2Ki 24 | KaaIBT22L | STEP | Yahuda patshası Ehoyakimniń patshalıǵı dáwirinde Babiloniya patshası Nabuxodonosor Yahudaǵa hújim jasadı. Ehoyakim úsh jıl oǵan baǵınıshlı bolıp, sońınan oǵan qarsı bas kóterdi.

‏ 2 Kings 24

1 Yahuda patshası Ehoyakimniń patshalıǵı dáwirinde Babiloniya patshası Nabuxodonosor Yahudaǵa hújim jasadı. Ehoyakim úsh jıl oǵan baǵınıshlı bolıp, sońınan oǵan qarsı bas kóterdi. 2 Jaratqan Iye Óz qulları bolǵan payǵambarlar arqalı aytqan sózleri boyınsha, Yahudanı joq etiw ushın Babiloniya, Aram, Moab hám Ammon elleriniń basqınshı toparların Yahudaǵa jiberdi. 3 Bulardıń hámmesi Jaratqan Iyeniń buyrıǵı boyınsha Yahudanıń basına tústi. Menashshe islegen barlıq gúnalar sebepli, Jaratqan Iye onı Óz dárgayınan quwıp shıǵarmaqshı boldı. 4 Sebebi Jaratqan Iye Menashsheniń ayıpsız qan tógip, Erusalimdi ayıpsızlardıń qanına toltırǵanın keshiriwdi qálemedi.

5 Ehoyakimniń basqa isleri hám ol islegen barlıq isler Yahuda patshalarınıń jılnama kitabında jazılǵan. 6 Ehoyakim ólip, ata-babalarına qosıldı, ornına ulı Ehoyakin patsha boldı.

7 Mısır patshası endi óz jerinen sırtqa shıqpadı. Sebebi Babiloniya patshası Mısır shegarasındaǵı saydan Evfrat dáryasına shekemgi Mısır patshasına tiyisli barlıq jerlerdi basıp alǵan edi.

Yahuda patshası Ehoyakin

8 Ehoyakin on segiz jasında patsha bolıp, Erusalimde úsh ay patshalıq etti. Onıń anası erusalimli Elnatannıń qızı Nexushta edi. 9 Ehoyakin de ákesi sıyaqlı Jaratqan Iyeniń názerinde jawız bolǵan islerdi isledi.

10 Sol waqıtları Babiloniya patshası Nabuxodonosordıń áskerleri Erusalimge qarsı júris qılıp, qalanı qamal qıldı. 11 Áskerleri qalanı qamal qılǵanda, Babiloniya patshası Nabuxodonosordıń ózi de qalaǵa keldi. 12 Sonda Yahuda patshası Ehoyakin anası, wázirleri, basshıları hám saray xızmetshileri menen birge Babiloniya patshasına táslim boldı. Babiloniya patshası óz patshalıǵınıń segizinshi jılında, Ehoyakindi tutqınǵa aldı. 13 Jaratqan Iyeniń aldın ala aytqan sózi boyınsha, Nabuxodonosor Jaratqan Iyeniń Úyindegi hám patsha sarayındaǵı ǵáziynelerdi alıp ketti. Izrail patshası Sulaymannıń Jaratqan Iyeniń Ibadatxanası ushın isletken altın buyımlarınıń hámmesin sındırdı. 14 Ol jáne pútkil Erusalim turǵınların: basshılardıń, márt jawıngerlerdiń, ustalardıń hám temirshilerdiń barlıǵın, ulıwma on mıń adamdı súrgin etip alıp ketti. Úlkede jarlı xalıqtan basqa hesh kim qalmadı.

15 Babiloniya patshası Nabuxodonosor Ehoyakindi Babilonǵa súrgin etti. Onıń anasın, hayalların, saray xızmetshilerin hám úlkeniń elbasshıların da Erusalimnen Babilonǵa súrgin etti. 16 Bunnan tısqarı Babiloniya patshası jeti mıń saylandı áskerdi, mıń usta hám temirshini Babilonǵa súrgin etti. Olardıń hámmesi urısqa jaramlı hám márt jawıngerler edi. 17 Babiloniya patshası Ehoyakinniń ornına Ehoyakinniń ákesiniń inisi Mattaniyanı patsha etip qoydı hám atın Sedekiya dep ózgertti.

Yahuda patshası Sedekiya

18 Sedekiya jigirma bir jasında patsha bolıp, Erusalimde on bir jıl patshalıq etti. Onıń anasınıń atı Xamutal bolıp, ol libnalı Eremiyanıń qızı edi. 19 Ehoyakimge uqsap, Sedekiya da Jaratqan Iyeniń názerinde jawız bolǵan islerdi isledi. 20 Jaratqan Iye Erusalim menen Yahudaǵa ǵázeplengeni ushın, olardı Óz dárgayınan shıǵarıp tasladı.

Erusalimniń qulawı

Sedekiya Babiloniya patshasına qarsı bas kóterdi.