‏ 2 Samuel 20

Shebanıń qozǵalańı

1Sol arada Benyamin urıwınan Bixriydiń ulı Sheba degen jaramas bir adam sol jerde payda boldı. Sheba kárnay shertip: «Dawıt penen baylanısımız joq,
Ishay ulı Dawıtta qarızımız joq.
Háy, izraillılar, hár birińiz óz úyińizge qaytıńlar!» – dedi.

2Sonda pútkil izraillılar Dawıttı taslap, Bixriy ulı Shebanıń izine erip ketip qaldı. Al yahudalılar óz patshası tárepinde qalıp, Iordan dáryasınan Erusalimge shekem oǵan joldas boldı.

3Dawıt patsha Erusalimdegi sarayına qaytıp barǵanda, sarayǵa qarap turıwı ushın taslap ketken toqalların baqlaw astında saqlap, olardı támiyinlep turdı. Biraq olar menen jatpadı. Olar ómiriniń aqırına shekem úy qamaǵında saqlanıp, jesir hayallar sıyaqlı jasadı.

4Dawıt Amasaǵa:

– Úsh kún ishinde yahudalılardı aldıma shaqırıp kel. Óziń de usı jerde bol, – dedi. 5Amasa yahudalılardı shaqırıp keliw ushın ketti. Biraq ol belgilengen waqıtta qaytıp kelmedi. 6Sonda Dawıt Abishayǵa:

– Endi Bixriy ulı Sheba bizlerge Abshalomnan da úlkenirek jamanlıq isleydi. Ol ózine qorǵanlı qalalardı tawıp alıp, kózimizden ǵayıp bolmawı ushın, sen meniń áskerlerimdi al da, onıń izinen quw, – dedi. 7Solay etip, Ioabtıń adamları, keretler menen peletlerden alınǵan tán saqshılar hám pútkil márt jawıngerler Bixriy ulı Shebanı quwıw ushın, Abishaydıń basshılıǵında Erusalimnen shıqtı. 8Olar Gibondaǵı úlken jartastıń janına jetip barǵanda, Amasa olardıń aldınan shıqtı. Ioab sawash kiyimin kiyip alǵan edi. Ol kiyiminiń sırtınan bir qayıs taǵıp, qayısqa qınında turǵan bir qanjar baylaǵan edi. Ioab aldıǵa júrip baratırıp, qanjardı qınınan shıǵardı.

9Ioab Amasaǵa:

– Qalaysań, tuwısqanım? – dedi de, onı súyiw ushın, oń qolı menen Amasanıń saqalınan usladı. 10Amasa Ioabtıń qolındaǵı qanjardı ańlamadı. Ioab qanjardı Amasanıń qarnına suǵıp jibergende, onıń ishek-qarnı jerge tógildi. Ekinshi ret urıwǵa hájet qalmadı, ol ólgen edi.

Bunnan soń, Ioab hám onıń inisi Abishay Bixriy ulı Shebanı quwıwdı dawam etti. 11Ioabtıń adamlarınıń biri Amasanıń óliginiń janında turıp, Amasanıń adamlarına:

– Ioabqa sadıq bolıp, Dawıt tárepte bolǵan hár bir adam Ioabqa ersin, – dedi. 12Amasanıń óli denesi qanǵa bılǵanıp, joldıń ortasında jatırǵan edi. Ioabtıń adamı ólige jaqınlasqan hár bir adamnıń sol jerde toqtap qalıp atırǵanın kórgende, Amasanıń óligin súyrep, atızǵa ılaqtırıp jiberdi de, ústine bir kiyimdi tasladı. 13Ólik joldan alıp taslanǵannan soń, hámme Bixriy ulı Shebanı quwıw ushın, Ioabtıń izinen ketti.

14Sol arada Sheba pútkil Izrail urıwlarınıń jerlerinen ótip, Abel-Beyt-Maaxaǵa keldi. Sol aymaqlardıń xalqı da oǵan qosıldı. Hámmesi toplanıp, Shebaǵa erdi. 15Ioab barlıq adamları menen barıp, Abel-Beyt-Maaxa qalasında bolǵan Shebanı qorshap aldı. Olar qalanıń aldına topıraq úydi hám onıń ústine minip, diywaldı qulata basladı.

16Sol waqıtta aqıllı bir hayal qala ishinen baqırıp:

– Tıńlańlar! Tıńlańlar! Ioabqa aytıńlar, berman kelsin, men onıń menen sóylesejaqpan, – dedi. 17Ioab hayalǵa jaqınlastı. Sonda hayal onnan:

– Ioab degen sizbisiz? – dep soradı.

– Awa, men, – dep juwap berdi Ioab.

Hayal Ioabqa:

– Onda shorıńızdıń gápin esitiń, – dedi.

Ioab oǵan:

– Qulaǵım sende, – dedi.

18Hayal sózin bılay dep dawam etti:

– Burınǵılar: «Abel qalasına barıp, másláhát alıńlar», – deytuǵın hám másele solay sheshiletuǵın edi. 19Bizler Izraildıń tınıshlıǵın qáleytuǵın sadıq adamlarmız. Siz bolsańız, Izraildaǵı anaday qádirli qalalardıń birin wayran qılmaqshısız. Jaratqan Iyeniń iyeligin ne ushın joq qılmaqshısız?

20Ioab hayalǵa juwap berip bılay dedi:

– Hasla, olay emes! Men wayran qılmaqshı da, joq qılmaqshı da emespen. 21Hesh qanday olay emes. Efrayım tawlı úlkesinen bolǵan Bixriy ulı Sheba degen adam Dawıt patshaǵa qarsı bas kóterdi. Eger onıń jalǵız ózin tutıp berseńiz, men qaladan artqa sheginemen.

Sonda hayal Ioabqa:

– Onıń basın sizge diywaldan taslaymız, – dedi.

22Sońınan hayal óziniń dana sózlerin pútkil xalıqqa jetkiziw ushın ketti. Xalıq Bixriy ulı Shebanıń basın kesip, Ioabqa ılaqtırdı. Sonda Ioab kárnay shertti hám onıń adamları qalanı taslap, úylerine ketti. Ioab ta Erusalimge, patshanıń janına qaytıp keldi.

Dawıttıń hámeldarları

23Ioab pútkil Izrail áskerleriniń sárkárdası edi. Ehoyada ulı Benaya keretler menen peletlerden alınǵan tán saqshılardıń áskerbasısı edi. 24Adoniram márdikarǵa alınǵanlar ústinen juwapker, Axilud ulı Ehoshafat diywanbegi edi. 25Shewa xatker, Sadoq hám Abiyatar ruwxaniyler edi. 26Jáne de, yairli Ira Dawıttıń ruwxaniyi edi.