2Sa 12 | KaaIBT22L | STEP | Jaratqan Iye payǵambar Natandı Dawıtqa jiberdi. Sonda Natan Dawıtqa kelip, bılay dedi: – Bir qalada eki adam bolıptı. Olardıń birinshisi bay, al ekinshisi kámbaǵal eken.

‏ 2 Samuel 12

Natannıń Dawıttı áshkaralawı

1 Jaratqan Iye payǵambar Natandı Dawıtqa jiberdi. Sonda Natan Dawıtqa kelip, bılay dedi:

– Bir qalada eki adam bolıptı. Olardıń birinshisi bay, al ekinshisi kámbaǵal eken. 2 Bay adamnıń júdá kóp mayda hám iri malları bar eken. 3 Biraq kámbaǵaldıń satıp alıp, baǵıp atırǵan bir urǵashı qozısınan basqa hesh nársesi joq eken. Qozı kámbaǵaldıń úyinde balaları menen birge ósipti. Onıń nanınan jep, kesesinen suw iship, qoynında uyıqlaptı. Sol adam ushın qozı óz qızınday edi. 4 Bir kúni bay adamnıń úyine bir jolawshı kelipti. Kelgen qonaqqa awqat tayarlaw ushın, óziniń qoy hám sıyırlarınan birin soyıwǵa baydıń kózi qıymay, kámbaǵaldıń qozısın alıp, qonaǵına awqat tayarlap beripti.

5 Dawıttıń bay adamǵa qattı ǵázebi kelip, Natanǵa bılay dedi:

– Tiri Jaratqan Iye haqı ant ishemen: bunday isti islegen adam ólimge ılayıqlı! 6 Tas bawırlıq qılıp, usınday isti islegeni ushın, qozını tórt ese qılıp tólewi tiyis.

7 Sonda Natan Dawıtqa bılay dedi:

– Sol adam sizsiz! Izraildıń Qudayı Jaratqan Iye bılay deydi: «Men seni maylap, Izrailǵa patsha etip qoydım hám Shauldıń qolınan qutqardım. 8 Men saǵan mırzańnıń úyin berdim, hayalların da qoynıńa saldım. Izrail hám Yahuda xalqın da saǵan berdim. Eger bul da az bolsa, bulardan da kóp nárselerdi berer edim. 9 Solay eken, nege Meniń názerimde jawız bolǵan islerdi islep, sózimdi pisent etpediń? Xet xalqınan bolǵan Uriyanı qılısh penen óltirip, hayalın ózińe aldıń. Awa, sen onı ammonlardıń qılıshı menen óltirdiń. 10 Bunnan bılay, máńgige seniń xojalıǵıńnan qılısh arımaydı. Sebebi sen Meni pisent etpey, xet xalqınan bolǵan Uriyanıń hayalın ózińe hayallıqqa aldıń». 11 Jaratqan Iye jáne bılay deydi: «Saǵan óz xojalıǵıń arqalı jamanlıq keltiremen. Seniń kóz aldıńda hayallarıńdı alıp, jaqınlarıńnıń birine beremen. Ol kúpá-kúndiz hayallarıńnıń qoynına kiredi. 12 Awa, sen bul isti jasırınsha islediń, biraq Men bunı pútkil Izrail xalqınıń kóz aldında kúpá-kúndiz isleymen».

13 Dawıt Natanǵa:

– Men Jaratqan Iyege qarsı gúna isledim, – dedi.

Natan oǵan:

– Jaratqan Iye gúnańızdan ótti, siz ólmeysiz. 14 Biraq siz bul isińiz arqalı Jaratqan Iyeniń dushpanlarına Oǵan til tiygiziwge jol qoyıp berdińiz. Sol sebepli siziń tuwılǵan perzentińiz óledi, – dep juwap berdi. 15 Sońınan Natan úyine qayttı.

