2Ki 6 | KaaIBT22L | STEP | Bir kúni payǵambarlar toparındaǵılar Elishaǵa: – Qarań, siziń janıńızdaǵı bizler jasaytuǵın jer júdá tar.

‏ 2 Kings 6

Baltanıń basınıń suw betine qalqıp shıǵıwı

1 Bir kúni payǵambarlar toparındaǵılar Elishaǵa:

– Qarań, siziń janıńızdaǵı bizler jasaytuǵın jer júdá tar. 2 Sonlıqtan Iordan dáryasınıń boyına barayıq hám hár qaysısımız bir aǵashtan kesip alıp, sol jerge baspana qurayıq, – dedi.

Elisha olarǵa:

– Barıńlar, – dedi. 3 Olardan biri:

– Iltimas, siz de bizler menen birge júriń, – dedi.

Elisha oǵan:

– Yaqshı, baraman, – dedi de, 4 olar menen birge ketti. Olar Iordanǵa kelip, aǵash kese basladı. 5 Olardan biri aǵash shawıp atırǵanda, baltasınıń bası suwǵa túsip ketti. Sonda ol:

– Way, mırzam, baltanı az-maz waqıtqa sorap alǵan edim! – dep shırlap qoya berdi.

6 Qudaydıń adamı onnan:

– Ol qay jerge tústi? – dep soradı. Sol adam baltanıń bası túsken jerdi kórsetti. Elisha bir shaqanı kesip alıp, sol jerge ılaqtırıp jibergende, baltanıń bası suwdıń betine qalqıp shıqtı. 7 Elisha:

– Onı al, – dedi. Adam qolın sozıp, baltanıń basın aldı.

Aram áskerleri hám Elisha

8 Aram patshası Izrailǵa qarsı urısqa atlandı. Ol óz xızmetshileri menen másláhátleskennen soń: «Men mına hám mına jerlerge orda quraman», – dedi.

9 Qudaydıń adamı Izrail patshasına: «Ol jerden ótpeń, sebebi aramlılar sol jerge buqqı taslap jatır», – degen xabar jiberdi. 10 Sonda Izrail patshası Qudaydıń adamınıń aytqan jerin tekserip kórdi. Bir emes, bir neshe márte Elisha patshaǵa aldın ala eskertti. Solay etip, patsha sol jerlerge barǵanda saq boldı. 11 Buǵan Aram patshasınıń qattı ashıwı keldi hám xızmetshilerin shaqırıp, olarǵa:

– Maǵan aytıńlar, qaysı birińiz Izrail patshasınıń jansızısız? – dedi. 12 Sonda xızmetshilerden biri:

– Taqsır, hesh birimiz. Bulardı Izrail patshasına bildirip turatuǵın Izrailda jasaytuǵın payǵambar Elisha boladı. Ol hátte, jatatuǵın bólmeńizde aytılǵanlardı da oǵan jetkizip turadı, – dedi.

13 Patsha:

– Onda barıp, onıń qay jerde ekenin bilińler. Adam jiberip, onı qolǵa túsireyin, – dedi. Patshaǵa: «Elisha Dotanda eken», – dep xabarladı. 14 Patsha ol jerge atlar, sawash arbaların hám láshkerler toparın jiberdi. Olar túnde kelip, qalanı qorshap aldı.

15 Qudaydıń adamınıń xızmetshisi azanda erte turıp, sırtqa shıqsa, qala átirapınıń láshkerler, atlar hám sawash arbaları menen qorshalǵanın kórdi. Ol Elishaǵa:

– Way mırzam, endi ne qılamız? – dedi.

16 Elisha oǵan:

– Qorqpa, sebebi bizlerdiń tárepdarlarımız olardikinen kóp, – dedi. 17 Sońınan Elisha: «Jaratqan Iye, ol kóriwi ushın, onıń kózlerin asha gór», – dep duwa etti. Jaratqan Iye xızmetshiniń kózlerin ashtı. Sonda ol Elishanıń dógeregindegi tawlardıń otlı atlar menen sawash arbalarına tolıp turǵanın kórdi.

