2Sa 4 | KaaIBT22L | STEP | Shauldıń ulı Ish-Boshet Abnerdiń Xebronda óltirilgenin esitkende, qáweterge tústi. Pútkil Izrail xalqı da qorqısıp qaldı.

‏ 2 Samuel 4

Ish-Boshettiń óltiriliwi

1 Shauldıń ulı Ish-Boshet Abnerdiń Xebronda óltirilgenin esitkende, qáweterge tústi. Pútkil Izrail xalqı da qorqısıp qaldı. 2 Ish-Boshettiń xızmetinde basqınshılar toparın basqaratuǵın Baana hám Rexab degen eki adam bar edi. Olar Benyamin urpaǵınan bolǵan beerotlı Rimmonnıń ulları edi. Beerot qalası benyaminlilerge tiyisli qala dep sanalatuǵın edi. 3 Sebebi beerotlılar qalanı taslap, Gittayımǵa qashıp ketken edi. Sonlıqtan olar usı kúnge shekem sol jerde kelgindi bolıp jasap kiyatır.

4 Shauldıń ulı Ionatannıń eki ayaǵı da láń bolıp qalǵan Mefiboshet ^{▼▼ Mefiboshet – bul at 1Jln 8:34; 9:40 ayatlarda «Merib-Baal» dep aytıladı.} degen bir ulı bar edi. Izreelden Shaul menen Ionatannıń qazalanǵanı haqqında xabar kelgende, Mefiboshet bes jasta edi. Sonda tárbiyashısı onı alıp qashıp ketken edi. Ol balanı asıǵıs alıp qashıp baratırǵanda, balanı qolınan túsirip alǵanlıqtan, bala mayıp bolıp qalǵan edi.

5 Beerotlı Rimmonnıń ulları Rexab penen Baana jolǵa shıǵıp, kún qattı qızǵan waqıtta Ish-Boshettiń úyine kelgende, Ish-Boshet uyıqlap jatırǵan edi. 6 Rexab hám onıń tuwısqanı Baana biyday alatuǵın adam sıyaqlı úyge kirip, Ish-Boshettiń qarnına qanjar tıǵıp óltirdi de, qashıp ketti. 7 Waqıya bılay bolǵan edi: olar úyge kirgende, Ish-Boshet uyıqlaytuǵın bólmesindegi óz tóseginde jatırǵan edi. Rexab penen Baana Ish-Boshetti óltirip, basın kesip aldı hám bastı kóterip, pútkil tún boyı Iordan tegisligi arqalı júrdi. 8 Olar Ish-Boshettiń basın Xebronǵa, Dawıt patshaǵa alıp kelip, oǵan:

– Mine, sizdi óltirmekshi bolǵan dushpanıńız Shauldıń ulı Ish-Boshettiń bası! Jaratqan Iye búgin Shauldan hám onıń urpaǵınan taqsırım, siziń óshińizdi aldı, – dedi.

9 Biraq Dawıt beerotlı Rimmonnıń ulları Rexab penen onıń tuwısqanı Baanaǵa bılay dep juwap berdi:

– Meni hár túrli bále-qadalardan qutqarǵan tiri Jaratqan Iye haqı ant ishemen: 10 burın Shauldıń ólimi haqqında xabardı maǵan xosh xabar retinde alıp kelgen adamdı uslap alıp, Siklagta óltirgen edim. Ákelgen xosh xabarı ushın oǵan berilgen sıy usı boldı. 11 Endi ayıpsız bir adamdı óz úyinde, óz tóseginde óltirgen jawız adamlar da sózsiz óltiriledi. Onıń qanı ushın sizlerden ósh alıp, sizlerdi jer betinen joq qılıp jibermeymen be?

12 Sońınan Dawıt adamlarına buyrıq berdi. Olar eki tuwısqandı óltirip, olardıń ayaq-qolların kesti de, denesin Xebrondaǵı háwizdiń boyına asıp qoydı. Al Ish-Boshettiń basın aparıp, Xebrondaǵı Abnerdiń qábirine jerledi.