2Sa 2 | KaaIBT22L | STEP | Bunnan keyin, Dawıt Jaratqan Iyeden: – Yahuda qalalarınıń birine barayın ba? – dep soradı. Jaratqan Iye oǵan: – Bar, – dep juwap berdi. Dawıt Onnan: – Qay jerge barayın? – dep soradı. Jaratqan Iye Dawıtqa: – Xebronǵa bar,

‏ 2 Samuel 2

Dawıttıń Yahudaǵa patsha bolıwı

1 Bunnan keyin, Dawıt Jaratqan Iyeden:

– Yahuda qalalarınıń birine barayın ba? – dep soradı.

Jaratqan Iye oǵan:

– Bar, – dep juwap berdi.

Dawıt Onnan:

– Qay jerge barayın? – dep soradı.

Jaratqan Iye Dawıtqa:

– Xebronǵa bar, – dep juwap berdi. 2 Solay etip, Dawıt óziniń eki hayalı: izreelli Axinoam hám karmelli Nabaldıń jesiri Abigayıl menen birge sol jerge ketti. 3 Dawıt óziniń janındaǵı adamların da xojalıqları menen birge alıp ketti. Olar Xebronnıń ózine hám átirapındaǵı qalalarǵa ornalastı. 4 Sonda yahudalılar Xebronǵa kelip, Dawıttı maylap, Yahudaǵa patsha etip qoydı. Sońınan olar Dawıtqa:

– Yabesh-Gilad turǵınları Shauldıń denesin jerledi, – dedi.

5 Dawıt Yabesh-Gilad turǵınlarına xabarshılar jiberip, olarǵa bılay dedi: «Mırzańız Shauldı jerlep, oǵan kórsetken sadıqlıǵıńız ushın Jaratqan Iye sizlerdi jarılqasın! 6 Endi sizlerge Jaratqan Iye miyrim-shápáátin hám sadıqlıǵın kórsetsin. Bul isińiz ushın, men de sizlerge jaqsılıq qılaman. 7 Sonlıqtan kúshli hám márt bolıńlar! Mırzańız Shaul qaytıs boldı. Al Yahuda xalqı bolsa, meni maylap, ózlerine patsha etip qoydı».

Izrail menen Yahuda arasındaǵı sawash

8 Shauldıń sárkárdası Ner ulı Abner Shauldıń ulı Ish-Boshetti ^{▼▼ Ish-Boshet – bul at 1Jln 8:33 ayatta Eshbaal, 1Pat 14:49 ayatta Ishwiy dep aytıladı.} Maxanayımǵa alıp bardı. 9 Ol jerde Abner Ish-Boshetti Giladtıń, Asherdiń, Izreeldiń, Efrayımnıń, Benyaminniń hám pútkil Izraildıń ústinen patsha etip tayınladı. 10 Shauldıń ulı Ish-Boshet qırıq jasında patsha bolıp, Izrailda eki jıl patshalıq etti. Biraq Yahuda xalqı Dawıt penen birge qaldı. 11 Dawıt Xebronda Yahuda xalqına jeti jıl altı ay patshalıq etti.

12 Bir kúni Ner ulı Abner Shauldıń ulı Ish-Boshettiń adamları menen birge Maxanayımnan Gibonǵa ketti. 13 Al Seruya ulı Ioab bolsa, Dawıttıń adamları menen barıp, Gibon háwiziniń janında olardı qarsı aldı. Usı eki topardıń biri háwizdiń bir tárepinde, ekinshisi ekinshi tárepinde otırdı. 14 Sonda Abner Ioabqa:

– Jigitler orınlarınan turıp, kóz aldımızda alıssın, – dep usınıs qıldı.

Ioab oǵan:

– Meyli, alısa ǵoysın, – dep kelisim berdi.

