‏ 2 Kings 9

Ehudıń Izrailǵa patsha bolıwı

1Sol kúnleri payǵambar Elisha payǵambarlar toparındaǵılardan birin shaqırıp, oǵan bılay dedi:

– Belińdi buwıp, mına záytún mayı quyılǵan ıdıstı al da, Giladtaǵı Ramotqa bar. 2Sol jerge barıwdan Nimshiydiń aqlıǵı Ehoshafattıń ulı Ehudı tap. Onı joldaslarınıń arasınan shaqırıp alıp, ishki bólmege alıp bar. 3Keyin záytún mayı quyılǵan ıdıstı alıp, maydı onıń basına quy hám oǵan bılay dep ayt: «Jaratqan Iye bılay deydi: „Seni maylap, Izrail ústinen patsha etip qoydım“». Sońınan irkilmey, qapını ash ta qash.

4Solay etip, payǵambardıń xızmetshi jigiti Giladtaǵı Ramotqa ketti. 5Jigit sol jerge jetip barǵanda, áskerbasılardıń bir jerge jıynalıp otırǵanın kórdi. Ol:

– Háy áskerbası, sizge aytar gápim bar, – dedi.

Ehu onnan:

– Qaysı birimizge? – dep soradı.

Jigit oǵan:

– Sizge, áskerbası, – dedi.

6Ehu ornınan turıp, úyge kirdi. Jigit záytún mayın Ehudıń basına quydı da bılay dedi:

– Izraildıń Qudayı Jaratqan Iye bılay deydi: «Seni maylap, xalqım Izrail ústinen patsha etip qoydım. 7Sen mırzań Axabtıń urpaǵın qırıp taslaysań. Meniń qullarım bolǵan payǵambarlarımnıń hám barlıq qullarımnıń tógilgen qanı ushın Men Izabelden ósh alaman. 8Axabtıń pútkil urpaǵı joq boladı. Izrailda Axabtıń urpaǵınan bolǵan hár bir erkek zatın, azat bolsın, qul bolsın hámmesin joq qılaman. 9Nabat ulı Yarobam menen Axiya ulı Baashanıń urpaǵına ne qılǵan bolsam, Axabtıń urpaǵına da sonı isleymen. 10Izabeldiń denesin Izreel jerinde iytlerge jem qılaman hám onıń denesi kómiwsiz qaladı».

Jigit usılardı aytıp bola sala, qapını ashıp, qashıp ketti.

11Ehu shıǵıp, patshanıń áskerbasılarınıń janına kelgende, olardan biri Ehudan:

– Tınıshlıq pa? Ana telbe saǵan nege kelipti? – dep soradı.

Ehu oǵan:

– Sizler onıń kim ekenin de, ne aytatuǵının da bilesiz-ǵo, – dep juwap berdi.

12Olar:

– Sen aldap tursań, bizlerge de aytshı, – dedi.

Ehu olarǵa bılay dedi:

– Ol maǵan mına nárselerdi ayttı: «Jaratqan Iye bılay deydi: „Seni maylap, Izrail ústinen patsha etip qoydım“».

13Sonda olar asıǵıs túrde shapanların sheship, olardı Ehu turǵan tekshege tósedi hám kárnay shalıp: «Ehu patsha boldı!» – dep jar sala basladı.

Ehudıń Ioramdı óltiriwi

14Solay etip, Nimshiydiń aqlıǵı Ehoshafat ulı Ehu Ioramǵa qarsı til biriktirdi. Sol waqıtları Ioram Izrail xalqı menen birge Giladtaǵı Ramottı Aram patshası Xazaelden qorǵap turǵan edi. 15Biraq patsha Ioram Aram patshası Xazael menen bolǵan urısta jaraqatlanıp, emleniw ushın Izreelge qaytqan edi. Ehu qasındaǵılarǵa bılay dedi:

– Eger sizler men tárepte bolsańız, onda hesh bir adamnıń bul qaladan shıǵıp ketip, Izreelge xabar jetkeriwine jol qoymańlar.

16Sońınan Ehu sawash arbasına minip, Ioram jatırǵan jerge, Izreelge keldi. Yahuda patshası Axaziya da Ioramdı kóriw ushın sol jerge kelgen edi.

17Izreeldegi minara ústinde turǵan gúzetshi Ehudıń áskerleri menen jaqınlasıp kiyatırǵanın kórip:

– Áskerler toparın kórip turman, – dep baqırdı.

Ioram:

– Olardı qarsı alıp, ne ushın kiyatırǵanın bilip keliw ushın bir atlını jiber, – dedi.

18Atlı Ehudı qarsı alıw ushın ketti hám oǵan:

– Patshamız: «Tınıshlıq pa?» – dep sorap atır, – dedi.

Ehu oǵan:

– Tınıshlıq pa, joq pa, saǵan ne? Onnansha meniń izime er, – dedi.

