‏ 2 Samuel 19

Ioabtıń Dawıtqa keyip, eskertiwi

1Ioabqa: «Dawıt patsha Abshalom ushın jılap, aza tutıp atır», – dep xabarladı.

2Sol kúngi jeńis áskerler ushın azaǵa aylandı. Sebebi olar patshanıń ulı ushın aza tutıp atırǵanın esitken edi. 3Sol kúni áskerler qalaǵa sawashtan qashqan adamlar sıyaqlı uyalıp kirdi. 4Al patsha bolsa, betin basıp, bálent dawıs penen: «Wah, ulım, Abshalom! Abshalom, ulım, ulım!» – dep baqırıp otırǵan edi.

5Ioab patsha otırǵan úyge barıp, oǵan bılay dedi:

– Búgin siziń janıńızdı, ul-qızlarıńızdıń janların, hayallarıńızdıń janların qutqarǵan adamlardıń hámmesin uyatqa qoydıńız. 6Óytkeni siz ózińizdi jek kórgenlerdi jaqsı kórip, ózińizdi jaqsı kórgenlerdi jek kóresiz. Búgin siz áskerbasılardıń hám xızmetshilerdiń ózińiz ushın hesh nársege arzımaytuǵının kórsettińiz. Awa, eger Abshalom tiri qalıp, hámmemiz ólip ketkende, siz ushın jaqsı bolatuǵının men búgin ańlap jettim. 7Endi sırtqa shıǵıp, adamlarıńızdı jigerlendiriń! Jaratqan Iyeniń atı menen ant ishemen: eger shıqpasańız, búgin túnde siziń qasıńızda birde bir adam qalmaydı. Bul jaslıǵıńızdan usı kúnge shekem basıńızǵa túsken apatlardıń ishindegi eń jamanı boladı.

8Sonda patsha qala dárwazasınıń aldına shıǵıp otırdı. Pútkil áskerlerge: «Patsha qala dárwazasınıń aldına kelip otırdı», – degen xabar jetkende, olar da patshanıń janına keldi.

Dawıttıń Erusalimge qaytıwı

Sol waqıtta Abshalomnıń janındaǵı izraillılar úylerine qashıp ketken edi. 9Izraildıń hámme urıwlarınan bolǵan adamlar bir-biri menen tartısıp bılay desti: «Patsha bizlerdi dushpanlarımızdıń qolınan qutqardı. Bizlerdi filistlerdiń qolınan qutqarǵan da sol edi. Al endi bolsa, ol Abshalom sebepli elden qashıp ketti. 10Bizlerge basshı bolıwı ushın maylaǵanımız Abshalom bolsa, sawashta óldi. Solay eken, endi nege Dawıt patshanı qaytarıp alıp keliwge asıqpay atırmız?»

11Dawıt patsha ruwxaniyler Sadoq penen Abiyatarǵa bılay dep xabar jiberdi: «Yahuda aqsaqallarına bılay dep aytıńlar: „Pútkil izraillılardıń patshanı óz sarayına qaytaramız dep aytqan sózleri meniń qulaǵıma jetip keldi. Al sizler nege patshanı qaytarıwda sońǵılar bolmaqshısız? 12Sizler meniń tuwısqanlarımsız – óz súyegim hám óz etimsiz. Nege sizler patshanı óz sarayına qaytarıwda eń sońǵılar bolmaqshısız?“ 13Amasaǵa da bılay dep aytıńlar: „Sen meniń tuwısqanımsań – óz súyegim hám óz etimseń. Eger men seni Ioabtıń ornına máńgige sárkárda etip qoymasam, Quday meni jazalaǵan ústine jazalasın!“»

14Solay etip, Dawıt pútkil yahudalılardı ózine tolıq awdırıp aldı. Yahudalılar patshaǵa: «Pútkil adamlarıńız benen qaytıp keliń», – dep xabar jiberdi. 15Patsha qaytıp, Iordan dáryasına bardı. Yahuda xalqı patshanı kútip alıp, Iordan dáryasınan ótkiziw ushın Gilgalǵa keldi. 16Baxurimnen benyaminli Gera ulı Shimey de Dawıt patshanı kútip alıw ushın, yahudalılar menen birge asıǵıs jolǵa shıqtı. 17Onıń janında Benyamin urıwınan mıń adam bar edi. Shauldıń úyiniń xızmetshisi Siba da on bes ulı hám jigirma qulı menen birge Iordan dáryasına, patshanıń janına jetip keldi. 18Olar patshanıń úy-ishin dáryadan ótkeriw hám onıń tilegin orınlaw ushın patshanıń janına keldi. Patsha dáryanı kesip ótpekshi bolıp turǵanda, Gera ulı Shimey patshanıń aldına jıǵılıp, 19oǵan bılay dedi:

– Taqsır, meni ayıpker sanamańız. Siz Erusalimnen shıqqan kúnińizde islegen jamanlıǵımdı kewlińizde saqlamay, umıtıp jiberiń. 20Qulıńız bolǵan men qanday gúna islegenimdi bilemen. Sonlıqtan taqsırımdı qarsı alıw ushın, pútkil Yusuptiń xalqınan birinshi bolıp men keldim.

21Sonda Seruya ulı Abishay:

– Jaratqan Iyeniń maylaǵan adamın ǵarǵaǵanı ushın, Shimey óliwi tiyis, – dedi.