18 Aramlılar Elishaǵa hújim qıla baslaǵanda, Elisha Jaratqan Iyege duwa etip: «Bul adamlardı soqır qılıp taslay gór», – dedi. Elishanıń sózi boyınsha, Jaratqan Iye olardı soqır qılıp tasladı.

19 Keyin Elisha olarǵa:

– Joldan adasıpsız, sizler izlegen qala bul emes. Maǵan erińler, sizlerdi izlegen adamıńızdıń aldına alıp baraman, – dedi de, olardı Samariyaǵa baslap keldi.

20 Olar Samariyaǵa kelgende, Elisha:

– Jaratqan Iye! Olar kóriwi ushın olardıń kózlerin asha gór, – dedi. Jaratqan Iye olardıń kózlerin ashtı hám olar ózleriniń Samariyanıń ortasında turǵanın kórdi.

21 Izrail patshası olardı kórgende Elishaǵa:

– Mırzam, olardı qırıp taslayın ba? – dedi.

22 Elisha patshaǵa:

– Yaq, qırıp taslamań. Olardı óltiretuǵınday, siz olardı óz qılıshıńız hám óz oq jayıńız benen qolǵa alıp pa edińiz? Olarǵa nan hám suw beriń, iship-jesin hám óz húkimdarına qaytsın, – dedi.

23 Patsha aramlılar ushın úlken zıyapat berdi hám iship-jep bolǵannan keyin, olardı óz húkimdarına qaytarıp jiberdi. Bunnan soń, aramlı basqınshılar Izrail jerine qaytıp kelmedi.

Samariyadaǵı ashlıq

24 Keyinirek Aram patshası Ben-Hadad óziniń barlıq áskerlerin jıynap kelip, Samariyanı qamal qıldı. 25 Olar qalanı qamal qılıp turǵanda, onda qattı ashlıq boldı. Solay etip bir eshektiń gellesi seksen shekel gúmiske, bir uwıs kepter qıyı ^{▼▼ Kepter qıyı – awqatlıq yamasa otın ushın paydalanılǵan bolıwı múmkin. Jáne de, quwırılǵan lobiyanıń yamasa basqa dánlerdiń kepegi bolıwı múmkin.} bes shekel gúmiske satıldı.

26 Bir kúni Izrail patshası qala diywalı ústi menen ketip baratırǵanda, bir hayal:

– Taqsır, járdem beriń, – dep dad saldı.

27 Patsha oǵan:

– Eger Jaratqan Iye saǵan járdem bermese, men qalay járdem bere alaman? Biyday da, sharap ta bere almayman, – dedi de, 28 sońınan: – Ne demekshiseń? – dedi.

Hayal bılay dedi:

– Mına hayal maǵan: «Ulıńdı ber, onı búgin jeyik, al menikin erteń jeymiz», – degen edi. 29 Sóytip bizler ulımdı pisirip jedik. Erteńine men oǵan: «Ulıńdı ber, jeyik», – desem, ol ulın jasırıp tasladı.

30 Patsha hayaldıń sózin esitkende, kiyimlerin jırtıp, diywaldıń ústi boylap júrdi. Sonda xalıq onıń ishten aza kiyimin kiyip júrgenin kórdi. 31 Patsha: «Eger usı búgin Shafat ulı Elishanıń bası denesinen juda qılınbasa, Quday meni jazalaǵan ústine jazalasın», – dedi.

32 Elisha aqsaqallar menen óz úyinde otırǵan edi. Patsha bir adamdı Elishaǵa jiberdi. Sol adam ele Elishaǵa jetip kelmesten aldın Elisha aqsaqallarǵa:

– Bul qanxordıń meniń basımdı kestiriw ushın adam jiberip atırǵanın kórip tursız ba? Sol adam kelgende, qapını ilip taslań, onı ishke kirgizbeń. Onıń izinde mırzasınıń da ayaq sesleri esitilip tur, – dedi.

33 Elisha ele olar menen sóylesip otırǵanda, patsha onıń aldına kelip:

– Mine, Jaratqan Iye qanday apatshılıq jiberdi! Endi Jaratqan Iyeden ne kúte alaman? – dedi.