2Pe 2 | KaaIBT22L | STEP | Biraq, burın Izrail xalqı arasında jalǵan payǵambarlardıń bolǵanı sıyaqlı, sizlerdiń arańızda da jalǵan ustazlar boladı. Olar arańızǵa jasırın túrde azǵın tálimatlar kirgizip, hátte, ózlerin Óz qanın tólep satıp alǵan Iyesin de tán almaydı. Solay etip, bundaylardıń is-háreketi olardı tez arada nabıt bolıwǵa alıp keledi.

‏ 2 Peter 2

Jalǵan ustazlar haqqında

1 Biraq, burın Izrail xalqı arasında jalǵan payǵambarlardıń bolǵanı sıyaqlı, sizlerdiń arańızda da jalǵan ustazlar boladı. Olar arańızǵa jasırın túrde azǵın tálimatlar kirgizip, hátte, ózlerin Óz qanın tólep satıp alǵan Iyesin de tán almaydı. Solay etip, bundaylardıń is-háreketi olardı tez arada nabıt bolıwǵa alıp keledi. 2 Kóp adamlar olardıń buzıqlıǵına eredi. Olar sebepli haqıyqat jolına til tiyedi. 3 Olar nápsiqawlıǵı sebepli ózleri oylap tapqan jalǵan sózlerdi aytıp, sizlerden paydalanadı. Olardıń húkimi áwelden-aq tayar turǵan bolıp, olar kóp keshikpey nabıt etiledi.

4 Sebebi Quday gúna islegen perishtelerdi de ayamaǵan. Olardı húkim etiletuǵın kúnge deyin saqlansın dep, tas túnek dozaqqa ılaqtırıp, qarańǵılıqqa qamap qoyıptı. 5 Quday qudaysızlardıń dúnyasına topan suwın jibergende, áyyemgi dúnyanı da ayamadı. Biraq, haqıyqatlıq jarshısı bolǵan Nuxtı hám onnan basqa jeti adamdı aman saqlap qaldı ^{▼▼ Jar 6:1–7:24.}. 6 Sodom hám Gomora qalaların da húkim etip, kúlge aylandırdı ^{▼▼ Jar 18:16–19:28.}. Bul arqalı keleshekte qudaysızlardıń basına túsetuǵınlardı mısal etip kórsetti. 7 Al ar-namıssız adamlardıń buzıqlıǵınan azap shekken haq adam Luttı Quday qutqardı ^{▼▼ Jar 19:1-16.}. 8 Olardıń arasında jasaǵan bul haq adamnıń pák kewli olardıń nahaq islerin kórip hám esitip turıp, kún sayın qıynalatuǵın edi. 9 Solay etip, Jaratqan Iye Óz jolı menen júretuǵın adamlardı qıyınshılıqlardan qalay qutqarıwdı hám nahaq adamlardı húkim shıǵarılatuǵın qıyamet-qayım kúnine deyin qalay saqlap, jazalawdı biledi. 10 Ásirese óziniń gúnakar tábiyatınıń buzıq qálewlerine berilip, Qudaydıń biyligin mensinbeytuǵın nahaq adamlardıń táǵdiri usılay boladı.

Sol sıyaqlı, uyatsız hám ójet adamlar bolǵan jalǵan ustazlar ullılıqqa iye bolǵanlarǵa til tiygiziwden qorqpaydı. 11 Perishtelerdiń kúsh hám qúdireti jalǵan ustazlardan anaǵurlım ullıraq bolsa da, perishteler Jaratqan Iye aldında olardı masqaralap ayıplamaydı. 12 Biraq bul jalǵan ustazlar ózleri túsinbeytuǵın zatlarǵa til tiygizedi. Uslap alınıp nabıt qılınıw ushın tuwılǵan sanasız hám tábiyǵıy sezim boyınsha jasaytuǵın haywanlarday bolǵan olar sol haywanlar sıyaqlı nabıt boladı. 13 Olar islegen jaman islerine ılayıq jaza aladı. Bular kúndiz ayshı-áshiretke beriliwdi ómirdiń mazmunı dep biledi. Sizlerdiń júzińizdi qara qılıp, daq túsiretuǵın bul adamlar sizler menen birge zıyapatta otırǵanda, óz ótiriginen ráhátlenedi. 14 Olardıń kózleri buzıqshılıqqa tolǵan bolıp, olar úzliksiz gúna isleydi. Isenimi hálsiz adamlardı joldan azǵıratuǵın bul adamlar – nápsiqaw hám ǵarǵıs urǵan adamlar. 15 Tuwrı joldı taslap adasqan olar nahaq jol menen payda kóriwdi jaqsı kórgen Beor ulı Bilamnıń jolın tuttı. 16 Biraq ol islegen gúnası ushın áshkara etilgen edi: tilsiz eshek tilge kirdi, ol adamday bolıp sóylep, payǵambardıń aqılsız isine tosqınlıq jasaǵan edi ^{▼▼ San 22:4-35.}.

17 Bul adamlar suwsız bulaqlar, dawıl aydaǵan duman. Olar ushın tas túnek qarańǵılıq tayar tur. 18 Óytkeni olar nadurıs jol menen júretuǵın adamlardan álle qashan qutılǵanlardı bos hám lap sózler menen aldap, gúnakar tábiyattıń buzıq qálewlerine baslaydı. 19 Ózleri azǵınlıqtıń qulı bola tura, olarǵa azatlıqtı wáde etedi. Sebebi adam neden jeńilse, sonıń qulı boladı. 20 Adamlar Iyemiz hám Qutqarıwshımız Iysa Masiyxtı bilip, dúnyanıń napákliklerinen qutılǵannan soń, jáne sol nárselerdiń duzaǵına túsip, olardan jeńilse, onda keyingi awhalı burınǵıdan da jaman boladı. 21 Óytkeni haqıyqatlıq jolın bilgennen soń, berilgen muxaddes buyrıqtan júz burǵannan góre, bul joldı hesh bilmegen olar ushın jaqsıraq bolar edi. 22 Olardıń ómirinde ushırasatuǵın bunday awhalǵa mına naqıl sózler tuwrı keledi: «Iyt óz qusıǵına qaytadı,
Shoshqa juwındırılǵannan soń,
Barıp batpaqqa awnaydı» ^{▼▼ Hkm 26:11.}.