2Sa 10 | KaaIBT22L | STEP | Aradan bir qansha waqıt ótkennen soń, Ammon patshası ólip, onıń ornına ulı Xanun patsha boldı.

‏ 2 Samuel 10

Dawıttıń ammonlar menen aramlardı jeńiwi

1 Aradan bir qansha waqıt ótkennen soń, Ammon patshası ólip, onıń ornına ulı Xanun patsha boldı. 2 Sonda Dawıt: «Ákesiniń maǵan jaqsılıq etkeni sıyaqlı, men de Naxash ulı Xanunǵa jaqsılıq eteyin», – dep oylap, ákesiniń ólimine kewil aytıw ushın, Xanunǵa xızmetshilerin jiberdi.

Dawıttıń xızmetshileri ammonlardıń jerine barǵanda, 3 ammon basshıları óz mırzası Xanunǵa:

– Dawıt bul adamlardı ákeńizdiń húrmeti ushın sizge kewil aytıwǵa jibergen dep oylaysız ba? Yaq, Dawıt olardı qalanı kózden ótkerip, bilip alıw hám qıyratıw ushın sizge jibergen, – dedi.

4 Solay etip, Xanun Dawıttıń xızmetshilerin tutqınǵa alıp, olardıń saqallarınıń yarımın qırqtırdı, shapanların jambasına keletuǵın etip kestirip, olardı izine qaytarıp jiberdi.

5 Dawıt elshileri tuwralı esitkende, olardı kútip alıw ushın adam jiberdi. Óytkeni elshiler qattı xorlanǵan edi. Patsha olarǵa: «Saqalıńız óskenshe, Erixoda qalıńlar, sońınan qaytıp kelesizler», – dedi.

6 Ammonlar Dawıttı ózlerine qarsı óshegistirip alǵanın túsindi. Sonda adam jiberip, Beyt-Rexob penen Sobadan jigirma mıń aramlı piyada áskerdi, Maaxa patshası menen onıń mıń adamın hám Tob aymaǵınan on eki mıń adamdı jallap aldı. 7 Dawıt bunı esitkende, Ioabtı hám márt jawıngerlerden ibarat bolǵan pútkil áskerler toparın olarǵa qarsı atlandırdı. 8 Ammonlar shıǵıp, qala dárwazası aldında sap tartıp turdı. Al Rexob penen Sobadan kelgen aramlar, Tob penen Maaxadan kelgen adamlar menen birge dalada bólek sap tartıp turdı.

9 Ioab dushpan áskerleriniń aldında da, artında da turǵanın kórgende, Izraildıń aǵla áskerlerinen bazıların tańlap alıp, olardı aramlarǵa qarsı sapqa turǵızdı. 10 Qalǵan toparlardı inisi Abishaydıń qolına tapsırdı. Abishay olardı ammonlarǵa qarsı sapqa dizdi. 11 Ioab inisine bılay dedi:

– Eger aramlar mennen basım kelse, sen maǵan járdemge keleseń. Al ammonlar sennen basım kelse, men saǵan járdemge baraman. 12 Márt bol! Xalqımız ushın hám Qudayımızdıń qalaları ushın mártlershe gúreseyik. Jaratqan Iye neni maqul tapsa, sonı islesin.

13 Ioab áskerleri menen birge aramlarǵa táp bergende, aramlar olardıń aldına túsip qashtı. 14 Aramlardıń qashqanın kórgen ammonlar da Abishaydan qashıp, qalaǵa kirip ketti. Bunnan keyin Ioab ammonlar menen urısıwdan waz keship, Erusalimge qaytıp ketti.

15 Ózleriniń izraillılardan jeńilgenin kórgen aramlar bir jerge toplandı. 16 Soba patshası Hadadezer xabar jiberip, Evfrat dáryasınıń arǵı tárepinde jasaytuǵın aramlardı shaqırttı. Aramlar Hadadezerdiń sárkárdası Shobaxtıń basshılıǵında Xelamǵa keldi.

17 Bul Dawıtqa málim bolǵanda, ol pútkil Izrail ordasın topladı da, Iordan dáryasın kesip ótip, Xelamǵa bardı. Aram áskerleri Dawıtqa qarsı sap tartıp turdı hám onıń menen sawash qıldı. 18 Degen menen, aramlar izraillılardıń aldına túsip qashtı. Dawıt olardıń jeti júz sawash arbasınıń arbakeshlerin, qırıq mıń arbalı áskerin óltirip, Hadadezerdiń sárkárdası Shobaxtı jaraqatladı hám ol sawash maydanında jan tapsırdı. 19 Hadadezerdiń qol astındaǵı hámme patshalar ózleriniń izraillılardan jeńilgenin kórgende, izraillılar menen tınıshlıq kelisimin dúzip, olarǵa baǵınıshlı boldı. Bunnan keyin, aram xalqı ammon xalqına járdem beriwden qorqıp qaldı.