Jaratqan Iye Uriyanıń hayalınıń Dawıttan tuwǵan balasın awır keselge duwshar etti. 16 Dawıt Qudayǵa bala ushın jalbarınıp, oraza tuttı. Úyine kelip, jerde jatqan halda túnlerdi ótkerdi. 17 Saray aqsaqalları Dawıttı jerden turǵızıw ushın kelgende, ol turıwdı qálemedi hám olar menen birge awqat ta jemedi. 18 Jetinshi kúni bala shetnedi. Xızmetshileri Dawıtqa balanıń shetnegeni haqqında xabarlawǵa qorqtı. Olar: «Bala tiri waqıtta, bizler onıń menen sóylesken edik, biraq ol bizlerge qulaq aspadı. Endi balanıń shetnegenin oǵan qalay aytamız? Ol ózine qanday da bir jaman nárse islep qoyar», – dep sıbırlastı.

19 Dawıt xızmetshileriniń óz ara sıbırlasıp atırǵanın kórgende, balanıń shetnegenin túsindi. Ol xızmetshilerinen:

– Bala qaytıs boldı ma? – dep soradı.

Olar Dawıtqa:

– Awa, qaytıs boldı, – dep juwap berdi.

20 Sonda Dawıt ornınan turıp, juwındı. Ústine átir jaǵıp, kiyimlerin almastırdı hám Jaratqan Iyeniń Úyine barıp, sıyındı. Sońınan úyine qaytıp kelip, ózine awqat beriliwin buyırdı hám aldına qoyılǵan awqattı jedi. 21 Xızmetshileri oǵan:

– Bul isińizdi qalay túsinsek boladı? Bala tiri waqtında oraza tutıp, jıladıńız. Al ol ólgennen keyin, ornıńızdan turıp, awqat jedińiz, – dedi.

22 Dawıt olarǵa bılay dep juwap berdi:

– Awa, bala tiri waqtında oraza tuttım, jıladım. Sebebi: «Kim biledi, Jaratqan Iye maǵan miyrimin túsirip, bala jasap keter», – dep oylaǵan edim. 23 Biraq endi bala óldi. Solay eken, oraza tutıwımnıń ne keregi bar? Onı qaytara alar ma edim? Men onıń janına baraman, biraq ol meniń janıma qaytıp kelmeydi.

Sulaymannıń tuwılıwı

24 Dawıt hayalı Bat-Shebanı jubattı hám janına kirip, onıń menen jattı. Bat-Sheba ul tuwdı hám onıń atın Sulayman dep qoydı. Jaratqan Iye balanı súygenlikten, 25 Natan payǵambardı oǵan jiberdi. Natan Jaratqan Iyeniń sózi boyınsha balaǵa Edidiya ^{▼▼ Edidiya – «Jaratqan Iyeniń súyiklisi» degendi bildiredi.} dep at qoydı.

26 Sol waqıtları ammonlardıń Rabba qalasına qarsı sawash júrgizip atırǵan Ioab patsha sarayı jaylasqan qorǵan qalanı qolǵa kirgizdi. 27 Sońınan Ioab Dawıtqa xabarshılar jiberip bılay dedi: «Men Rabba qalasına hújim qılıp, onıń suw tarmaǵın qolǵa kirgizdim. 28 Endi siz qalǵan áskerlerdi baslap keliń de, qalanı qorshap alıp, onı qolǵa kirgiziń. Eger qalanı men basıp alsam, qala meniń atım menen atalıp keter».

29 Dawıt pútkil áskerlerin toplap, Rabba qalasına ketti hám qalaǵa hújim jasap, onı qolǵa kirgizdi. 30 Dawıt olardıń patshasınıń basındaǵı tajdı aldı. Hasıl taslar menen bezelgen, awırlıǵı bir talant ^{▼▼ Bir talant – shama menen 34 kg.} keletuǵın altın taj Dawıttıń basına kiygizildi. Dawıt qaladan kóp muǵdarda olja da alıp qayttı. 31 Ol qala xalqın sırtqa shıǵarıp, olardı jarǵı, shókkish hám balta menen jumıs islewge, gerbish tayarlawǵa májbúr etti. Dawıt ammonlardıń qalalarınıń hámmesinde usılay isledi. Sońınan Dawıt pútkil áskerlerin ertip, Erusalimge qayttı.