‏ 2 Samuel 22

Dawıttıń jeńis jırı

1Jaratqan Iye Dawıttı pútkil dushpanlarınan hám Shauldıń qolınan qutqarǵan kúni Dawıt Jaratqan Iyege arnap, mına jırdı ayttı:

2«Jaratqan Iye – jartasım, qorǵanım hám qutqarıwshım,
3Qudayım meniń qorǵawshı jartasım, Onnan pana tabaman,
Ol qalqanım, qúdiretli qutqarıwshım,
Ol qorǵanım hám panam,
Qutqarıwshım, zulımlıqtan meni Sen qutqarasań.
4Maqtawǵa ılayıqlı Jaratqan Iyeni shaqıraman,
Qutqarılaman dushpanlarımnan.
5Ájel tolqınları qorshap alıp,
Nabıt qılıw aǵısları qorqıttı meni.
6Óliler mákanınıń arqanları bayladı meni,
Ólim duzaqları shıqtı qarsıma.
7Azap ishinde Jaratqan Iyege jalbarındım,
Qudayımdı shaqırdım.
Ibadatxanasınan Ol dawısımdı esitti,
Qıshqırǵanım qulaǵına jetip bardı.
8Sol waqıtta jer júzi titirep, shayqaldı,
Aspannıń tiykarı lárzege keldi,
Sebebi Jaratqan Iye ǵázepke mingen edi.
9Murnınan tútin kóterildi,
Awzınan jalmap jutatuǵın jalın shıǵıp,
Onnan kómir shoǵı jawdı.
10Kóklerdi jarıp, tómenge tústi,
Qara bult Onıń ayaǵınıń astında.
11Bir kerubqa minip,
Samaldıń qanatları ústinde ushıp keldi.
12Túnekke oranıp,
Qara bultlardı Ózine shertek qıldı.
13Onıń aldındaǵı nurdan,
Kómir shoǵı shashırap turdı.
14Gúrkiredi aspannan Jaratqan Iye,
Dawıs berdi Quday Taala.
15Oqlar atıp, dushpanlardı pıtırattı,
Shaqmaq shaqtırıp, olardı albırattı.
16Jaratqan Iyeniń keyisinen,
Murnınan shıqqan kúshli deminen,
Teńizdiń túbi kórindi,
Dúnyanıń tiykarı ashılıp qaldı.
17Aldı meni Jaratqan Iye qolın sozıp joqarıdan,
Hám shıǵardı tereń suwlardan.
18Qutqardı meni kúshli dushpanımnan,
Mennen kúshlirek bolǵan,
Meni jek kóretuǵınlardan.
19Qarsı turdı olar maǵan basıma is túskende,
Biraq tirek boldı maǵan Jaratqan Iye.
20Ol keń jerge shıǵardı meni,
Kewli tolıp, qutqardı meni.
21Jaratqan Iye haqlıǵım ushın sıy berip,
Pák qollarım ushın esesin qaytardı.
22Óytkeni júrdim Jaratqan Iyeniń jolı menen,
Jamanlıq islemedim, Qudayımnan uzaqlasıp.
23Kóz aldımda saqladım barlıq qararların,
Onıń qaǵıydalarınan júz burmadım.
24Minsiz boldım Onıń aldında,
Ózimdi saqladım gúna islewden.
25Esesin qaytardı Jaratqan Iye,
Haqlıǵım hám kóz aldındaǵı pákligim ushın.
26Sen sadıqqa sadıqlıq kórsetip,
Minsizge minsiz bolasań.
27Pák adamǵa pákligińdi kórsetip,
Jalatayǵa jalatayshılıǵına góre is tutasań.
28Ezilgenlerdi qutqarasań,
Menmenlerdi baqlap, kókiregin basasań.
29Qarańǵılıǵımdı jaqtıǵa aylandıratuǵın,
Shıraǵım Ózińseń, Jaratqan Iye!
30Seniń menen láshkerlerdi qıyratıp,
Qudayım menen diywallardan asarman.
31Qudaydıń jolı minsiz,
Jaratqan Iyeniń sózi isenimli,
Ol qalqanı Ózinen pana izlegen hár bir adamnıń.
32Jaratqan Iyeden basqa Quday bar ma?
Qudayımızdan basqa qorǵawshı jartas bar ma?
33Quday meniń qorǵanım,
Jolımdı minsiz qılatuǵın da Ol.
34Kiyiktiń ayaqlarınday qılar ayaqlarımdı,
Qoyar meni biyikliklerge.
35Úyretedi qollarımdı urısıwǵa,
Hám qola oq jaydı kerip tartıwǵa.
36Bereseń maǵan qutqarılıw qalqanıńdı,
Mártebeli qılar járdemiń meni.
37Keń qılarsań basar jolımdı,
Ayaqlarım meniń súrnikpes.
38Dushpanlarımnıń izinen quwıp joq qıldım,
Olardı joq qılmay turıp izge qaytpadım.
39Qırıp, joq ettim, tura almay qaldı,
Ayaqlarım astında sozılıp jattı.
40Sawash ushın meni toltırdıń kúshke,
Maǵan qarsı shıqqanlardı bas iydirdiń aldımda.
41Dushpanlarımdı mennen qashatuǵın qıldıń,
Men de ózimdi jek kórgenlerdi joq ettim.
42Jalbarındı olar, biraq qutqarǵan bolmadı,
Jaratqan Iyeni shaqırdı, biraq Ol juwap bermedi.
43Basqıladım olardı daladaǵı ılay yańlı,
Basqıladım olardı jerdegi ılay yańlı.
44Qutqardıń xalqımnıń kóterilisinen meni,
Milletlerge basshı qılıw ushın saqladıń meni,
Xızmet eter ózim tanımaytuǵın xalıqlar maǵan.
45Jat elliler mennen aybınar,
Men tuwralı esitiwden maǵan boysınar.
46Jat ellilerdiń júzleri quwarıp,
Shıqtı titirep, panalaǵan jerlerinen.
47Jaratqan Iye tiri! Qorǵawshı jartasıma alǵıslar bolsın!
Qutqarıwshı jartasım, Quday ullılansın!
48Ol boladı dushpanlarımnan ósh alıwıma jol qoyǵan,
Xalıqlardı maǵan boysındırǵan.
49Alıp shıǵar Ol dushpanlarımnıń arasınan,
Ústin qılar maǵan qarsı shıqqanlardan,
Azat qılar jawızlardıń qolınan.
50Bunıń ushın Jaratqan Iye!
Táriyipleymen Seni milletler arasında,
Saz shertip alǵıs aytaman arnap atıńa.
51Jaratqan Iye Óz patshasın ullı jeńislerge eristirer,
Maylaǵan patshası Dawıtqa hám onıń urpaǵına,
Máńgige miyrim-shápáátin kórseter».