‏ 2 Samuel 14

Abshalomnıń Erusalimge qaytıp keliwi

1Seruya ulı Ioab patshanıń Abshalomdı saǵınıp júrgenin bildi. 2Ol birewdi jiberip, Teqoada jasaytuǵın aqıllı bir hayaldı aldırdı. Ioab hayalǵa:

– Aza kiyimlerińdi kiyip, ózińdi aza tutıp júrgen adam sıyaqlı kórset. Átir de jaqpay, ózińdi uzaq waqıttan beri ólini azalap júrgen sıyaqlı tut. 3Keyin patshaǵa barıp, oǵan meniń usı sózlerimdi jetkiz, – dedi de, Ioab hayalǵa nelerdi aytıw kerekligin úyretti.

4Solay etip, teqoalı hayal patshaǵa bardı. Ol patshanıń aldında et betinen jıǵılıp, tájim etip, patshaǵa:

– Taqsır, maǵan járdem beriń, – dedi.

5Patsha onnan:

– Ne boldı? – dep soradı.

Hayal patshaǵa bılay dep juwap berdi:

– Men bir baxıtsız jesir hayalman. Kúyewim ólip qaldı. 6Shorıńız bolǵan meniń eki ulım bar edi. Olar atızda tóbelesip qalıptı. Olardı ayıratuǵın hesh kim bolmaǵannan soń, birewi birewin urıp, óltirip qoyıptı. 7Endi pútkil tiyre shorıńız bolǵan maǵan qarsı shıǵıp: «Tuwısqanın óltirgen adamdı bizlerdiń qolımızǵa ber. Tuwısqanın óltirgeni ushın onı óltirip, usılayınsha miyrasxordı da joq qılamız», – dep atır. Solay etip, jer betinde kúyewimniń atın hám urpaǵın dawam ettiretuǵın tuyaq qaldırmaw ushın, olar meniń oshaǵımdaǵı qalǵan shoqtı da óshirejaq.

8Patsha hayalǵa:

– Úyińe qayta ber, bul isti seniń paydańa sheship beremen, – dedi.

9Sonda teqoalı hayal patshaǵa:

– Taqsır! Bul waqıyaǵa men hám meniń ákemniń xojalıǵı ayıplı bolsın. Patsha hám onıń taxtı ayıpsız bolsın, – dedi.

10Patsha hayalǵa:

– Birew saǵan qarsı bir nárse dese, onı maǵan alıp kel. Ol qaytıp saǵan tiymeytuǵın boladı, – dedi.

11Hayal patshaǵa:

– Olay bolsa, ósh alıwshı ámeńgerler isin gújitip, ulımdı óltirip qoymawı ushın, patsha, Qudayıńız Jaratqan Iye haqı ant ishseńiz, – dedi.

Patsha hayalǵa:

– Tiri Jaratqan Iyeniń atı menen aytaman: ulıńnıń bir tal shashı da túspeydi, – dedi.

12Hayal patshaǵa:

– Taqsır, shorıńız bolǵan maǵan jáne bir sóz aytıwǵa ruxsat berseńiz, – dedi.

– Ayt, – dedi patsha.

13Hayal sózin dawam etip bılay dedi:

– Ne ushın siz Qudaydıń xalqına qarsı bulay islep atırsız? Patsha, siz usı gápińiz arqalı ózińiz ózińizdi ayıplap atırsız. Óytkeni ózińiz quwǵın qılǵan adamdı qaytarmay atırsız. 14Jerge tógilgen suwdı qaytıp jıynaw múmkin bolmaǵanı sıyaqlı, hámmemiz de dúnyadan ótip ketemiz. Biraq Quday jandı nabıt qılıwdı qálemeydi. Ol quwǵın qılınǵan adamnıń Ózinen uzaq ketpewi ushın shara izleydi. 15Xalıq meni qorqıtqanı sebepli, taqsırıma usılardı aytıp beriw ushın keldim. Men ózimshe: «Patsha menen sóyleseyin, bálkim, ol shorısınıń tilegin orınlar. 16Sózlerime qulaq asıp, meni hám ulımdı óltirmekshi bolıp, Qudaydıń bergen miyrasınan ayırıwdı qálegenlerdiń qolınan qutqarar, 17taqsırımnıń sózi meni tınıshlandırar», – dep oyladım. Sebebi siz, taqsır, jaqsı menen jamandı ayırıwda Qudaydıń perishtesi sıyaqlısız. Sizge Qudayıńız Jaratqan Iye yar bolsın!

