‏ 2 Samuel 21

Dawıttıń gibonlılar ushın ósh alıwı

1Dawıt patshalıq etken dáwirde úsh jıl qatara asharshılıq boldı. Sonda Dawıt Jaratqan Iyeden keńes soradı hám Jaratqan Iye oǵan:

– Buǵan Shaul hám onıń qanxor úy-ishi sebepshi boldı. Óytkeni Shaul gibonlılardı óltirdi, – dep juwap berdi. 2Patsha gibonlılardı shaqırtıp alıp, olar menen sóylesti. Gibonlılar Izrail xalqınan emes, al amor xalqınan qalǵan xalıq bolıp, izraillılar olardı tiri qaldırıwǵa ant ishken edi. Degen menen, Izrail hám Yahuda xalqı ushın jan kúydirgen Shaul olardı joq qılıwǵa háreket etti. 3Dawıt gibonlılardan:

– Sizler ushın ne isleyin? Jaratqan Iyeniń xalqına pátiyańızdı beriwińiz ushın, bul gúnanı ne menen juwayın? – dep soradı.

4Gibonlılar Dawıtqa:

– Bizlerge Shauldan hám onıń úy-ishinen gúmis te, altın da kerek emes. Izrailda hesh kimdi de óltiriwdi qálemeymiz, – dedi.

Dawıt jáne:

– Sizler neni qáleseńiz, men sonı orınlayman, – dedi.

5Sonda gibonlılar patshaǵa bılay dep juwap berdi:

– Izraildıń hesh bir jerinde jasamawımız ushın, Shaul bizlerdi qırıp taslamaqshı boldı. 6Sonlıqtan Shauldıń urpaqlarınan jetewin bizlerge ber. Bizler olardı Jaratqan Iyeniń tańlaǵanı bolǵan Shauldıń qalası Gibada, Jaratqan Iyeniń aldında darǵa asamız.

Patsha:

– Men olardı sizlerge beremen, – dedi.

7Dawıt patsha Shauldıń ulı Ionatan menen Jaratqan Iyeniń aldında ant ishiskeni sebepli, Ionatannıń ulı Mefiboshetke rehim qıldı. 8Al Ayya qızı Rispanıń Shauldan tuwǵan Armoniy hám Mefiboshet degen eki ulın, Shauldıń qızı Merabtıń mexolalı Barzillay ulı Adrielden tuwǵan bes ulın aldırıp, 9olardı gibonlılardıń qolına tapsırdı. Gibonlılar olardı tawda, Jaratqan Iyeniń aldında darǵa astı. Olardıń jetewi de bir waqıtta jan berdi. Olar báhárdegi jıyın-terimniń dáslepki kúnlerinde, arpa oraǵınıń baslanǵan waqtında óltirildi.

10Ayya qızı Rispa aza kiyimin alıp, sol tawdaǵı bir jartastıń ústine jaydı hám jıyın-terimniń dáslepki kúnlerinen baslap, denelerdiń ústine gúzgi jawın jawǵanǵa shekem sol jerde otırdı. Ol denelerdi kúndiz aspandaǵı quslardan, túnde jabayı haywanlardan qorıdı.

11Dawıtqa Shauldıń toqalı Ayya qızı Rispanıń islegen isleri haqqında bildirildi. 12Sonda Dawıt barıp, Shauldıń hám onıń ulı Ionatannıń súyeklerin Yabesh-Gilad xalqınan aldı. Filistler Gilboada Shauldı óltirgen kúni onıń hám onıń ulınıń denelerin Beyt-Shan qalasınıń maydanına asıp qoyǵan edi. Al Yabesh-Gilad xalqı denelerdi jasırın túrde ol jerden alıp qaytqan edi. 13Dawıt Shauldıń hám onıń ulı Ionatannıń súyeklerin ol jerden alıp keldi. Darǵa asılǵan jeti adamnıń súyekleri de jıynaldı. 14Olardıń hám Shaul menen onıń ulı Ionatannıń súyekleri Benyamin jerindegi Selaǵa, Shauldıń ákesi Kishtiń qábirine qoyıldı. Solay etip, patshanıń barlıq buyrıqları orınlandı. Bunnan keyin, Quday el ushın soralǵan duwalarǵa juwap berdi.

Filistlerge qarsı urıs

15Filistler menen izraillılar arasında jańadan urıs baslandı. Dawıt adamları menen barıp, filistlerge qarsı urıstı hám ol qattı sharshadı. 16Ushınıń ózi úsh júz shekel qoladan islengen nayza kóterip, taza qılısh asınǵan dáw áwladlarınan ▼

▼ Dáw áwladlarınan – yamasa «Refa áwladlarınan».

bolǵan Ishbiy-Benob Dawıttı óltirmekshi boldı. 17Biraq Seruya ulı Abishay Dawıtqa járdemge kelip, sol filistti óltirdi. Bunnan keyin, Dawıttıń adamları ant iship, Dawıtqa: «Izraildıń shıraǵı óship qalmawı ushın, endi siziń bizler menen urısqa barıwıńızǵa jol qoymaymız», – dedi.

18Sońınan Gob qalasında filistler menen jáne urıs baslandı. Bul urısta xushalı Sibbexay dáw áwladlarınan bolǵan Saf degen adamdı óltirdi.

19Gobta izraillılar menen filistler arasında taǵı bir urıs boldı. Urısta beytlehemli Yaare-Oregimniń ulı Elxanan gatlı Goliyattı óltirdi. Goliyattıń nayzasınıń sabı toqıw úskenesiniń qadasınday edi.

20Keyinirek Gat qalasında jáne sawash boldı. Ol jerde dáwdey bir adam bar edi. Onıń qolları hám ayaqları altı barmaqlı bolıp, hámmesi bolıp jigirma tórt barmaǵı bar edi. Ol da dáw áwladlarınan edi. 21Usı adam izraillılardı masqaralaǵanda, Dawıttıń ájaǵası Shimeanıń ulı Ionatan onı óltirdi.

22Dawıt hám onıń adamları tárepinen óltirilgen usı tórt adam da Gattaǵı dáw áwladlarınan edi.