2Ki 7 | KaaIBT22L | STEP | Elisha buǵan bılay dep juwap berdi: – Jaratqan Iyeniń sózin tıńlańlar! Jaratqan Iye bılay deydi: «Erteń usı waqıtta Samariya dárwazasındaǵı bazarda bir sea sapalı un da, eki sea arpa da bir shekelge satıladı».

‏ 2 Kings 7

1 Elisha buǵan bılay dep juwap berdi:

– Jaratqan Iyeniń sózin tıńlańlar! Jaratqan Iye bılay deydi: «Erteń usı waqıtta Samariya dárwazasındaǵı bazarda bir sea ^{▼▼ Bir sea – shama menen 7,5 l.} sapalı un da, eki sea arpa da bir shekelge satıladı».

2 Sonda patsha súyenip júretuǵın áskerbası Qudaydıń adamına:

– Eger Jaratqan Iye aspan qaqpaqların ashsa da, bulay bola qoymas, – dedi.

Elisha oǵan:

– Sen hámmesin óz kóziń menen kóreseń, biraq onnan jew saǵan nesip etpeydi, – dedi.

Qamal etiwdiń toqtawı

3 Qala dárwazasınıń sırtında jaman teri keselligine shalınǵan tórt adam bar edi. Olar bir-birine: «Ólimimizdi kútip bul jerde otıra berip ne qılamız? 4 Qalaǵa kireyik desek, ol jerde ashlıq bolıp atır, ashlıqtan ólemiz. Al bul jerde otıra bersek te, ólemiz. Jaqsısı, aramlılardıń ordasına barayıq. Eger óltirmese, tiri qalarmız, óltirse ólip ketermiz», – dedi.

5 Olar aramlılardıń ordasına barıw ushın tań qarańǵısında turıp, ordanıń shetine kelse, ol jerde birde bir adam joq eken. 6 Sebebi Iyemiz Aram ordasına sawash arbalarınıń taqır-tuqırlısın, atlardıń kisnewin hám kóp áskerlerdiń shawqım-súrenin esittirgen edi. Sonda aramlılar bir-birine: «Izrail patshası bizlerge hújim jasaw ushın Xet hám Mısır patshaların jallap alǵan qusaydı», – desti. 7 Olar tań qarańǵısında shatırların, atların, esheklerin yaǵnıy pútkil ordasın taslap, bas sawǵalap qashıp ketken edi.

8 Jaman teri keselligine shalınǵan adamlar ordanıń shetine keldi hám bir shatırǵa kirip, iship-jedi. Ol jerden gúmis, altın hám kiyimler alıp, olardı jasırıp qayttı. Keyin qaytıp kelip, basqa shatırǵa kirdi hám ol jerden alǵanların da aparıp jasırıp qoydı.

9 Sońınan bir-birine: «Bizlerdiń bul isimiz durıs emes. Búgin quwanıshlı xabarlar kúni. Eger bizler aytıwǵa asıqpay, erteń kún shıqqanǵa deyin kútsek, onda jazaǵa tartılamız. Júriń, patsha sarayına barıp, xabar bereyik», – dedi.

10 Solay etip, olar kelip, qala dárwazasınıń qarawılların shaqırıp, olarǵa bılay dedi:

– Bizler aramlılardıń ordasına barıp edik. Ol jerde birde bir adam joq, adamnıń dawısı da esitilmeydi. Tek baylanǵan atlar menen eshekler hám qalay bolǵan bolsa solay qalǵan shatırlar bar eken.

11 Dárwaza qarawılları jar salıp, xabardı patsha sarayına jetkizdi. 12 Patsha tún ortasında tóseginen turıp, xızmetshilerine:

– Aramlılardıń qanday joba dúzip atırǵanın sizlerge aytıp qoyayın: olar bizlerdiń asharshılıqtı bastan keshirip atırǵanımızdı biledi. Olar: «Izraillılar qaladan shıqqanda, olardı tiriley qolǵa túsirip, qalaǵa kirip alamız», – dep oylap, atızlarǵa jasırınıw ushın, shatırların taslap ketken, – dedi.

13 Sonda xızmetshilerinen biri patshaǵa:

– Qalada qalǵan bes attı alıp, jaǵdaydı bilip keliw ushın bir neshe adam jibereyik. Ol jerge barǵanlar da, qalada qalǵanlar da bári bir óledi, – dedi.

14 Olar hár birine jup attan jegilgen eki sawash arbasın aldı. Patsha: «Barıp, kórińler», – dep olardı aram áskerleriniń izinen jiberdi. 15 Olar aramlılardıń izi menen Iordan dáryasına deyin bardı. Pútkil jol boyı aramlılardıń asıǵıp qashıp baratırıp ılaqtırıp ketken kiyim hám zatlarına tolı edi. Jiberilgen adamlar qaytıp kelip, jaǵdaydı patshaǵa jetkizdi. 16 Sonda xalıq qaladan shıǵıp, Aram ordasın talan-taraj qıldı. Jaratqan Iyeniń sózi boyınsha, bir sea sapalı un da, eki sea arpa da bir shekelge satıldı.

17 Patsha ózi súyenip júretuǵın áskerbasını dárwaza awzına qoyǵan edi. Ol dárwazanıń aldında adamlardıń ayaǵınıń astında qalıp, óldi. Patsha Qudaydıń adamınıń aldına barǵanda, ol patshaǵa usılay bolatuǵının aytqan edi. 18 Hámmesi Qudaydıń adamınıń patshaǵa aytqanınday boldı. Ol patshaǵa: «Erteń usı waqıtlarda Samariya dárwazasındaǵı bazardıń aldında eki sea arpa da, bir sea sapalı un da bir shekelge satıladı», – degende, 19 usı áskerbası Qudaydıń adamına: «Jaratqan Iye aspan qaqpaqların ashsa da, bunday bola qoymas», – dep juwap bergen edi. Sonda Elisha oǵan: «Sen bunı óz kózleriń menen kóreseń, biraq onnan jew saǵan nesip etpeydi», – degen edi. 20 Solay boldı da. Ol dárwazanıń aldında adamlardıń ayaǵınıń astında qalıp, óldi.