2Sa 23 | KaaIBT22L | STEP | Dawıttıń sońǵı sózleri mınalar boldı: «Ishay ulı Dawıt, Quday mártebeli qılǵan adam, Yaqıptıń Qudayınıń maylaǵanı, Izraildıń súyikli jırshısı bılay deydi:

‏ 2 Samuel 23

Dawıttıń sońǵı sózleri

1 Dawıttıń sońǵı sózleri mınalar boldı:

«Ishay ulı Dawıt,
Quday mártebeli qılǵan adam,
Yaqıptıń Qudayınıń maylaǵanı,
Izraildıń súyikli jırshısı bılay deydi:
2 Sóyler Jaratqan Iyeniń Ruwxı men arqalı,
Onıń sózi meniń tilimde.
3 Sóyledi Izraildıń Qudayı,
Izraildıń súyengen jartası maǵan bılay dedi:
„Insanlardı ádillik penen
Hám Qudaydan qorqıp basqarǵan adam,
4 Ol bultsız aspandaǵı tań nurına uqsaydı,
Jerden shóp shıǵaratuǵın jawınnan keyingi nurlarǵa uqsaydı“.
5 Úy-ishim de Quday menen solay emes pe?
Ol meniń menen máńgi qalatuǵın,
Hár tárepleme qolaylı hám isenimli kelisim dúzdi.
Meniń qutqarılıwımdı da, tileklerimdi de Ol iske asırmay ma?
6 Al nahaqlar qol menen uslap bolmaytuǵın tikenler kibi ılaqtırılar,
7 Tikenlerdi joq qılmaqshı bolǵanlar,
Temir ásbap yamasa nayzanıń sabı menen qurallanar.
Tikenler turǵan jerinde jaǵıp jiberiler».

Dawıttıń márt áskerleri

8 Dawıttıń batır jawıngerleriniń atları mınalar: úsh adamnıń ishinde basshı bolǵan taxkemonlı Iosheb-Bashshebet. Ol segiz júz adamǵa nayza menen qarsı shıǵıp, bir hújim etkende hámmesin óltirdi.

9 Onnan keyingisi axoxlı Dodonıń ulı Elazar. Ol urısıw ushın toplanǵan filistlerge qarsı shıqqan Dawıttıń janındaǵı úsh batırdıń biri edi. Izraillılar ol waqıtta artqa shegingen edi. 10 Biraq Elazar ornında turıp qaldı. Ol qolı talıp, qılıshqa jabısıp qalǵansha, filistlerdi óltirdi. Sol kúni Jaratqan Iye ullı jeńis inam etti. Izraillılar tek ólgenlerdiń zatların oljaǵa alıw ushın ǵana Elazardıń janına bardı.

11 Úshinshisi hararlı Age ulı Shamma edi. Filistler Lexiydegi bir qızıl lobiya atızınıń janında toplanǵanda, Izrail áskerleri olardıń aldına túsip qashqan edi. 12 Biraq Shamma atızdıń ortasında turıp, sol jerdi qorǵadı hám filistlerdi óltirdi. Sonda Jaratqan Iye ullı jeńis inam etti.

13 Jıyın-terim waqtında, otız basshıdan úshewi Dawıtqa qosılıw ushın Adullam úńgirine keldi. Sol waqıtta filistlerdiń bir toparı Refaim oypatlıǵında orda qurǵan edi. 14 Sol waqıtta Dawıt qorǵanda, al filistlerdiń tiykarǵı toparı Beytlehemde edi. 15 Dawıt suw ishkisi kelip:

– Qánekey, Beytlehem dárwazasınıń janındaǵı suw saqlaǵıshtan birew maǵan suw ákelip berse edi! – dedi. 16 Sonda bul úsh batır filistlerdiń ordasın jarıp ótip, Beytlehem dárwazasınıń janındaǵı suw saqlaǵıshtan suw alıp, Dawıtqa ákelip berdi. Biraq Dawıt onı ishiwden bas tarttı hám suwdı jerge tógip, Jaratqan Iyege usındı. 17 Ol:

– Jaratqan Iye, bunı islewden meni saqlay gór! Janların qáwip astına qoyıp barǵan bul úsh adamnıń qanın isheyin be? – dep, Dawıt suwdı ishpedi.

Bul úsh batır usınday erlik kórsetken edi.

18 Ioabtıń inisi, Seruyanıń ulı Abishay sol otız ^{▼▼ sol otız – Bazı qoljazbalarda «sol úsh».} batırdıń basshısı edi. Ol nayzası menen úsh júz adamdı óltirdi. Sol tárizde ol úsh batır sıyaqlı dańqqa eristi. 19 Onıń otız ^{▼▼ otız – Bazı qoljazbalarda «úsh».} batırdan da dańqı artıp, olardıń basshısı bolǵanı menen, sol úsh batırdıń qatarına kirmeytuǵın edi.

20 Ehoyada ulı qabseelli Benaya da márt jawınger bolıp, ol da ullı isler isledi. Ol moablı eki kúshli jawıngerdi, al qar jawǵan kúni bir shuqırǵa túsip, arıslandı óltirdi. 21 Jáne ol dáwdey bir mısırlını da óltirdi. Mısırlınıń qolında nayzası bar edi. Al Benaya oǵan tayaq penen qarsı shıǵıp, onıń qolındaǵı nayzasın tartıp aldı da, onı óziniń nayzası menen óltirdi. 22 Ehoyada ulı Benayanıń islegen isleri mine usılar. Ol da sol úsh batır sıyaqlı dańq tarattı. 23 Ol otız batırǵa qaraǵanda ataqlıraq bolsa da, biraq sol úsh batırdıń qatarına kirmedi. Dawıt onı óziniń tán saqshılarına basshı etip qoydı.

24 Otız batırdıń qatarında bolǵanlar tómendegiler: Ioabtıń inisi Asahel, beytlehemli Dodonıń ulı Elxanan, 25 xarodlılar Shamma hám Eliqa, 26 peletli Xeles, teqoalı Ikkesh ulı Ira, 27 anatotlı Abiezer, xushalı Mabunnay, 28 axoxlı Salmon, netofalı Maharay, 29 netofalı Baananıń ulı Xeleb, Benyamin urıwınan gibalı Ribaydıń ulı Ittay, 30 piratonlı Benaya, Gaash sayları aymaǵınan Hidday, 31 arabalı Abiy-Albon, barxumlı Azmawet, 32 shaalbonlı Elyaxba, Yashenniń ulları: 33 hararlı Shammanıń ulı Ionatan, hararlı Sharar ulı Axiam, 34 maaxalı Axasbay ulı Elifelet, gilolı Axitofel ulı Eliam, 35 karmelli Xesray, arablı Paaray, 36 sobalı Natan ulı Igal, Gad urıwınan Baniy, 37 ammon xalqınan Selek, Seruya ulı Ioabtıń nókeri beerotlı Naxaray, 38 Iter tiyresinen Ira hám Gareb, 39 xet xalqınan Uriya. Hámmesi otız jeti adam edi.