‏ 2 Samuel 13

Amnon hám Tamara

1Dawıttıń ulı Abshalomnıń Tamara degen bir sulıw qarındası bar edi. Dawıttıń basqa hayalınan bolǵan ulı Amnon Tamaranı súyip qaldı. 2Amnon qarındası Tamara sebepli azap shegip, awırıp qaldı. Sebebi Tamara pák qız bolǵanlıqtan, Amnon ushın qızǵa bir nárse islew múmkinshiligin tabıw qıyın edi. 3Biraq Amnonnıń Ionadab degen jorası bar edi. Ionadab Dawıttıń ájaǵası Shimeanıń ulı bolıp, ol júdá hiyleker edi. 4Bir kúni Ionadab Amnonnan:

– Háy, patshanıń ulı, nege kúnnen-kúnge azıp baratırsań? Maǵan sebebin aytpaysań ba? – dep soradı.

Amnon oǵan:

– Tuwısqanım Abshalomnıń qarındası Tamaranı súyip qaldım, – dep juwap berdi.

5Ionadab oǵan:

– Tósekke jatıp alıp, ózińdi awırıp atırǵanday etip kórset. Ákeń seni kóriw ushın kelgende, oǵan: «Aǵa, ótinish, qarındasım Tamara kelip, maǵan awqat pisirip bersin. Awqattı kóz aldımda pisirsin, onı kórip, qolınan awqat jeyin», – dep ayt, – dedi.

6Solay etip, Amnon tósekke jatıp alıp, ózin awırıp atırǵanday etip kórsetti. Patsha onı kóriwge kelgende, Amnon patshaǵa:

– Aǵa, ótinish, qarındasım Tamara kelip, kóz aldımda bir-eki taba nan pisirip bersin. Men onıń qolınan nan jeyin, – dedi.

7Sonda Dawıt sarayda jasap atırǵan Tamaraǵa: «Ájaǵań Amnonnıń úyine barıp, oǵan jeytuǵın bir nárse pisirip ber», – dep xabar jiberdi. 8Tamara ájaǵası Amnonnıń úyine ketti. Ol tósekte jatırǵan edi. Tamara qamır iylep, onıń úyinde taba nan pisirdi. 9Sońınan tabanı alıp, nandı Amnonnıń dasturxanına qoyǵanda, ol jegisi kelmedi. Sonda Amnon úydegilerge:

– Qasımnan hámme shıǵıp ketsin, – dep buyırdı. Hámme shıǵıp ketti. 10Bunnan keyin, Amnon Tamaraǵa:

– Awqattı jatatuǵın bólmeme alıp kel, men seniń qolıńnan awqat jeyin, – dedi. Tamara ózi pisirgen nanlardı ájaǵası Amnonnıń jatatuǵın bólmesine apardı. 11Jesin dep, Tamara nandı Amnonǵa jaqınlatqanda, ol Tamaranı uslap alıp:

– Qarındasım, kel, meniń menen jat, – dedi.

12Biraq Tamara oǵan bılay dedi:

– Yaq, ájaǵa, meniń namısıma tiyme. Izrailda bunday is islenbeydi. Bunday aqılsızlıqtı isleme. 13Usınday shermendelikten keyin, men qalay bas kóterip júre alaman? Al sen Izraildaǵı aqmaq adamlardıń biri bolıp qalasań. Ótinemen, patsha menen sóyles, ol seniń maǵan úyleniwińe qarsı bolmaydı. 14Degen menen, Amnon Tamaraǵa qulaq salǵısı kelmedi. Ol qızdan kúshlirek bolǵanlıqtan, qızdı zorlap, namısına tiydi.

15Sonnan soń, Amnonnıń Tamaranı jek kórgenligi sonshelli, onıń jek kóriwshiligi burın bolǵan muhabbatınan da kúshlirek boldı. Amnon Tamaraǵa:

– Tur, joq bol! – dedi.

16Tamara Amnonǵa:

– Yaq, meni quwıwıń – bul birinshi islegen jamanlıǵıńnan da awırıraq, – dedi. Biraq Amnon oǵan qulaq salǵısı kelmedi. 17Amnon xızmetshi jigitin shaqırıp oǵan:

– Mına birewdi bul jerden quwıp jiber de, artınan qapını jawıp tasla, – dedi. 18Jigit Tamaranı sırtqa shıǵarıp, izinshe qapını jawdı. Tamaranıń ústinde uzın, jeńi de uzın naǵıslı kiyim bar edi. Patshanıń turmısqa shıqpaǵan qızları usılay kiyinetuǵın edi. 19Tamara basına kúl shashıp, ústindegi uzın jeńli kiyimin jırtıp tasladı. Ol qolları menen basın uslap, dad salıp, eńirewi menen ketti.