Gúzetshi: «Atlı olardıń janına jetip bardı, biraq izine qaytpadı», – dep xabarladı.

19Sonda ekinshi bir atlı jiberildi. Atlı olarǵa barıp:

– Patshamız: «Tınıshlıq pa?» – dep sorap atır, – dedi.

Ehu oǵan:

– Tınıshlıq pa, joq pa, saǵan ne? Onnansha meniń izime er, – dedi.

20Gúzetshi: «Atlı olardıń janına jetip bardı, biraq izine qaytpadı. Kiyatırǵan adamnıń arbasınıń júrisi Nimshiy ulı Ehudikine uqsaydı. Sebebi ol qutırıp shawıp kiyatır», – dep xabarladı.

21Sonda Ioram:

– Arbanı jegińler! – dep buyırdı. Onıń arbasın jekti. Izrail patshası Ioram hám Yahuda patshası Axaziya hár biri óz arbasına minip, Ehudı qarsı alıwǵa shıqtı hám olar izreelli Nabottıń atızında ushırastı. 22Ioram Ehudı kórgende, onnan:

– Ehu, tınıshlıq pa? – dep soradı.

Ehu oǵan:

– Anań Izabel baslaǵan butparazlıq hám sıyqırshılıqlar dawam eter eken, qalay tınıshlıq bolsın? – dep juwap berdi.

23Sonda Ioram Axaziyaǵa:

– Satqınlıq bul, Axaziya, satqınlıq! – dep baqırıwı menen arbasınıń dizginin burıp, qasha jóneldi.

24Al Ehu oq jayın bar kúshi menen kerip, Ioramnıń jawırınına attı hám oq onıń júregin tesip ótti. Ioram arbasınıń ishine quladı. 25Sonda Ehu áskerbası Bidqarǵa:

– Onı alıp, izreelli Nabottıń atızına ılaqtırıp jiber. Sebebi yadıńa túsir, bizler ekewimiz birge Ioramnıń ákesi Axabtıń izinen barǵanımızda, Jaratqan Iye Axabqa qarsı mına sózlerdi aytqan edi: 26«Keshe Nabottıń hám onıń ullarınıń qanın kórdim. Sennen usı atızda ósh alaman». Endi Jaratqan Iyeniń sózi boyınsha onıń denesin alıp, atızǵa ılaqtır, – dedi.

Yahuda patshası Axaziyanıń óltiriliwi

27Yahuda patshası Axaziya bunı kórgende, Beyt-Hagganǵa qaray qashtı. Ehu onı quwıp baratırıp:

– Onı da óltiriń, – dep baqırdı. Axaziyanı Ibleam janındaǵı Gur jolında, arbasında turǵan jerinde oq jay menen attı. Ol Megiddoǵa qashıp barıp, sol jerde jan tapsırdı. 28Adamları onıń denesin arba menen Erusalimge alıp keldi hám Dawıttıń qalasındaǵı ata-babalarınıń qasına, óz qábirine qoydı.

29Axaziya Axab ulı Ioramnıń patshalıǵınıń on birinshi jılında Yahudaǵa patsha bolǵan edi.

Izabeldiń óltiriliwi

30Keyin Ehu Izreelge keldi. Izabel bolǵan waqıyalardı esitip, kózlerine súrme jaǵıp, shashların sulıwlap, terezeden qarap turǵan edi. 31Ehu dárwazadan kirgende, Izabel oǵan:

– Háy, óz húkimdarın óltirgen Zimriy, tınıshlıq pa? ▼

▼ 3Pat 16:9-10.

– dedi.

32Ehu terezege qarap:

– Kim men tárepte, kim? – dedi. Sonda eki-úsh saray xızmetshisi Ehuǵa boy kórsetti. 33Ehu olarǵa:

– Onı tómenge ılaqtırıńlar! – dedi. Xızmetshiler Izabeldi jerge ılaqtırdı. Onıń qanı diywalǵa hám atlarǵa shashırap, atlar onıń denesin basqılap tasladı.

34Ehu ishke kirip iship-jedi hám sońınan:

– Bul ǵarǵıs urǵan hayaldı tawıp, jerleńler. Óytkeni ol patsha tuqımınan ǵoy, – dedi. 35Biraq Izabeldi jerlew ushın ketkenler onıń bas súyegi hám ayaq-qollarınan basqa hesh nársesin tappadı. 36Olar qaytıp kelip, bunı Ehuǵa xabarladı. Sonda Ehu bılay dedi: «Jaratqan Iyeniń qulı tishbeli Iliyas arqalı aytqan sózi orınlandı. Jaratqan Iye: „Izabeldiń denesi Izreel atızlarında iytlerge jem boladı. 37Awa, Izabeldiń denesi Izreel atızlarına tógilgen tóginge uqsap qaladı hám hesh kim onı bul Izabel-ǵo dep aytpaydı“, – degen edi».