2Ki 20 | KaaIBT22L | STEP | Sol kúnleri Xizkiya awırıp, ólim tóseginde jattı. Sonda Amos ulı Iyshaya payǵambar oǵan kelip bılay dedi: – Jaratqan Iye bılay deydi: «Úy-ishińe wásiyatnamańdı qaldırıp, ırzalasa ber, sebebi táwir bolmaysań, óleseń».

‏ 2 Kings 20

Xizkiyanıń qásteleniwi hám shıpalanıwı

1 Sol kúnleri Xizkiya awırıp, ólim tóseginde jattı. Sonda Amos ulı Iyshaya payǵambar oǵan kelip bılay dedi:

– Jaratqan Iye bılay deydi: «Úy-ishińe wásiyatnamańdı qaldırıp, ırzalasa ber, sebebi táwir bolmaysań, óleseń».

2 Xizkiya júzin diywalǵa qaratıp, Jaratqan Iyege duwa etip:

3 – O, Jaratqan Iye! Aldıńda meniń shın júrekten sadıqlıq penen jasaǵanımdı hám názerińde tuwrı islerdi islep júrgenimdi esley gór! – dedi hám óksip-óksip jıladı.

4 Iyshaya ele saraydıń ortanǵı háwlisinen shıǵıp ketpey atırıp, oǵan Jaratqan Iyeden mınaday sóz tústi:

5 – Izińe qaytıp, Meniń xalqımnıń húkimdarı Xizkiyaǵa mına xabardı jetkiz: «Babań Dawıttıń Qudayı Jaratqan Iye bılay deydi: Duwańdı esittim, kóz jaslarıńdı kórdim. Mine, Men seni shıpalayman. Sen úshinshi kúni Jaratqan Iyeniń Úyine barasań. 6 Ómirińdi on bes jılǵa uzaytaman. Ózińdi de, bul qalanı da Assiriya patshasınıń qolınan qutqaraman. Ózim ushın hám qulım Dawıttıń húrmeti ushın bul qalanı qorǵayman».

7 Iyshaya patshanıń adamlarına:

– Keptirip nıǵızlanǵan ánjir alıp kelińler, – dedi.

Onı ákelip, jaraǵa qoyǵanda, ol sawalıp ketti. 8 Xizkiya Iyshayadan:

– Jaratqan Iyeniń meni sawaltatuǵının hám úshinshi kúni Jaratqan Iyeniń Úyine baratuǵınımdı qanday belgi arqalı bilemen? – dep soradı. 9 Iyshaya oǵan:

– Jaratqan Iyeniń Óz sózin orınlaytuǵının bildiretuǵın belgi mınaw: tekshege túsip turǵan saya on adım aldıǵa jıljısın ba yamasa on adım artqa jıljısın ba? – dedi. 10 Xizkiya Iyshayaǵa:

– Sayanıń aldıǵa on adım jıljıwı ańsat. Saya on adım artqa jıljısın, – dedi. 11 Iyshaya payǵambar Jaratqan Iyege jalbarındı. Sonda Jaratqan Iye patsha Axaz soqtırǵan teksheniń ústine túsip turǵan sayanı on adım artqa jıljıttı.

Xizkiyanıń aqılsızlıǵı

12 Sol arada Xizkiyanıń awırıp qalǵanın esitken Babiloniya patshası Baladan ulı Merodax-Baladan Xizkiyaǵa xatlar hám sawǵalar jiberdi. 13 Xizkiya elshilerdi qabıl etti hám olarǵa óz qaznasındaǵı zatlardıń hámmesin: gúmis hám altınların, xosh iyisli zatların, qımbatbaha mayların, qural-jaraq saqlanatuǵın bólmesin kórsetti. Xizkiyanıń sarayında da, patshalıǵında da olarǵa kórsetilmegen hesh nárse qalmadı.

14 Sonda payǵambar Iyshaya patsha Xizkiyanıń janına kelip, oǵan:

– Bul adamlar sizge ne dedi? Olar qay jaqtan kelipti? – dep soradı. Xizkiya oǵan:

– Olar uzaq elden, Babiloniyadan kelgen, – dep juwap berdi.

15 Iyshaya:

– Olar sarayıńızda nelerdi kórdi? – dep soradı. Xizkiya:

– Sarayımdaǵı hámme nárseni kórdi. Qaznamda olarǵa kórsetpegen hesh nársem qalmadı, – dep juwap berdi. 16 Sonda Iyshaya Xizkiyaǵa bılay dedi:

– Onda Jaratqan Iyeniń sózin esitiń: 17 «Sarayıńdaǵı hámme nárse hám ata-babalarıńnıń usı kúnge shekem jıynaǵan hámme nársesi Babilonǵa alıp ketiletuǵın kún keledi, hesh nárse qalmaydı, – deydi Jaratqan Iye. 18 – Seniń násilińnen bolǵan ayırım urpaqlarıń da alıp ketilip, Babiloniya patshasınıń sarayında xızmetshi boladı». 19 Xizkiya Iyshayaǵa:

– Jaratqan Iyeniń siz arqalı aytqan sózleri jaqsı sózler, – dedi. Sebebi ol ishinen: «Hesh bolmaǵanda meniń zamanımda tınıshlıq hám abadanshılıq boladı», – dep oyladı.

20 Xizkiyanıń basqa isleri, barlıq qaharmanlıqları, ol qurǵızǵan háwiz, suw ótkelleri hám qalaǵa qalay suw aparǵanları Yahuda patshalarınıń jılnama kitabında jazılǵan. 21 Xizkiya ólip, ata-babalarına qosıldı. Onıń ornına ulı Menashshe patsha boldı.