‏ 2 Samuel 1

Dawıttıń Shauldıń ólimi tuwralı esitiwi

1Shaul patsha qaza tapqan edi. Sol arada Dawıt amalekler ústinen jeńiske erisip, Siklag qalasına qaytıp keldi hám ol jerde eki kún qaldı. 2Úshinshi kúni Shauldıń ordasınan qayǵısınıń belgisi retinde kiyimlerin jırtıp, basına topıraq shashqan bir adam keldi. Ol Dawıtqa jaqınlasqannan jerge jıǵılıp, oǵan tájim etti. 3Dawıt onnan:

– Qay jerden kiyatırsań? – dep soradı.

Sol adam Dawıtqa:

– Izrail ordasınan qashıp qutıldım, – dep juwap berdi.

4Dawıt oǵan:

– Ne boldı? Maǵan aytıp ber, – dedi.

Sol adam Dawıtqa:

– Áskerler sawash maydanınan qashıp ketti. Olardıń kópshiligi qırılıp qaldı. Solardıń ishinde Shaul menen onıń ulı Ionatan da óldi, – dedi.

5Sonda Dawıt xabarshı jigitten:

– Shauldıń hám onıń ulı Ionatannıń ólgenin qayaqtan bileseń? – dep soradı.

6Jigit Dawıtqa bılay dep juwap berdi:

– Tosattan Gilboa tawına barıp qaldım. Qarasam, ol jerde Shaul nayzasına súyenip turǵan eken. Al dushpannıń sawash arbaları menen arbakeshleri bolsa, oǵan jaqınlasıp kiyatırǵan eken. 7Sonda Shaul artına burılıp, meni kórip qaldı da, qasına shaqırdı. Men oǵan: «Lábbáy», – dedim. 8Ol mennen: «Sen kimseń?» – dep soradı. Men oǵan: «Men bir amalekpen», – dep juwap berdim. 9Shaul maǵan: «Berman kelip, meni óltir. Sebebi janım shıqpay, qıynalıp atırman», – dedi. 10Men janına barıp, onı óltirdim. Óytkeni awır jaraqatlanıp qulaǵannan keyin, tiri qalmaytuǵının bilgen edim. Men onıń basındaǵı tajı menen qolına taǵılǵan shınjırın aldım hám olardı usı jerge, mırzam, sizge alıp keldim.

11Bunı esitken Dawıt hám onıń janındaǵılar qayǵıdan kiyimlerin jırttı. 12Olar qılıshtan qaza tapqan Shaul, onıń ulı Ionatan hám Jaratqan Iyeniń xalqı bolǵan izraillılar ushın keshke shekem joqlaw aytıp jılap, oraza tuttı.

13Dawıt ózine xabar alıp kelgen jigitten:

– Qay jerliseń? – dep soradı.

Jigit oǵan:

– Men bir kelgindi amalektiń ulıman, – dep juwap berdi.

14Sonda Dawıt oǵan:

– Jaratqan Iyeniń maylaǵan adamına qol kóterip, onı óltiriwge qorqpadıń ba? – dedi. 15Sońınan Dawıt adamlarınan birin shaqırıp:

– Bar, onı óltir! – dep buyırdı. Solay etip, sol adam amalek jigitti óltirdi.

16Dawıt amalek jigitke:

– Óz basıńa óziń jettiń. Óytkeni: «Jaratqan Iyeniń maylaǵan adamın men óltirdim», – dep ózińe qarsı óz awzıń menen gúwalıq berdiń, – dedi.

Dawıttıń Shaul hám Ionatan ushın aytqan joqlawı

17Dawıt Shaul hám onıń ulı Ionatan ushın joqlaw ayttı. 18Sońınan bul jır Yahuda xalqına úyretilsin dep buyırdı. «Oq jay» dep atalǵan usı jır Ádildiń kitabında jazılǵan:

19«Háy Izrail! Biyik tóbeshiklerde joq boldı saltanatıń!
Qalay jerge quladı batırlarıń?!
20Bul xabardı Gatqa esittirmeń,
Ashkelon kóshelerinde jayıp júrmeń.
Esitip, filist qızları quwanbasın,
Súnnetsizlerdiń qızları yoshlanbasın.
21Háy, Gilboa tawları,
Ústińizge shıq túsip, jawın jawmasın,
Jerleriń ónim de bermesin.
Sebebi batırlardıń qalqanı,
Endi qaytıp maylanbaytuǵın Shauldıń qalqanı,
Sol jerde qulatıldı.
22Ólgenlerdiń qanısız, batırlardıń tánisiz,
Ionatannıń oq jayı keri qaytpas edi,
Shauldıń qılıshı hesh bos qaytpas edi.
23Shaul menen Ionatan súykimli hám jaǵımlı edi,
Ómirde de, ólimde de birge boldı olar.
Olar búrkitlerden de shaqqanıraq,
Arıslanlardan da kúshlirek edi.
24Háy, Izrail qızları!
Sizlerge bezelgen qırmızı kiyimler kiygizgen,
Kiyimińizdi altın bezeniw buyımları menen bezegen,
Shaul ushın jılańlar!
25Wah, qalay qaza taptı batırlar sawashta!
Biyikligińde jatır óli Ionatan.
26Seniń ushın qayǵıraman, tuwısqanım Ionatan,
Men ushın sen júdá qádirli ediń,
Súyispenshiligiń men ushın,
Artıq edi hayal muhabbatınan.
27Wah, qalay qaza taptı batırlar!
Qalay joq boldı urıs quralları!»