oǵan tájim etti. 16Keyin olar Elishaǵa:

– Janımızda eliw kúshli adam bar. Ruxsat beriń, olar barıp, mırzańızdı izlep kelsin. Bálkim, Jaratqan Iyeniń Ruwxı onı kóterip áketip, qanday da bir tawǵa yamasa oypatlıqqa aparıp taslaǵan shıǵar, – dedi. Biraq Elisha olarǵa:

– Yaq, olardı izlewge jibermeńler, – dedi. 17Degen menen, payǵambarlar jalınıp qoymay, biyzar qılǵannan soń, Elisha izlewge ruxsat berdi. Payǵambarlar eliw adamdı jiberdi. Olar úsh kún izlep, Iliyastı taba almadı. 18Keyin Erixoǵa, Elishanıń qasına qaytıp keldi. Elisha olarǵa:

– Men sizlerge onı izlemeńler degen joq pa edim? – dedi.

Elishanıń suwdı páklewi

19Erixolılar Elishaǵa:

– Mırzamız, ózińiz kórip turǵanday, qalanıń turǵan jeri jaqsı, biraq suwı jaman, jeri de ónimsiz, – dedi. 20Elisha olarǵa:

– Taza bir kesege duz salıp, maǵan alıp kelińler, – dedi. Olar solay isledi. 21Elisha bulaq basına barıp, duzdı suwǵa tasladı da, bılay dedi:

– Jaratqan Iye bılay deydi: «Men bul suwdı taza qıldım, onnan endi ólim de, ónimsizlik te kelip shıqpaydı».

22Elishanıń aytqan sózi boyınsha, suw házirge deyin ishiwge jaramlı.

Elishanı masqaralaǵan balalar

23Elisha sol jerden Beyt-Elge ketti. Ol jolda ketip baratırǵanda, qaladan kishkene balalar shıǵıp:

– Joq bol, taz, joq bol! – dep masqaralay basladı. 24Ol artına qarap, balalardı kórdi hám olardı Jaratqan Iyeniń atı menen ǵarǵadı. Sonda toǵaydan eki urǵashı ayıw shıǵıp, qırıq eki balanı tilkimlep tasladı.

25Elisha ol jerden Karmel tawına, Karmel tawınan Samariyaǵa qayttı.