2Sa 3 | KaaIBT22L | STEP | Shauldıń tárepdarları menen Dawıttıń tárepdarları arasındaǵı urıs uzaq dawam etti. Dawıttıń kúshine kúsh qosılǵan sayın, Shauldıń tárepdarları hálsirep bara berdi.

‏ 2 Samuel 3

1 Shauldıń tárepdarları menen Dawıttıń tárepdarları arasındaǵı urıs uzaq dawam etti. Dawıttıń kúshine kúsh qosılǵan sayın, Shauldıń tárepdarları hálsirep bara berdi.

Dawıttıń Xebronda tuwılǵan ulları

2 Xebronda tuwılǵan Dawıttıń ulları: tuńǵısh ulı Amnon. Ol izreelli Axinoamnan tuwıldı. 3 Ekinshisi Kileab bolıp, ol karmelli Nabaldıń jesiri Abigayıldan tuwıldı. Úshinshisiniń atı Abshalom, ol Geshur patshası Talmaydıń qızı Maaxadan tuwıldı. 4 Tórtinshisi Xaggitten tuwılǵan Adoniya, besinshisi Abitaldan tuwılǵan Shefatiya, 5 altınshısı Dawıttıń Egla degen hayalınan tuwılǵan Itream edi. Dawıttıń bul ullarınıń hámmesi Xebronda tuwıldı.

Abnerdiń Dawıtqa qosılıwdı sheshiwi

6 Shauldıń tárepdarları menen Dawıttıń tárepdarları arasında urıs dawam etip atırǵanda, Abner Shauldıń tárepdarları arasında kúshke tolıp bara berdi.

7 Shauldıń Rispa degen bir toqalı bar bolıp, ol Ayya degen adamnıń qızı edi. Bir kúni Ish-Boshet Abnerden:

– Ne ushın sen ákemniń toqalı menen jattıń? – dep soradı.

8 Ish-Boshettiń sorawına qattı ǵázeplengen Abner oǵan bılay dep baqırdı:

– Men ne Yahudaǵa xızmet qılıp júrgen bir kópek pe edim? Men usı kúnge deyin, ákeńiz Shauldıń xojalıǵına, tuwısqanlarına hám doslarına sadıq boldım. Sizdi de Dawıtqa satıp bermedim. Biraq búgin siz meni usı hayal sebepli ayıplap atırsız. 9 Jaratqan Iyeniń Dawıtqa ishken antın júzege asırmasam, onda Quday meni jazalaǵan ústine jazalasın! 10 Ol patshalıqtı Shauldıń násilinen tartıp alıp, Dannan Beer-Shebaǵa shekem sozılǵan Izrail menen Yahudada Dawıttıń patshalıǵın ornatatuǵının aytıp, wáde etken edi. 11 Ish-Boshet Abnerden qorqqanlıqtan, oǵan basqa hesh nárse ayta almadı.

12 Bunnan keyin, Abner óz atınan Dawıtqa xabarshılar jiberip, bılay dedi: «Bul eldi siz basqarıwıńız kerek emes pe? Eger meniń menen kelisim dúzseńiz, pútkil Izraildı siz tárepke awdırıw ushın, járdem beremen».

13 Dawıt oǵan: «Yaqshı, men seniń menen kelisim dúzemen. Biraq bir shártim bar: meni kóriwge kelgenińde, Shauldıń qızı, hayalım Mixaldı da óziń menen birge alıp kel. Bolmasa, aldıma kelmey-aq qoy», – dedi.

14 Sońınan Dawıt Shauldıń ulı Ish-Boshetke de xabarshılar jiberip, olar arqalı: «Qalıń malǵa júz filisttiń súnnet terisin tólep alǵan hayalım Mixaldı maǵan qaytarıp ber», – dedi. 15 Sonda Ish-Boshet adamlar jiberip, Mixaldı kúyewi Paltieldiń úyinen aldırdı. Paltiel Layısh degen adamnıń ulı edi. 16 Kúyewi jılawı menen Baxurimge shekem hayalına erip bardı. Biraq Abner oǵan: «Izińe qayt», – degende, ol izine qaytıp ketti.

17 Sol arada Abner Izraildıń aqsaqalları menen ushırasıp, olarǵa bılay dedi: «Sizler kópten beri Dawıttıń ózlerińizge patsha bolıwın qálegen edińiz. 18 Endi bunı iske asırıń. Sebebi Jaratqan Iye Dawıt haqqında: „Qulım Dawıt arqalı xalqım Izraildı filistlerdiń hám pútkil dushpanlarınıń qolınan qutqaraman“, – degen edi». 19 Abner benyaminliler menen de sóylesti. Sońınan ol Izrail xalqınıń hám Benyamin urıwınıń qálewi tuwralı Dawıtqa xabarlaw ushın Xebronǵa ketti.

20 Abner janına jigirma adamdı alıp Xebronǵa, Dawıttıń janına bardı. Dawıt Abner hám onıń janındaǵılar ushın zıyapat berdi.

