‏ 2 Samuel 18

Abshalomnıń óltiriliwi

1Dawıt óziniń janındaǵı áskerlerin bir jerge toplap, kózden ótkerdi hám olardıń ústinen mıńbasılar menen júzbasılar qoydı. 2Sońınan olardı Seruya ulı Ioabtıń, onıń inisi Abishaydıń hám gatlı Ittaydıń basshılıǵında úsh toparǵa bólip atlandırdı. Patsha áskerlerge:

– Men de sizler menen birge baraman, – dedi.

3Biraq áskerler:

– Iltimas, siz bizler menen birge barmań. Eger bizlerdiń qashıwımızǵa tuwra kelse de, olar bizlerge dıqqat awdarmaydı, hátte, yarımımız ólip ketsek te, olar bizlerge dıqqat awdarmaydı. Siz bizlerdiń on mıńımızǵa tatıysız. Sonlıqtan siziń bizlerge qalada turıp járdem bergenińiz jaqsıraq, – dep juwap berdi.

4Patsha olarǵa:

– Sizler neni maqul kórseńiz, sonı isleymen, – dedi.

Adamlar júzlik hám mıńlıq toparlarǵa bólinip, qaladan shıǵıp baratırǵanda, patsha dárwaza janında turǵan edi. 5Patsha Ioab, Abishay hám Ittayǵa:

– Meniń húrmetim ushın jigit Abshalomǵa zıyan tiygizbeńler, – dep buyırdı. Hámme áskerler patshanıń áskerbasılarǵa Abshalomǵa baylanıslı bergen buyrıǵın esitti.

6Dawıttıń áskerleri izraillılar menen urısıw ushın urıs maydanına shıqtı. Sawash Efrayım toǵayında boldı. 7Izrail áskerleri Dawıttıń áskerlerinen jeńilip qaldı. Ol jerde úlken qırǵın bolıp, sol kúni jigirma mıń adam óldi. 8Sawash hámme jerge jayıldı. Sol kúni toǵaydaǵı qáwipli jaǵdaylarǵa jolıǵıp ólgenlerdiń sanı qılıshtan ólgenlerdiń sanınan kóbirek edi.

9Abshalom ańsızda Dawıttıń adamlarına dus kelip qaldı. Ol ǵashırǵa mingen edi. Ǵashır úlken bir terebinf aǵashınıń qalıń shaqaları astınan ótip baratırǵanda, Abshalomnıń bası shaqalar arasına kirip, ilinip qaldı. Ǵashır jolın dawam etip kete berdi, al Abshalom terekke iliniwi menen, salbırap qaldı. 10Sonda bir adam bunı kórip qalıp, Ioabqa:

– Men Abshalomnıń bir terebinf aǵashına ilinip, salbırap qalǵanın kórdim, – dep xabarladı.

11Ioab xabar bergen adamǵa:

– Áneqalas, onı kórgen bolsań, nege jerge qulatıp óltirmediń? Saǵan on shekel gúmis penen bir qayıs sawǵa eter edim, – dedi.

12Biraq sol adam oǵan bılay dep juwap berdi:

– Eger qolıma mıń shekel gúmis sanap uslatqanıńızda da, patshanıń ulına qol kótermegen bolar edim. Sebebi patshanıń sizge, Abishayǵa hám Ittayǵa: «Meniń húrmetim ushın jigitti, Abshalomdı saqlap qalıńlar», – dep buyrıq bergenin esittik. 13Eger men janımdı qáterge qoyıp, Abshalomdı óltirgenimde, bul isim patshaǵa bilinbey qalmas edi. Siz de meni jaqlamaǵan bolar edińiz.

14Sonda Ioab sol adamǵa:

– Bulay etip, seniń menen waqıttı bosqa ótkermeyin, – dep, qolına úsh nayza alıp barıp, terebinf aǵashına ilinip, ele tiri turǵan Abshalomnıń júregine qadadı. 15Sońınan Ioabtıń on nóker jigiti Abshalomdı qorshap alıp, onı óltirdi.

16Sonnan keyin Ioab sawashtı toqtatıw ushın kárnay sherttirgende, áskerler izraillılardı quwıwdı toqtatıp, izine qayttı. 17Ioabtıń áskerleri Abshalomdı túsirip aldı da, toǵaydaǵı bir tereń shuqırǵa tasladı. Shuqırdıń ústine úlken taslardı úydi. Pútkil izraillılar úylerine qaray qashıp ketti.

