2Ki 22 | KaaIBT22L | STEP | Ioshiya segiz jasında patsha bolıp, Erusalimde otız bir jıl patshalıq etti. Onıń anasınıń atı Edida bolıp, ol bosqatlı Adayanıń qızı edi.

‏ 2 Kings 22

Yahuda patshası Ioshiya

1 Ioshiya segiz jasında patsha bolıp, Erusalimde otız bir jıl patshalıq etti. Onıń anasınıń atı Edida bolıp, ol bosqatlı Adayanıń qızı edi. 2 Ioshiya Jaratqan Iyeniń názerinde tuwrı bolǵan islerdi isledi hám ońǵa da solǵa da burılmay, babası Dawıttıń jolınan júrdi.

3 Patsha Ioshiya óz patshalıǵınıń on segizinshi jılında, Meshullamnıń aqlıǵı Asaliyanıń ulı xatker Shafandı Jaratqan Iyeniń Úyine jiberip, oǵan bılay dedi:

4 – Bas ruwxaniy Xilkiyaǵa bar. Ol bosaǵadaǵı qadaǵalawshı ruwxaniyler xalıqtan jıynap, Jaratqan Iyeniń Úyine alıp kelgen gúmislerdi esaplap shıqsın. 5 Keyin onı Jaratqan Iyeniń Úyiniń ishindegi islerdi baqlaw ushın tayınlanǵan adamlarǵa bersin. Olar bunı Jaratqan Iyeniń Úyiniń buzılǵan jerlerin dúzetiwshilerge, 6 ustalarǵa, qurılısshılarǵa, tas óriwshilerge tólesin hám Úydi dúzetiwge kerekli bolǵan aǵashlardı hám jonılǵan taslardı satıp alıwǵa jumsasın. 7 Degen menen, olarǵa berilgen gúmistiń esabı talap etilmesin, óytkeni olar hadal isleydi.

8 Bas ruwxaniy Xilkiya xatker Shafanǵa:

– Men Jaratqan Iyeniń Úyinen Nızam kitabın taptım, – dep, kitaptı Shafanǵa berdi. Shafan kitaptı oqıdı. 9 Sońınan xatker Shafan patshaǵa:

– Qullarıńız Úyden tabılǵan gúmislerdi alıp, onı Jaratqan Iyeniń Úyindegi islerdi alıp barıwshılarǵa tapsırdı, – degen xabar alıp keldi. 10 Sońınan ol:

– Ruwxaniy Xilkiya maǵan bir kitap berdi, – dedi hám kitaptı patshaǵa oqıp berdi. 11 Patsha Nızam kitabındaǵı sózlerdi esitkende, kiyimlerin jırttı. 12 Ol ruwxaniy Xilkiyaǵa, Shafan ulı Axiqamǵa, Mixaya ulı Axborǵa, xatker Shafanǵa hám óz xızmetshisi Asayaǵa bılay dep buyırdı:

13 – Barıp, tabılǵan bul kitaptıń sózleri haqqında men ushın, xalıq ushın hám pútkil Yahuda ushın Jaratqan Iyeniń erkin sorańlar. Ata-babalarımızdıń bul kitaptıń sózlerine qulaq aspaǵanı hám onda bizler ushın jazılǵan bul sózlerge say jasamaǵanı sebepli, Jaratqan Iyeniń bizlerge qarsı lawlaǵan ǵázebi ullı.

14 Ruwxaniy Xilkiya, Axiqam, Axbor, Shafan hám Asaya barıp, Xarxastıń aqlıǵı Tiqwanıń ulı bolǵan muxaddes kiyimlerge qarawshı Shallumnıń hayalı payǵambar Xulda menen sóylesti. Xulda Erusalimniń taza bóliminde jasaytuǵın edi.

15 Hayal olarǵa bılay dedi:

– Izraildıń Qudayı Jaratqan Iye sizlerdi maǵan jibergen adamǵa bılay dep aytıńlar dep atır: 16 «Jaratqan Iye bılay deydi: „Yahuda patshasınıń oqıǵan kitabında jazılǵanınday, bul jerge de, bul jerde jasaytuǵın xalıqtıń basına da apatshılıq jawdıraman. 17 Olar meni tárk etti hám basqa qudaylarǵa tútetki tútetip, pútkil isleri menen Meniń ǵázebimdi keltirdi. Sonlıqtan bul jerge qarsı ǵázebim lawladı hám ol sónbeydi“». 18 Jaratqan Iyeniń erkin soraw ushın sizlerdi jibergen Yahuda patshasına bılay dep aytıńlar: «Sen esitken sózler tuwralı Izraildıń Qudayı Jaratqan Iye bılay deydi: 19 „Bul jer hám bul jerde jasaytuǵınlardıń wayran etiliwge hám náletke húkim etilgeni haqqında Meniń sózlerimdi esitkende, júregiń ezildi hám Maǵan boysındıń. Sen kiyimlerińdi jırtıp, Meniń aldımda jılaǵanlıqtan, Men de seni esittim. 20 Sonlıqtan Men seni ata-babalarıńa qosaman, tınıshlıq penen qábirge qoyılasań. Men bul jerge jawdıratuǵın hesh bir apatshılıqtı seniń kóziń kórmeydi“».

Olar bul xabardı patshaǵa jetkizdi.