21 Abner Dawıtqa:

– Endi barıp, pútkil Izrail xalqın jıynap, taqsırım, siziń aldıńızǵa alıp keleyin. Olar siz benen kelisim dúzsin. Sonda siz qálegen jerińizdiń hámmesi ústinen patshalıq qılasız, – dedi.

Bunnan soń, Dawıt Abnerdi shıǵarıp saldı. Ol da aman-esen jolına tústi.

Ioabtıń Abnerdi óltiriwi

22 Kóp uzamay, Dawıttıń adamları menen Ioab bir basqınshılıqtan qaytıp keldi. Olar ózleri menen birge kóp olja alıp kelgen edi. Biraq sol waqıtta Abner Xebronda Dawıttıń janında joq edi. Sebebi Dawıt onı shıǵarıp salǵan bolıp, ol aman-esen jónep ketken edi. 23 Ioab hám onıń janındaǵı pútkil áskerler Xebronǵa kelgende, olarǵa Ner ulı Abnerdiń patshaǵa kelgeni, patshanıń onı qaytarıp jibergeni, onıń da aman-esen úyine qaytqanı tuwralı xabarladı. 24 Sonda Ioab patshaǵa kelip:

– Siz ne islep qoydıńız? Abner óz ayaǵı menen aldıńızǵa kelgen bolsa, onı nege bosatıp jiberdińiz? Ol ketip qalıptı-ǵo! 25 Ner ulı Abnerdi ózińiz bilesiz. Ol sizdi aldaw ushın, qay jerge barıp, qay jerden keletuǵınıńızdı hám neler isleytuǵınıńızdı biliw ushın kelgen, – dedi.

26 Ioab Dawıttıń janınan shıqqannan keyin, Abnerdiń izinen xabarshılar jiberdi. Xabarshılar onı Sira suw saqlaǵıshınıń janınan qaytarıp alıp keldi. Dawıt bunnan biyxabar edi. 27 Abner Xebronǵa qaytıp kelgende, Ioab ózin onıń menen jeke sóylesip alatuǵın adamday kórsetip, onı qala dárwazasınan kirgizdi. Tuwısqanı Asaheldiń qanın tókkeni ushın, Ioab sol jerde Abnerdiń qarnına pıshaq urıp óltirdi. 28 Dawıt bul waqıyanı esitkende bılay dedi: «Men de, meniń patshalıǵım da Ner ulı Abnerdiń qanı ushın Jaratqan Iyeniń aldında máńgige ayıpsızbız. 29 Onıń qanınıń qunı Ioabtıń hám onıń ákesiniń pútkil úy-ishiniń moynında. Ioabtıń urpaǵınan irińli jaraǵa hám jaman teri keselligine shalınǵanlar, baldaqqa súyengenler, qılıshtan ólgenler, nanǵa zar bolǵanlar hesh qashan arılmasın».

30 Solay etip, Ioab hám onıń inisi Abishay Abnerdi óltirdi. Óytkeni Abner Gibondaǵı sawashta olardıń inisi Asaheldi óltirgen edi.

31 Sońınan Dawıt Ioabqa hám onıń janındaǵılarǵa:

– Kiyimlerińizdi jırtıp, aza kiyimin kiyińler hám Abner ushın jılańlar, – dep buyrıq berdi. Dawıt patshanıń ózi Abnerdiń tabıtınıń izinde júrdi. 32 Olar Abnerdi Xebronǵa jerledi. Patsha Abnerdiń qábiriniń basında dawıs shıǵarıp jıladı. Sol jerdegi pútkil xalıq ta jıladı. 33 Sońınan patsha Abner ushın mına joqlawdı ayttı:

«Abner, sen bir aqmaq sıyaqlı óliwiń kerek pe edi?
34 Qollarıń baylawlı, ayaqlarıń kisenlewli emes edi-ǵo.
Biraq sen qaraqshılar qolınan óltirilgen adam sıyaqlı qaza taptıń».

Hámme Abner ushın jáne jıladı.

35 Xalıq Dawıtqa barıp, kún batpastan burın onı bir nárse jep alıwǵa kóndirmekshi bolǵanda, Dawıt ant iship bılay dedi:

– Kún batpastan aldın nan yamasa bir nárse jesem, Quday meni jazalaǵan ústine jazalasın!

36 Pútkil xalıq bunı bildi hám patshanıń barlıq islerin unatqanı sıyaqlı, bul isin de unattı. 37 Sol kúni Yahudadaǵı hám Izraildaǵı hár bir adam Ner ulı Abnerdiń óliminde patshanıń qolı joqlıǵın bildi.

38 Patsha adamlarına bılay dedi:

– Búgin Izrailda bir basshınıń, ullı bir adamnıń ólgenin bilmeysizler me? 39 Men maylanıp, patsha etip qoyılǵan bolsam da, búgin hálsizben. Al mına Seruyanıń ulları bolsa, mennen kúshlirek. Jaratqan Iye jamanlıq islegenge jamanlıǵına jarasa qaytarsın!