18Patsha hayalǵa:

– Sennen bir nárse sorayın, biraq mennen hesh nárseni jasırma, – dedi.

Hayal patshaǵa:

– Sorań, taqsır, – dep juwap berdi.

19Patsha hayaldan:

– Bul islerdiń hámmesinde Ioabtıń qolı bar ma? – dep soradı.

Hayal patshaǵa bılay dep juwap berdi:

– Taqsır, aldıńızda ant iship aytaman: sizden hesh nárseni jasırıw múmkin emes. Awa, maǵan buyrıq bergen hám shorıńızǵa usı sózlerdiń hámmesin úyretken qulıńız Ioab boladı. 20Jaǵdaydı ózgertiw ushın, qulıńız Ioab bunı oylap tapqan edi. Taqsır, siz Qudaydıń bir perishtesi sıyaqlı dana bolıp, eldegi waqıyalardıń hámmesinen xabardarsız.

21Sonda patsha Ioabtı shaqırtıp, oǵan:

– Meyli, tilegińdi orınlayman. Barıp, jas jigit Abshalomdı qaytarıp alıp kel, – dedi.

22Ioab et betinen jerge jıǵılıp, patshaǵa tájim etti hám oǵan minnetdarshılıq bildirip:

– Taqsır, búgin mennen kewlińiz tolǵanın bilip turman. Sebebi siz qulıńızdıń tilegin orınladıńız, – dedi.

23Sońınan Ioab Geshurǵa barıp, Abshalomdı Erusalimge alıp keldi. 24Biraq patsha:

– Abshalom úyine ketsin, meniń aldıma kelmesin, – dep buyrıq berdi. Sonlıqtan Abshalom patshanı kórmey, óz úyine ketti.

25Pútkil Izrailda sın-sımbatı boyınsha Abshalom sıyaqlı maqtawı artqan adam joq edi. Ol basınan ayaǵına shekem minsiz edi. 26Abshalomǵa shashı awırlıq qılatuǵın bolǵanlıqtan, ol hár jılı shashın kestiretuǵın edi. Ol shashın kestirgen waqıtta ólshetetuǵın edi. Onıń shashınıń awırlıǵı patshalıqtaǵı ólshem birligi boyınsha ólshegende, eki júz shekel ▼

▼ Eki júz shekel – bir shekel shama menen 11 gr.

shıǵatuǵın edi. 27Abshalomnıń úsh ulı hám Tamara degen sulıw bir qızı bar edi.

28Abshalom Erusalimde eki jıl jasasa da, patshanı kóre almadı. 29Sońınan ol patshaǵa jiberiw ushın Ioabtı shaqırttı. Biraq Ioab Abshalomǵa keliwdi qálemedi. Abshalom ekinshi ret shaqırttı, biraq Ioabtıń jáne kelgisi kelmedi. 30Sonda Abshalom qullarına:

– Minekey, Ioabtıń arpa atızı menikiniń janında tur. Barıp, atızǵa ot beriń, – dedi. Xızmetshiler barıp, Ioabtıń atızına ot berdi.

31Ioab ornınan turdı da, Abshalomnıń úyine barıp:

– Qullarıń ne ushın atızıma ot berdi? – dep soradı.

32Abshalom oǵan bılay dedi:

– Minekey, men seni patshanıń aldına jiberiw ushın, usı jerge keliwińdi aytıp, adam jollaǵan edim. Sen arqalı patshaǵa: «Geshurdan ne ushın keldim? Ol jerde qalǵanım men ushın jaqsıraq bolar edi», – dep aytpaqshı edim. Endi men patshanı kórgim keledi. Eger ayıplı bolsam, meni ózi óltirsin.

33Sonda Ioab barıp, Abshalomnıń sózlerin patshaǵa jetkizdi. Patsha Abshalomdı shaqırttı. Abshalom patshanıń aldına keldi de, onıń aldında et betinen jerge jıǵılıp, tájim etti. Patsha Abshalomdı súydi.