15 Solay etip, Benyamin urıwınan Shauldıń ulı Ish-Boshet tárepten on eki adam hám Dawıt tárepten on eki adam aldıǵa shıqtı. 16 Olardıń hár biri qarsılasınıń basınan uslap aldı da, bir-biriniń búyirine qılısh shanshıp, birgelikte jan tapsırdı. Sonlıqtan Gibondaǵı sol jerge Xelqat-Hassurim ^{▼▼ Xelqat-Hassurim – «qılıshlar maydanı» degendi bildiriwi múmkin.} degen at berildi.

17 Sol kúni sawash júdá qatal tús alıp, Dawıttıń adamları Abner menen izraillılardı jeńiliske ushırattı. 18 Seruyanıń úsh ulı: Ioab, Abishay hám Asahel de sol jerde edi. Asahel jeyran sıyaqlı shapqır edi. 19 Ol izinen qalmay, Abnerdi quwalap ketti.

20 Sonda Abner artına burılıp:

– Asahel, bul senbiseń? – dep soradı.

Asahel oǵan:

– Awa, bul men, – dep juwap berdi.

21 Abner oǵan:

– Izimnen quwıwdı toqtatıp, jigitlerdiń birine hújim qıl da, qural-jaraǵın al, – dedi.

Biraq Asaheldiń Abnerdi quwıwdı toqtatqısı kelmedi.

22 Sonda Abner Asahelge jáne eskertip:

– Meni quwıwdı toqtat! Seni óltiriwimniń nege keregi bar? Sońınan tuwısqanıń Ioabtıń júzine qalay qarayman? – dedi.

23 Biraq Asahel quwıwdı toqtatpaǵanlıqtan, Abner nayzasınıń artqı ushın Asaheldiń qarnına tıǵıp jiberdi. Nayza Asaheldiń arqasın tesip shıqtı. Ol jerge jıǵıla sala, jan berdi. Asahel jıǵılıp ólgen jerden ótip baratırǵanlardıń hámmesi sol jerde toqtap qaldı.

24 Al Ioab penen Abishay Abnerdi quwıwdı dawam etip, kún batqanda, Gibon shóline ketetuǵın joldaǵı Giaxtıń qarsı aldındaǵı Amma tóbeshigine keldi. 25 Benyamin urıwınıń adamları Abnerdiń izine erip jıynalıp, bir toparǵa birlesti hám bir tóbeshiktiń basına shıǵıp, sap tartıp turdı.

26 Abner dawıslap baqırıp, Ioabqa:

– Qılıshımız máńgige insanlardı qırıwı kerek pe? Yamasa sen bunıń aqıbetiniń qayǵılı bolatuǵının bilmeyseń be? Áskerlerińe tuwısqanların quwıwdı toqtatıwdı qashan buyırasań? – dedi.

27 Ioab Abnerge:

– Tiri Quday haqı ant ishemen: eger óziń aytpaǵanıńda, áskerler erteń azanǵa shekem tuwısqanların quwıwdı toqtatpaǵan bolar edi, – dep juwap berdi. 28 Sońınan Ioab kárnay shertti hám pútkil xalıq toqtadı. Keyin olar izraillılardı quwmadı da, olar menen urıspadı da.

29 Abner hám onıń adamları tún boyı Iordan tegisligi boylap júrdi. Olar Iordan dáryasın kesip ótip, Bitron jolı arqalı Maxanayımǵa qaytıp bardı.

30 Ioab ta Abnerdi quwıwdı toqtatıp, qaytıp kelgennen soń, hámme adamların jıynadı. Asahelden basqa, Dawıttıń adamlarınan jáne on toǵız adam qazalanǵan bolıp shıqtı. 31 Biraq Dawıttıń adamları Abner táreptegi Benyamin urıwınıń adamlarınan úsh júz alpıs adamdı óltirgen edi. 32 Ioab hám onıń adamları Asaheldiń denesin alıp kelip, Beytlehemdegi ákesiniń qábirine jerledi. Sońınan olar tún boyı jol júrip, tań ata Xebronǵa jetip keldi.