‏ 2 Kings 5

Naamannıń jaman teri keselliginen jazılıwı

1Aram patshasınıń sárkárdası Naaman óz mırzası ushın ullı hám húrmetli adam edi. Sebebi Jaratqan Iye aramlılarǵa ol arqalı jeńis sıylaǵan edi. Naaman márt jawınger edi, biraq ol jaman teri keselligine jolıqqan edi. 2Burın aramlılar bir shabıwıl jasaǵanında, Izraildan bir kishkene qızdı tutqın etip alıp kelgen edi. Bul qız Naamannıń hayalına xızmet etetuǵın edi. 3Bir kúni ol óz biykesine:

– Qánekey, mırzam Samariyadaǵı payǵambarǵa barǵanda ma edi, ol onı teri keselliginen azat etken bolar edi, – dedi.

4Bunı esitkende, Naaman barıp, izraillı qızdıń aytqanların óz mırzasına, patshaǵa aytıp berdi. 5Aram patshası Naamanǵa:

– Jolǵa atlan, men Izrail patshasına xat jazıp beremen, – dedi. Ol on talant ▼

▼ On talant – bir talant shama menen 34 kg.

gúmis, altı mıń shekel ▼

▼ Altı mıń shekel – bir shekel shama menen 11 gr.

altın hám on qatar kiyim alıp, jolǵa shıqtı. 6Ol xattı Izrail patshasına ákelip berdi. Xatta bılay dep jazılǵan edi: «Bul xat penen birge qulım Naamandı sizge jiberip atırman. Onı teri keselliginen azat etiwińizdi qáleymen».

7Izrail patshası xattı oqıp kórdi de, kiyimlerin jırtıp:

– Adamnıń teri keselligin jazıw ushın maǵan adam jiberetuǵınday, men ne jan alıp jan beretuǵın Quday ma edim? Mine, kórińler hám bilip qoyıńlar, ol meniń menen urısıw ushın sebep izlep atır, – dep baqırdı.

8Izrail patshasınıń kiyimlerin jırtqanın esitken Qudaydıń adamı Elisha patshaǵa: «Nege kiyimlerińizdi jırttıńız? Ol adamdı maǵan jiberiń, Izrailda bir payǵambar bar ekenin bilip qoysın», – degen xabar jiberdi. 9Solay etip, Naaman atları hám arbaları menen Elishanıń úyiniń esiginiń aldına kelip turdı. 10Sonda Elisha xabarshısın jiberip, ol arqalı Naamanǵa bılay dedi: «Barıp, Iordan dáryasına jeti ret juwın, sonda teriń jańarıp, pák bolasań».

11Naaman buǵan qattı ashıwlanıp:

– Men, ol aldımnan shıǵıp, óz Qudayı Jaratqan Iyeniń atın aytıp shaqıradı hám kesellengen jerime qolın qoyıp, onı jazadı dep oylaǵan edim. 12Damasktegi Abana hám Parpar dáryaları Izraildaǵı barlıq dáryalardıń suwlarınan artıq emes pe? Men olarda-aq juwınıp, páklenip almas pa edim? – dedi de, ashıwǵa buwlıǵıwı menen burılıp ketti.

13Biraq Naamannıń xızmetshileri janına kelip:

– Mırzam, eger payǵambar sizge qıyınıraq bir isti isle degende, islemes pe edińiz? Ol sizge tek: «Barıp juwın, tazalanasań», – dedi-ǵo, – dedi.

14Bunnan soń, Naaman Qudaydıń adamınıń sózi boyınsha Iordan dáryasına barıp, jeti ret súńgidi. Sonda onıń denesi náresteniń denesindey tap-taza boldı hám ol páklendi.

15Naaman barlıq adamları menen birge Qudaydıń adamına qaytıp keldi hám onıń aldında turıp bılay dedi:

– Mine, endi pútkil jer betinde Izraildıń Qudayınan basqa qudaydıń joq ekenin bildim. Ótinemen, qulıńızdıń mına sawǵasın qabıl etiń, – dedi.

16Biraq Elisha oǵan:

– Ózim xızmetinde bolǵan tiri Jaratqan Iye haqı ant ishemen: hesh nárse almayman, – dedi.

Naaman Elishanı alıwǵa kóndirmekshi boldı, biraq ol almadı. 17Sonda Naaman bılay dedi:

– Onda maǵan usı jerdiń topıraǵınan eki ǵashırım kótere alǵanday topıraq alıwǵa ruxsat beriń. Óytkeni qulıńız bolǵan men endigiden bılay Jaratqan Iyeden basqa hesh bir qudayǵa jandırılatuǵın qurbanlıqlar hám basqa qurbanlıqlar bermeymen. 18Biraq mına jaǵdayda Jaratqan Iye qulın keshiriwin ótinemen: mırzam Rimmonnıń butxanasına tabınıw ushın barǵanda, ol meniń qolıma súyenedi. Sol waqıtta, Rimmonnıń butxanasında men de onıń menen birge tájim qılaman. Sonda Jaratqan Iye meni keshirsin.

19Elisha oǵan:

– Aman-esen kete ber, – dedi.

Naaman sol jerden shıǵıp, biraz uzaqlasqanda, 20Qudaydıń adamı bolǵan Elishanıń xızmetshisi Gexaziy ishinen bılay dedi: «Mırzam bul aramlı Naamannıń ákelgen sawǵaların alıwdan bas tarttı. Tiri Jaratqan Iye haqı ant ishemen: men onıń izinen quwıp jetip, onnan bir nárseler alaman». 21Solay etip, Gexaziy Naamandı quwıp ketti.

Naaman izinen birewdiń quwıp kiyatırǵanın kórgende, arbadan tústi de, onı qarsı alıp:

– Amanlıq pa? – dep soradı.

22Gexaziy oǵan:

– Amanlıq, – dep juwap berdi. – Mırzam meni: «Jańa ǵana Efrayımnıń tawlı úlkesindegi payǵambarlar toparınan eki jigit kelip qaldı. Olarǵa bir talant gúmis hám eki qatar kiyim bersin», – degen xabar menen jiberdi.

23Naaman:

– Ótinemen, eki talant gúmis al, – dedi. Onı kóndirip, eki talant gúmisti eki dorbaǵa salıp bayladı hám eki qatar kiyim qosıp berip, olardı óziniń eki xızmetshisine kótertti. Olar Gexaziydiń aldında júrdi. 24Tóbeshikke jetkende, Gexaziy zatlardı olardıń qolınan alıp, úyge jasırdı hám adamlardı izine qaytarıp jiberdi. 25Keyin ózi Elishanıń aldına keldi. Elisha onnan:

– Gexaziy qay jaqtan kiyatırsań? – dep soradı.

Gexaziy:

– Qulıńız hesh jaqqa barmadı, – dep juwap berdi.

26Sonda Elisha oǵan:

– Sol adam arbasınan túsip, seni qarsı alǵanda ruwxım seniń menen birge emes pe edi? Házir gúmis, kiyim, záytún hám júzim baǵların, mayda hám iri mallar, qul hám shorılar alatuǵın waqıt pa? 27Usı isiń ushın Naamannıń jaman teri keselligi máńgige saǵan hám seniń urpaǵıńa jabıssın, – dedi. Gexaziy Elishanıń aldınan shıqqanda, onıń jaman teri keselligine shalınǵan denesi túlep ketken edi.