22Biraq Dawıt oǵan:

– Háy, Seruyanıń ulları, bul sizlerdiń jumısıńız emes. Búgin sizler nege maǵan qarsı shıǵıp atırsız? Izrailda búgin birde bir adam óltirilmeydi! Men ózimniń Izraildıń patshası ekenimdi bilmeymen be?! – dedi. 23Sońınan ol ant iship, Shimeyge:

– Sen ólmeyseń! – dedi.

24Shauldıń aqlıǵı Mefiboshet te patshanı kútip alıw ushın shıqqan edi. Ol patsha ketken kúnnen baslap, aman-esen izge qaytqan kúnine shekem ayaqların da, kiyimlerin de juwmaǵan, saqalın da almaǵan edi. 25Mefiboshet patshanı kútip alıw ushın Erusalimnen kelgende, patsha onnan:

– Mefiboshet, sen nege meniń menen birge ketpediń? – dep soradı.

26Mefiboshet patshaǵa bılay dep juwap berdi:

– Taqsır, qulıńız bolǵan men mayıp bolǵanım sebepli, qulım Sibaǵa: «Eshekti ertle, men oǵan minip, patsha menen birge ketemen», – dedim. Biraq ol meni aldadı. 27Taqsır, siziń aldıńızda ol maǵan jala japtı. Biraq siz, taqsır, Qudaydıń perishtesi sıyaqlısız. Siz neni maqul kórseńiz, sonı isleń. 28Sebebi taqsırım, siziń aldıńızda ákemniń urpaqlarınıń hámmesi óz ólimin kútip júrgeninde, siz qulıńız bolǵan meni dasturxanıńızdan awqat jeytuǵınlar arasına otırǵızdıńız. Sizden bunnan artıq bir nárse sorawǵa ne haqım bar, o, patsha?!

29Patsha oǵan:

– Óz isleriń haqqında gápti balalatıwdıń ne hájeti bar? Saǵan aytatuǵınım mınaw: Siba menen ekewińiz jerlerdi bólisip alıń, – dedi.

30Biraq Mefiboshet patshaǵa:

– Taqsırım sarayına aman-saw qaytıp kelgen eken, endi barlıq jerlerdi Siba ala ǵoysın, – dep juwap berdi.

31Giladlı Barzillay da Iordan dáryasın kesip ótiwde patshaǵa joldas bolıp, onı shıǵarıp salıw ushın, Rogelimnen kelgen edi. 32Barzillay oǵada qartayǵan bolıp, seksen jasqa shıqqan edi. Ol júdá bay adam bolǵanlıqtan, patsha Maxanayımda bolǵan waqıtta, patshanı azıq-awqat penen támiyinlep turǵan edi. 33Patsha Barzillayǵa:

– Meniń menen birge dáryanı kesip ót. Erusalimde men seni azıq-awqat penen támiyinleymen, – dedi.

34Biraq Barzillay patshaǵa bılay dep juwap berdi:

– Siz benen Erusalimge ketetuǵınday, qansha ómirim qaldı deysiz? 35Men házir seksen jastaman. Jaqsı menen jamandı ajırata almasam, ishken-jegenimniń dámin seze almasam, erkek hám hayal qosıqshınıń dawısın esite almasam, taqsır, sizge júk bolıwımnıń ne keregi bar? 36Qulıńız bolǵan men tek ǵana Iordan dáryasın siz benen birge kesip ótip, sizge az-maz joldas bolmaqshı edim. Patsha, siz nege maǵan bunshelli sıy kórsetip atırsız? 37Maǵan úyime qaytıwǵa ruxsat beriń. Biraq qulıńız Kimham usı jerde, ol siz benen birge arǵı tárepke ótsin. Oǵan neni maqul kórseńiz, sonı isleń.

38Patsha oǵan:

– Kimham meniń menen birge arǵı tárepke ótedi. Sen oǵan neni maqul kórseń, men sonı isleymen. Mennen ne tileseń de, tilegińdi orınlayman, – dedi.

39Sonnan keyin, patsha hám pútkil xalıq Iordan dáryasınan ótti. Patsha Barzillaydı súyip, oǵan pátiya berdi. Sońınan Barzillay úyine qayttı.

40Patsha Gilgalǵa ketti. Kimham da onıń menen birge ketti. Pútkil Yahuda áskerleri hám Izrail áskerleriniń yarımı patshaǵa joldas boldı. 41Sonda izraillılar patshaǵa barıp:

– Nege tuwısqanlarımız yahudalılar sizdi urlap ketip, sizdi hám xojalıǵıńızdı pútkil adamlarıńız benen Iordan dáryasınıń arǵı tárepine ótkerip qoydı? – dedi.

42Yahudalılar izraillılarǵa:

– Óytkeni patsha bizlerdiń jaqınımız. Nege buǵan qapa bolasızlar? Patshanıń awqatınan bir nárse jedik pe? Ya bolmasa, ózimizge bir nárse aldıq pa? – dedi.

43Izraillılar yahudalılarǵa juwap berip:

– Patshada bizlerdiń on payımız bar. Sonlıqtan Dawıt patshada sizlerden góre kóbirek haqımız bar. Solay eken, nege bizlerdi jerge urasızlar? Patshamızdı qaytıp alıp keliwdi birinshi bolıp bizler aytqan joq pa edik? – dedi.

Degen menen, yahudalılardıń sózleri izraillılardikinen kúshlirek boldı.