2Pe 1 | KaaIBT22L | STEP | Iysa Masiyxtıń qulı hám elshisi Shimon Petrden, Qudayımız hám Qutqarıwshımız Iysa Masiyxtıń haqlıǵı arqalı bizler alǵan qımbatlı isenimge teń isenimdi sıyǵa alǵanlarǵa sálem!

‏ 2 Peter 1

Sálemnama

1 Iysa Masiyxtıń qulı hám elshisi Shimon Petrden, Qudayımız hám Qutqarıwshımız Iysa Masiyxtıń haqlıǵı arqalı bizler alǵan qımbatlı isenimge teń isenimdi sıyǵa alǵanlarǵa sálem! 2 Qudaydı hám Iyemiz Iysanı haqıyqattan bilip barıwıńız arqalı sizlerge miyrim hám tınıshlıq mol-mol etip berilsin!

Shaqırılıw hám tańlap alınıw

3 Qudaylıq qúdiretke iye Iysa Masiyx Ózin biliwimiz arqalı jasawımız hám Qudaydıń jolı menen júriwimiz ushın bizlerge kerekli bolǵan hámme nárseni berdi. Ol bizlerdi Óz ullılıǵın hám iygiligin alıwımız ushın shaqırdı. 4 Quday Óz ullılıǵı hám iygiligi arqalı bizlerge júdá úlken hám qımbatlı wádeler berdi. Solay etip, bul wádeler sebepli sizler dúnyadaǵı jaman qálewlerden qutılıp, qudaylıq tábiyatqa sherik bolasızlar. 5 Sonlıqtan sizler bar kúshińizdi sarp etip, isenimińizge jaqsılıqtı, jaqsılıqqa bilimdi, 6 bilimge nápsini tıyıwdı, nápsini tıyıwǵa sabırlılıqtı, sabırlılıqqa Qudayǵa baǵıshlanıwdı, 7 Qudayǵa baǵıshlanıwǵa tuwısqanlıq súyispenshilikti, tuwısqanlıq súyispenshilikke súyispenshilikti qosıp arttırıńlar. 8 Eger bul jaqsı qásiyetler sizlerde bar bolıp, artıp atırǵan bolsa, onda Iyemiz Iysa Masiyxtı biliwde tabıssız hám jemissiz bolmaysız. 9 Bul jaqsı qásiyetlerge iye bolmaǵan adam uzaqtı kóre almaytuǵın soqır adam bolǵanı. Ol burınǵı gúnalarınan tazalanǵanın umıtqan adam demek.

10 Sonlıqtan háy tuwısqanlarım, Qudaydıń sizlerdi shaqırǵanı hám tańlap alǵanı haqıyqat ekenin kórsetiw ushın, ele de kúsh-ǵayrat salıńlar. Usılay isleseńiz, hesh qashan súrnikpeysiz. 11 Solay etip, Iyemiz hám Qutqarıwshımız Iysa Masiyxtıń máńgilik Patshalıǵına kiriw jolı sizlerge keń ashıladı.

Muxaddes Jazıwlarǵa dıqqat awdarıńlar!

12 Sol sebepten sizler bulardı bilip, ózińizdegi haqıyqattı bekkem tutsańlar da, men usılardı sizlerge hámme waqıt esletip turıwǵa tayarman. 13 Bul denede jasaǵan waqtımda yadıńızda bolǵan nárselerdi esletip turıwdı durıs dep taptım. 14 Óytkeni Iyemiz Iysa Masiyxtıń maǵan bildiriwi boyınsha, bul deneden ayırılatuǵın waqtımnıń jaqın ekenin bilemen. 15 Men bul dúnyadan ketkenimnen soń da bulardı hámme waqıt eslep tura alıwıńız ushın, jan-tánim menen tırısaman.

16 Bizler ^{▼▼ Bizler – Petr, Yuxan, Yaqıp (Mat 17:1-5; Mrk 9:2-7; Luk 9:28-35.)} Iyemiz Iysa Masiyxtıń qúdiretin hám qayta keliwin sizlerge málim etkenimizde, yadtan oylap tabılǵan ańızlarǵa tiykarlanbadıq. Al Onıń ullılıǵın óz kózlerimiz benen kórgen edik. 17 Sebebi qúdiretli hám ullı Qudaydan Iysaǵa: «Bul – Meniń súyikli Ulım, Men Oǵan ırzaman», – degen saza esitilgende, Ol Quday Ákeden dańq hám saltanat aldı. 18 Onıń menen birge muxaddes tawda bolǵanımızda, aspannan kelgen usı sazanı bizler de esittik.

19 Jáne bizlerde ele de isenimlirek bolǵan payǵambarlardıń sózleri bar. Tań atıp, tań juldızı jarqıraǵanday, júreklerińiz tolıq túsinik alatuǵın kúnge deyin qarańǵı jerde nurın shashqan shıraǵa uqsaǵan payǵambarlardıń sózlerine dıqqat awdarsańız, jaqsı qılasızlar. 20 Aldı menen mınanı bilip qoyıńlar: Muxaddes Jazıwda bolǵan hesh bir payǵambarshılıq sózin hesh kimge óz betinshe túsindiriwge bolmaydı. 21 Óytkeni hesh bir payǵambarshılıq sózi adamnıń qálewi menen aytılǵan emes. Al Muxaddes Ruwx ^{▼▼ Muxaddes Ruwx – Qudaydıń Ruwxı.} tárepinen basqarılǵan adamlar Qudaydıń sózlerin aytqan.