18Abshalom tiri waqtında: «Atımdı este qaldıratuǵın birde bir ulım joq», – dep Patsha oypatlıǵına bir estelik ornatıp, oǵan óziniń atın bergen edi. Bul estelik házir de «Abshalomnıń esteligi» dep ataladı.

Dawıttıń aza tutıwı

19Sadoq ulı Aximaas Ioabqa:

– Ruxsat ber, juwırıp barıp, patshaǵa Jaratqan Iyeniń onı dushpanlarınan qutqarǵanın xabarlayın, – dedi.

20Ioab oǵan:

– Yaq, búgin xabardı sen jetkizbeyseń. Basqa waqıtta xabar jetkizerseń, biraq búgin emes. Óytkeni patshanıń ulı óldi, – dedi.

21Sońınan Ioab bir xabashstanlı adamǵa:

– Sen barıp, kórgenlerińdi patshaǵa jetkiz, – dedi. Xabashstanlı adam Ioabtıń aldında tájim etti de, juwırıp ketti.

22Biraq Sadoq ulı Aximaas jáne:

– Ne bolsa bolsın, ruxsat ber, men de xabashstanlınıń izinen juwırayın, – dedi.

Ioab oǵan:

– Ulım, nege juwırıp barǵıń kelip qaldı? Bul xabar ushın saǵan súyinshi bermeydi-ǵo, – dedi.

23Degen menen, Aximaas:

– Ne bolsa, sol bolsın, juwırıp baraman, – dedi.

Sonda Ioab:

– Meyli, juwırsań juwır, – dedi.

Solay etip, Aximaas tegislik boylap juwırıp, xabashstanlıdan ozıp ketti. 24Sol waqıtta Dawıt qalanıń ishki hám sırtqı dárwazalarınıń arasında otır edi. Gúzetshi diywal janındaǵı dárwazanıń tóbesine shıqtı. Ol átirapqa kóz jiberip, bir adamnıń juwırıp kiyatırǵanın kórdi. 25Gúzetshi baqırıp, bunı patshaǵa xabarladı.

Patsha oǵan:

– Eger tek bir adam kiyatırǵan bolsa, demek, onıń jaqsı xabar alıp kiyatırǵanı, – dedi.

Sol adam kem-kemnen jaqınlasıp kele berdi. 26Gúzetshi basqa bir adamnıń da juwırıp kiyatırǵanın kórip, dárwaza qarawılına:

– Áne, jáne bir adam juwırıp kiyatır, – dep baqırdı.

Sonda patsha:

– Ol da jaqsı xabar alıp kiyatır, – dedi.

27Gúzetshi:

– Birinshisiniń juwırǵanın Sadoq ulı Aximaastıń juwırǵanına uqsatıp turman, – dedi.

Patsha oǵan:

– Aximaas jaqsı adam. Ol jaqsı xabar alıp keledi, – dep juwap berdi.

28Sol waqıtta Aximaas bálent dawıs penen patshaǵa:

– Tınıshlıq, – dep baqırdı. Sońınan patshanıń aldında et betinen jerge jıǵılıp, tájim etip:

– Taqsırıma qol kótergenlerdi táslim etken Qudayıńız Jaratqan Iyege alǵıslar bolsın! – dedi.

29Patsha onnan:

– Abshalom jigit aman ba? – dep soradı.

Aximaas patshaǵa:

– Ioab patshanıń xızmetshisi bolǵan xabashstanlı adam menen meni bul jerge jibergen waqtında, úlken bir ala-sapıran bolıp atırǵan edi. Biraq ne bolǵanın bilmeymen, – dep juwap berdi.

30Patsha oǵan:

– Shetke shıǵıp, bul jerde tur, – dedi.

Aximaas shetke shıǵıp turdı. 31Sol waqıtta xabashstanlı adam da jetip kelip:

– Taqsır, xosh xabar! Búgin Jaratqan Iye sizge qarsı bas kótergenlerdiń hámmesiniń qolınan sizdi qutqardı, – dedi.

32Patsha xabashstanlıdan:

– Abshalom jigit aman ba? – dep soradı.

Xabashstanlı patshaǵa:

– Taqsır! Dushpanlarıńızdıń hám jaman niyet penen sizge qarsı bas kótergenlerdiń hámmesiniń aqırı bul jigittiń aqırı sıyaqlı bolsın! – dep juwap berdi.

33Patsha albırap qaldı. Ol dárwaza ústindegi bólmege shıǵıp, jıladı. Ol shıǵıp baratırıp:

– Wah, ulım Abshalom! Wah, ulım, ulım Abshalom! Ulım, seniń ornıńa men ólsem bolmas pa edi! Wah, ulım, ulım Abshalom! – dep zarlap jılar edi.