20Ájaǵası Abshalom qızǵa:

– Seniń menen birge bolǵan ájaǵań Amnon ba edi? Endi sestińdi shıǵarma, qarındasım. Ol seniń ájaǵań-ǵo. Bul waqıyaǵa qapa bolma, – dedi.

Solay etip, Tamara ájaǵası Abshalomnıń úyinde jalǵız hám muńlı jasadı.

21Dawıt patsha bolıp ótkenler haqqında esitip, qattı ǵázeplendi. 22Abshalom Amnonǵa jaqsı da, jaman da sóz aytpadı. Óytkeni ol qarındası Tamaranıń namısına tiygeni ushın, Amnondı jek kórip qalǵan edi.

Abshalomnıń Amnondı óltiriwi

23Eki jıldan keyin, Abshalom patshanıń barlıq ulların óziniń qoyın qırqtırıp atırǵan jerge, Efrayım qalasına jaqın jerdegi Baal-Xasorǵa shaqırdı. 24Abshalom patshaǵa kelip:

– Men qoylarımdı qırqtırıp atırman. Ótinemen, ózińiz de, xızmetshilerińiz de meniń menen birge sol jerge barsańız, – dedi.

25Dawıt patsha oǵan:

– Yaq, ulım, eger bizler hámmemiz barsaq, saǵan júk bolamız, – dedi.

Abshalom qattı jalınsa da, patshanıń barǵısı kelmedi, biraq balasına pátiya berdi.

26Sonda Abshalom patshaǵa:

– Onda ájaǵam Amnonnıń bizler menen birge barıwına ruxsat beriń, – dedi.

Patsha onnan:

– Amnon nege seniń menen barıwı kerek? – dep soradı. 27Biraq Abshalom jalına bergennen keyin, patsha Amnondı hám basqa ullarınıń hámmesin onıń menen birge jiberdi.

28Abshalom xızmetshilerine bılay dep buyırdı:

– Amnonnan kóz úzbeńler! Ol sharap iship, más bolǵan waqıtta, men sizlerge: «Amnondı óltiriń», – dep aytaman. Sonda onı óltirińler. Qorqpańlar! Sizlerge buyrıqtı men berip atırman. Kúshli hám márt bolıńlar!

29Xızmetshiler Abshalomnıń buyrıǵın orınlap, Amnondı óltirdi. Sonda patshanıń basqa ulları ǵashırlarına minip, qashıp ketti.

30Olar jolda kiyatırǵanda, Dawıtqa: «Abshalom patshanıń barlıq ulların óltiripti, olardıń birde birewi tiri qalmaptı», – degen xabar jetip keldi. 31Patsha ornınan turdı da, kiyimlerin jırtıp, ózin jerge tasladı. Onıń janındaǵı barlıq xızmetshileri de kiyimlerin jırttı.

32Sonda Dawıttıń ájaǵası Shimeanıń ulı Ionadab bılay dedi:

– Taqsır, hámme ullarımnan ayırılıp qaldım dep oylamańız. Tek Amnon óldi. Sebebi ol qarındası Tamaranıń namısına tiygennen beri, Abshalom Amnondı óltiriwdi oylap júrgen edi. 33Sonlıqtan taqsır, hámme ullarıńız óldi, degen xabardan táshiwishlenbeń. Tek jalǵız Amnon ǵana óldi.

34Sol arada Abshalom qashıp ketti.

Gúzetshi jigit tóbeshiktiń batıs jolınan úlken bir alamannıń kiyatırǵanın kórdi. 35Ionadab patshaǵa:

– Áne, ullarıńız kiyatır. Qulıńızdıń aytqanınday boldı, – dedi. 36Ol aytıp bolar-bolmastan, patshanıń ulları jetip keldi de, dad salıp jılay basladı. Patsha da, xızmetshileri de qattı ókirip jıladı.

37Al Abshalom qashıp, Geshur patshası Ammihud ulı Talmaydıń janına bardı. Dawıt ulı Amnon ushın uzaq waqıt aza tuttı. 38Geshurǵa qashqan Abshalom ol jerde úsh jıl boldı. 39Patsha Dawıttıń Amnonnıń qazasına qayǵısı basılıp, endi Abshalomdı saǵına basladı.