2Ki 21 | KaaIBT22L | STEP | Menashshe on eki jasında patsha boldı hám Erusalimde eliw bes jıl patshalıq etti. Onıń anasınıń atı Xefsiba edi.

‏ 2 Kings 21

Yahuda patshası Menashshe

1 Menashshe on eki jasında patsha boldı hám Erusalimde eliw bes jıl patshalıq etti. Onıń anasınıń atı Xefsiba edi. 2 Ol Jaratqan Iyeniń Izrail xalqınıń aldınan quwıp jibergen xalıqlardıń jerkenishli jaman islerine eliklep, Jaratqan Iyeniń názerinde jawız bolǵan islerdi isledi. 3 Ákesi Xizkiya joq qılǵan sıyınıw orınların qayta tikledi. Izrail patshası Axabqa uqsap, Baalǵa arnap qurbanlıq orınlar qurdı, kiyeli aǵash ornattı hám pútkil aspan denelerine tabınıp, olarǵa xızmet etti. 4 Menashshe Jaratqan Iyeniń Úyine, yaǵnıy Jaratqan Iyeniń: «Men Erusalimde Óz atımdı ornataman», – degen Úyine basqa qudaylarǵa arnap, qurbanlıq orınlar qurdırdı. 5 Ol Jaratqan Iyeniń Úyiniń eki háwlisine de barlıq aspan denelerine arnap qurbanlıq orınlar qurdı. 6 Ol óz ulın otta jandırıp qurbanlıqqa berdi, pal ashtı, belgilerdi jorıdı, árwaq hám ruwxlardı shaqırıwshılarǵa másláhát saldı. Ol Jaratqan Iyeniń názerinde jawız bolǵan islerdi islep, Onı ǵázeplendirdi. 7 Menashshe ózi isletken Ashera butın Jaratqan Iyeniń Úyine qoydı. Jaratqan Iye Dawıtqa hám onıń ulı Sulaymanǵa: «Bul Úyde hám Izrail urıwları arasınan tańlap alǵan qalam Erusalimde atımdı máńgige ornataman. 8 Eger olar Meniń buyrıqlarımdı hám qulım Muwsa buyırǵan barlıq Nızamlardı muqıyatlı túrde orınlap jasasa, onda Izrail xalqın ózleriniń ata-babalarına bergen jerden quwıp shıǵarmayman», – degen edi. 9 Biraq xalıq qulaq aspadı. Menashsheniń xalıqtı joldan azǵırǵanı sonshelli, Jaratqan Iyeniń Izrail xalqınıń aldınan joq qılǵan xalıqlarınan da kóbirek jamanlıqlar isledi.

10 Jaratqan Iye Óz qulları bolǵan payǵambarlar arqalı bılay dedi: 11 «Yahuda patshası Menashshe ózinen burın sol jerde jasaǵan amor xalqınan da jamanıraq jerkenishli islerdi islegeni, óz butları menen yahudalılardı gúnaǵa baslaǵanı ushın, 12 Izraildıń Qudayı Jaratqan Iye bılay deydi: „Men Yahuda eliniń hám onıń bas qalası Erusalimniń basına esitken adamnıń júregin suwlatatuǵın bir apatshılıq jawdıraman. 13 Samariyaǵa qollanǵan ólshew jibin hám Axabtıń úy-ishine qollanǵan ólshemdi Erusalimge de qollanaman. Tabaqtı sıpırıp, tóńkerip qoyǵanı sıyaqlı, Erusalimdi de solay sıpırıp tazalayman. 14 Xalqımnıń qalǵanlarınan júz buraman, olardı dushpanlarınıń qolına tapsıraman. Dushpanları olardı tonap, talan-taraj etedi. 15 Sebebi olar Meniń názerimde jawız bolǵan islerdi isledi hám ata-babaları Mısırdan shıqqan kúnnen usı kúnge deyin Meniń ǵázebimdi keltirdi“».

16 Menashshe Jaratqan Iyeniń názerinde jawız bolǵan islerdi islep, yahudalılarǵa isletken gúnasına qosa, júdá kóp ayıpsız qan tógip, Erusalimdi basınan ayaǵına shekem qanǵa batırdı. 17 Menashsheniń basqa isleri, ol islegen barlıq isler hám ol islegen gúnalar haqqında Yahuda patshalarınıń jılnama kitabında jazılǵan. 18 Menashshe ólip, ata-babalarına qosıldı hám saraydıń Uzza dep atalatuǵın baǵına jerlendi. Onıń ornına ulı Amon patsha boldı.

Yahuda patshası Amon

19 Amon jigirma eki jasında patsha bolıp, Erusalimde eki jıl patshalıq etti. Anasınıń atı Meshullemet bolıp, ol iotbalı Xarustıń qızı edi. 20 Amon da ákesi Menashshege uqsap, Jaratqan Iyeniń názerinde jawız bolǵan islerdi isledi. 21 Ol ákesiniń jolınan júrdi, ákesi tabınǵan butlarǵa xızmet etip, olarǵa tabındı. 22 Amon ata-babalarınıń Qudayı Jaratqan Iyeni tárk etti, Onıń jolınan júrmedi.

23 Patsha Amonnıń xızmetshileri oǵan qarsı til biriktirip, onı óz sarayında óltirdi. 24 Biraq úlke xalqı patsha Amonǵa qarsı til biriktirgenlerdiń hámmesin óltirdi hám onıń ornına ulı Ioshiyanı patsha etip qoydı.

25 Amon islegen basqa isler Yahuda patshalarınıń jılnama kitabında jazılǵan. 26 Amon Uzza baǵındaǵı óz qábirine jerlendi. Onıń ornına ulı Ioshiya patsha boldı.